ଭବାନୀପାଟଣା,(ଉତ୍ତମ କୁମାର ଦାଶ)/ ଭୁବନେଶ୍ୱର,୨୮।୮(ଅସମାପିକା ସାହୁ): ରାଜ୍ୟ ବିମାନ ସେବାରେ ଯୋଡ଼ିହେବ ନୂଆ ଅଧ୍ୟାୟ। କଳାହାଣ୍ଡି ଉତ୍କେଲାରୁ ଉଡ଼ିବ ବିମାନ। ଆଉ ୩ଦିନ ପରେ କଳାହାଣ୍ଡିବାସୀଙ୍କ ଦୀର୍ଘ ଦିନର ସ୍ବପ୍ନ ପୂରଣ ହେବ। ୩୧ ତାରିଖରେ ଲୋକାର୍ପଣ ହେବ ଜିଲାର ପ୍ରଥମ ଉତ୍କେଲା ବିମାନବନ୍ଦର। କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଭର୍ଚୁଆଲରେ ଏହାର ଉଦ୍ଘାଟନ କରିବେ। ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୁବନେଶ୍ୱର ବିମାନବନ୍ଦରରୁ ସବୁଜ ପତାକା ଦେଖାଇ ଏହାର ଲୋକାର୍ପଣ କରିବେ। ବିଭାଗୀୟ ରାଷ୍ଟ୍ରମନ୍ତ୍ରୀ ଭି.କେ. ସିଂ ମଧ୍ୟ ଭର୍ଚୁଆଲରେ ଉପସ୍ଥିତ ରହିବାର କାର୍ଯ୍ୟକ୍ରମ ରହିଥିବାବେଳେ ସେପଟେ ଉତ୍କେଲା ବିମାନବନ୍ଦର କାର୍ଯ୍ୟକ୍ରମରେ ରାଜ୍ୟ ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନି ସାହୁ ସାମିଲ ହେବେ। ଗୁରୁବାର ସକାଳ ୧୦ଟା ୩୫ରେ ପ୍ରଥମ ବିମାନଟି ଭୁବନେଶ୍ୱରରୁ ଉତ୍କେଲା ଅଭିମୁଖେ ଯାତ୍ରା କରିବ। ଇଣ୍ଡିଆଓ୍ବାନ୍ ଏୟାର ଏହି ସେବା ପ୍ରଦାନ କରିବ। ଟିକେଟ ମୂଲ୍ୟ ପ୍ରଥମ ୧୦ ଦିନ ପାଇଁ ୧୨୦୦ ଟଙ୍କା ରଖାଯାଇଛି। ତେବେ ପରବର୍ତ୍ତୀ ସମୟରେ ଏହାକୁ ଛତିଶଗଡ଼ର ରାୟପୁର ପର୍ଯ୍ୟନ୍ତ ସମ୍ପ୍ରସାରଣ କରାଯିବ। ବିମାନଟି ଭୁବନେଶ୍ୱରରୁ ଉତ୍କେଲା ଯାଇ ସେଠାରୁ ରାୟପୁର ଓ ରାୟପୁରରୁ ପୁଣି ଉତ୍କେଲା ଦେଇ ଭୁବନେଶ୍ୱର ଫେରିବ ବୋଲି ସୂଚନା ଦିଆଯାଇଛି।
ଉତ୍କେଲା ବିମାନବନ୍ଦର କାର୍ଯ୍ୟକ୍ଷମ ହେଲେ, ଓଡ଼ିଶାରେ ଏହା ୫ମ ବିମାନବନ୍ଦର ହେବ। ବିଶେଷକରି ଯୋଗାଯୋଗ କ୍ଷେତ୍ରରେ ଆଉ ପାଦେ ଆଗେଇବ କଳାହାଣ୍ଡି। ଏଥିସହ ରାୟଗଡ଼ା, ନୂଆପଡ଼ା, ବଲାଙ୍ଗୀର ଓ ନବରଙ୍ଗପୁର ଜିଲାବାସୀଙ୍କୁ ଯୋଗାଯୋଗ କ୍ଷେତ୍ରରେ ଏହା ବେଶ୍ ସହାୟକ ହୋଇପାରିବ। ଦାରିଦ୍ର୍ୟତା ପାଇଁ ଯେଉଁ ଜିଲା ଦିନେ ବିଶ୍ୱ ଦରବାରରେ ବଦନାମ ମୁଣ୍ଡାଇ ଚାଲୁଥିଲା ଏବେ ସେହି ଜିଲାର ବିକାଶଧାରା ସମସ୍ତେ ଜାଣିବେ। ସରକାରଙ୍କ ବିକାଶ ନକ୍ସାରେ କଳାହାଣ୍ଡି ଯୋଡ଼ି ହେବା ପରେ ଜିଲାର ବୈପ୍ଲବିକ ପରିବର୍ତ୍ତନ ହୋଇଛି। ଶିକ୍ଷା, ସ୍ବାସ୍ଥ୍ୟ ଓ କୃଷି କ୍ଷେତ୍ରରେ ନିଜର ସତନ୍ତ୍ର ପରିଚୟ ସୃଷ୍ଟି କରି ପାରିଛି କଳାହାଣ୍ଡି। ଏବେ ଏହି ଜିଲାକୁ ଆକାଶ ମାର୍ଗରେ ଯୋଗାଯୋଗ ଦାବି ପୂରଣ ହୋଇଛି। ଏହାକୁ ନେଇ ଜିଲାବାସୀ ସରକାରଙ୍କୁ ଧନ୍ୟବାଦ ଜଣାଇଛନ୍ତି।
ସୂଚନାଯୋଗ୍ୟ, ୧୯୬୨ରେ ସ୍ଥାପନ ହୋଇଥିଲା ଉତ୍କେଲା ଏୟାରଷ୍ଟ୍ରିପ। ଏଠାକୁ ୧୨ରୁ ୫୦ ସିଟ୍ ବିଶିଷ୍ଟ ଏୟାରକ୍ରାଫ୍ଟ ପାଇଁ ପ୍ରଯୁଜ୍ୟ ଥିଲା। ତେବେ ୨୦୧୬-୧୭ରେ ଉଡାଣ ଯୋଜନାରେ ଉତ୍କେଲା ବିମାନବନ୍ଦରକୁ ସାମିଲ କରାଯିବା ପରେ ୩ କୋଟି ଟଙ୍କା ଅନୁଦାନରେ ସମ୍ପ୍ରସାରଣ କାମ ଆରମ୍ଭ ହୋଇଥିଲା। ରନେୱ ନିର୍ମାଣ, ପାଚେରି, ଡ୍ରେନ, ଦୁଇ ପାଶର୍ବରେ ରାସ୍ତା, ସିଗ୍ନାଲ ରୁମ, କଣ୍ଟ୍ରୋଲ ରୁମ, ରେଷ୍ଟ ହାଉସ, ଗେଷ୍ଟ ହାଉସ ନିର୍ମାଣ କରାଯାଇଥିଲା। ଅନୁଦାନ ରାଶି ବଢ଼ିବା ପରେ ଟର୍ମିନାଲ ବିଲ୍ଡିଂ, ଟେକ୍ସିଇନ, ଫୁଏଲ ଷ୍ଟେଶନ ଆଦି ନିର୍ମାଣ କରାଯାଇଛି। ଉଡାଣ ଯୋଜନାରେ ୧୬ କୋଟି ବ୍ୟୟରେ ବଡ଼ ଏୟାରପୋର୍ଟ ପାଇଁ ୫୫ କୋଟି ଟଙ୍କାର ଟେଣ୍ଡର ପରେ ସମ୍ପ୍ରସାରଣ କାର୍ଯ୍ୟ ଶେଷ ହୋଇଛି। ଏବେ ସେବା ପ୍ରଦାନ ପାଇଁ ବିମାନବନ୍ଦର ପୂରା ପ୍ରସ୍ତୁତ ହୋଇସାରିଛି।
