ଜୟପୁର, ୬ା୩: ୨୦୧୯ ପୁଲ୍ଓ୍ବାମା ଆତଙ୍କବାଦୀ ଆକ୍ରମଣରେ ଶହୀଦ ହୋଇଥିବା ସିଆର୍ପିଏଫ୍ ଯବାନମାନଙ୍କ ପରିବାରକୁ ସେହି ସମୟରେ ବିଭିନ୍ନ ସହାୟତାର ପ୍ରତିଶ୍ରୁତି ଦିଆଯାଇଥିଲା। ତେବେ ରାଜସ୍ଥାନ ସରକାର ଦେଇଥିବା ପ୍ରତିଶ୍ରୁତି ପୂରଣ କରି ନ ଥିବା ୩ ଶହୀଦଙ୍କ ବିଧବା ସ୍ତ୍ରୀମାନେ ଅଭିଯୋଗ କରିଛନ୍ତି। ସେଥିପାଇଁ ସେମାନଙ୍କୁ ଆତ୍ମହତ୍ୟା ପାଇଁ ଅନୁମତି ଦେବାକୁ ରାଜ୍ୟପାଳ କଲରାଜ ମିଶ୍ରଙ୍କ ଅନୁମତି ଲୋଡ଼ିଛନ୍ତି।
ଉକ୍ତ ମହିଳାମାନଙ୍କ ସହ ଭାଜପା ରାଜ୍ୟ ସଭା ସଦସ୍ୟ କିରୋଡିଲାଲ୍ ମୀନା କିଛିଦିନ ହେଲା ଧାରଣାରେ ବସିଥିଲେ। ସେ ମହିଳାମାନଙ୍କ ସହ ରାଜଭବନ ଯାଇ ରାଜ୍ୟପାଳଙ୍କୁ ଆବେଦନପତ୍ର ଦେଇଛନ୍ତି। ସେଠାରୁ ଫେରି ସେମାନେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଯାଉଥିବାବେଳେ ପୋଲିସ ଅଟକାଇବା ସହ ସେମାନଙ୍କୁ ଠେଲିଦେଇଥିଲା। ଫଳରେ ରୋହିତାଶଭ ଲାମ୍ବାଙ୍କ ବିଧବା ସ୍ତ୍ରୀ ମଞ୍ଜୁ ଜାଟ୍ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ସରକାର ପ୍ରତିଶ୍ରୁତି ପାଳନ କରିବା ପରିବର୍ତ୍ତେ ଏକଚ୍ଛତ୍ରବାଦ ନୀତି ଗ୍ରହଣ କରୁଥିବା ଭାଜପା ନେତା ଅଭିଯୋଗ କରିଛନ୍ତି।
