ବଇଣ୍ଡା,୧୨।୬(ଡି.ଏନ.ଏ.): ଅନୁଗୋଳ ଜିଲା ଆଠମଲ୍ଲିକ ବ୍ଲକ କନ୍ତପଡ଼ାରୁ ମଇମୁରା ପଞ୍ଚାୟତକୁ ସଂଯୋଗ କରୁଥିବା ୧୧ କି.ମି. ଦୀର୍ଘ ତରଣ୍ଡା-କେଞ୍ଚୁଆନାଳି-ବିପ୍ରଡିହ ସଡ଼କର ଅବଶିଷ୍ଟ ୩ କି.ମି. ମାଟି ରାସ୍ତା ପିଚୁ ଢଳେଇ ହେବ। ଶନିବାର ଏଭଳି ପ୍ରତିଶ୍ରୁତି ଦେଇଛନ୍ତି ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ। ଏହାପରେ ଦୁଇ ପଞ୍ଚାୟତ ମଧ୍ୟରେ ଗମନାଗମନ ବ୍ୟବସ୍ଥା ସୁଦୃଢ଼ ହେବ ବୋଲି ବିଧାୟକ ଅଶାବ୍ୟକ୍ତ କରିଛନ୍ତି।
ସୂଚନାଯୋଗ୍ୟ, ୨୦୨୦-୨୧ରେ ଉକ୍ତ ୧୧ କି.ମି. ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଅନ୍ତର୍ଭୁକ୍ତ କରାଯାଇ ପିଚୁ ଢଳେଇ କରାଯାଇଥିଲା। ତେବେ ରାସ୍ତା ମଝିରେ ୩ କିମି ଜଙ୍ଗଲ ଜମି ରହିଥିବାରୁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଏହାକୁ ପିଚୁ ଢଳେଇରୁ ବାଦ୍ ଦିଆଯାଇଥିଲା। ତେବେ ପିଚୁ ପଡ଼ି ନ ଥିବା ୩ କିମି ରାସ୍ତାରେ ଗମନାଗମନା କରିବା ସମସ୍ୟା ସୃଷ୍ଟି କରୁଥିଲା। ଏ ସଂକ୍ରାନ୍ତରେ କେଞ୍ଚୁଆନାଳି ଗ୍ରାମବାସୀ ଆଠମଲ୍ଲିକ ବିଧାୟକଙ୍କଠାରୁ ଆରମ୍ଭ କରି ଜଙ୍ଗଲ ମନ୍ତ୍ରୀ, କେନ୍ଦ୍ର ଜଙ୍ଗଲ ମନ୍ତ୍ରୀ, ସମ୍ବଲପୁର ଏମ୍ପିଙ୍କ ନିକଟରେ ଏକାଧିକ ଥର ଅଭିଯୋଗ କରିଥିଲେ। ତଥାପି କୌଣସି ସୁଫଳ ମିଳୁ ନ ଥିଲା। ଶନିବାର ବିଧାୟକ ସାଏ, ଆଠମଲ୍ଲିକ ବନଖଣ୍ଡ ଅଧିକାରୀ (ଡିଏଫ୍ଓ) ଏସ୍. କପ୍ଲା, ଧଣ୍ଡାତୋପା ରେଞ୍ଜର ବବ୍ରୁବାହାନ ସାହୁ, ଫରେଷ୍ଟର ସଞ୍ଜୟ ପ୍ରଧାନଙ୍କ ସମେତ ବନ ବିଭାଗର ଏକ ଟିମ୍ ଉକ୍ତ ଅଞ୍ଚଳ ଗସ୍ତ କରିଥିଲେ। ବାଦ୍ ପଡ଼ିଥିବା ୩ କିମି ରାସ୍ତା ପିଚୁ ଢଳେଇ ହେଲେ ଏହା ଉପରେ ନିର୍ଭର କରୁଥିବା କନ୍ତପଡ଼ା, ମଇମୁରା, ଟାପଢୋଲ ପଞ୍ଚାୟତବାସୀ ଉପକୃତ ହେବ। ତେଣୁ ଯୁଦ୍ଧକାଳୀନ ଭିତ୍ତିରେ ରାସ୍ତା ନିର୍ମାଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଏ ନେଇ ବନଖଣ୍ଡ ଅଧିକାରୀ ଏହି ସମସ୍ୟା ଦୂର କରିବାକୁ ପ୍ରତିଶ୍ରୁତି ଦେଇଛନ୍ତି। ଏ ନେଇ ଡିଏଫଓ କପ୍ଲା କହିଛନ୍ତି, ଉକ୍ତ ୩ କିମି ରାସ୍ତା କିଭଳି ପିଚୁ ଢଳେଇ କରାଯିବ ସେ ନେଇ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରଣାଳୟକୁ ଚିଠି ମାଧ୍ୟମରେ ଅବଗତ କରାଯିବ। ଏହାକୁ ମଞ୍ଜୁରୀ ମିଳିଲେ କାମ ଆରମ୍ଭ ହେବ।
ଅପରପକ୍ଷେ ସ୍ଥାନୀୟ ଅଞ୍ଚଳର ଜନସାଧାରଣଙ୍କ ମୁଖ୍ୟ ଜୀବିକା କୃଷି। ହେଲେ ବନ୍ୟପ୍ରାଣୀଙ୍କ ଉପଦ୍ରବ ଯୋଗୁ ଚାଷ ଉଜୁଡ଼ିଯାଉଛି। ଜୀବନଜୀବିକା ପ୍ରଭାବିତ ହେଉଛି। ଏହାର ପ୍ରତିକାର କରିବାକୁ ଗ୍ରାମବାସୀ ବିଧାୟକଙ୍କ ନିକଟରେ ଦାବି କରିଥିଲେ। ସମସ୍ୟାର ସମାଧାନ ଲାଗି ବିଧାୟକ ଆଶ୍ୱାସନା ଦେଇଛନ୍ତି। ଜଙ୍ଗଲୀଜନ୍ତୁ ଉପଦ୍ରୁତ ଅଞ୍ଚଳରେ ସୋଲାର ତାରବାଡ଼ ଘେରାଇବାକୁ ବିଧାୟକ ବନଖଣ୍ଡ ଅଧିକାରୀଙ୍କୁ ନିବେଦନ କରିଛନ୍ତି।
