ଭୁବନେଶ୍ୱର, ୨।୮(ଅସମାପିକା ସାହୁ): ରାଜ୍ୟର ସମସ୍ତ ଉଚ୍ଚ ମାଧ୍ୟମିକ ବିଦ୍ୟାଳୟ ବା ଯୁକ୍ତ୨ ଜୁନିୟର କଲେଜରେ ଏକାଦଶ ଶ୍ରେଣୀ ଛାତ୍ରୀଛାତ୍ରଙ୍କ ପାଠପଢ଼ା ମଙ୍ଗଳବାରଠାରୁ ଆରମ୍ଭ ହୋଇଛି। ପ୍ରଥମଦିନରେ ଛାତ୍ରୀଛାତ୍ରମାନେ ଶିକ୍ଷାନୁଷ୍ଠାନ ଓ ଏକାଡେମିକ୍ ବିଷୟରେ ଜାଣିବା ସହ ନୂଆ ଅନୁଭୂତି ସାଉଣ୍ଟିଛନ୍ତି। ପୂର୍ବରୁ ଜାରି ହୋଇଥିବା ମାର୍ଗଦର୍ଶିକା ଅନୁଯାୟୀ, ଦିଗ୍ଦର୍ଶନ କାର୍ଯ୍ୟକ୍ରମ ଅନୁଷ୍ଠିତ ଥିଲା। ନୂଆକରି ଶିକ୍ଷାନୁଷ୍ଠାନକୁ ଆସିଥିବା ପିଲାଙ୍କୁ ସ୍ବାଗତ କରିବା ପାଇଁ ସୁସଜ୍ଜିତ ହଲ୍ରେ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏଥିରେ ପିଲାଙ୍କୁ ଶିକ୍ଷାନୁଷ୍ଠାନର ଇତିହାସ, କାର୍ଯ୍ୟକଳାପ ଓ ନିୟମ ବିଷୟରେ ସୂଚିତ କରାଯାଇଥିଲା। ଅଧ୍ୟକ୍ଷଙ୍କ ସମେତ ଅନ୍ୟ ଶିକ୍ଷୟିତ୍ରୀଶିକ୍ଷକ ଏବଂ କର୍ମଚାରୀ କାର୍ଯ୍ୟକ୍ରମ ପରିଚାଳନା କରିଥିଲେ। ଛାତ୍ର ଜୀବନରେ ଉଚ୍ଚ ମାଧ୍ୟମିକ ଶିକ୍ଷାର ଗୁରୁତ୍ୱ ସମ୍ପର୍କରେ ପିଲାଙ୍କୁ ଅବଗତ କରାଯିବା ସହ ଶିକ୍ଷାନୁଷ୍ଠାନର ଶ୍ରେଣୀଗୃହ, ପରୀକ୍ଷାଗାର, ପାଠାଗାର ସମ୍ପର୍କରେ ସେମାନଙ୍କୁ ବୁଝାଯାଇଥିଲା। ସେହିଭଳି ଶିକ୍ଷାନୁଷ୍ଠାନ ପକ୍ଷରୁ ଛାତ୍ରୀଛାତ୍ରଙ୍କୁ ପରିଚୟ ପତ୍ର ଓ ବିଭାଗ ଅନୁସାରେ ସମୟ ସୂଚୀ ପ୍ରଦାନ କରାଯାଇଛି। ଏଥିସହିତ ରାଜ୍ୟ ସରକାରଙ୍କ ପକ୍ଷରୁ ପ୍ରସ୍ତୁତ କ୍ୟାରିୟର ପୋର୍ଟାଲ ସମ୍ପର୍କିତ ତଥ୍ୟ ଛାତ୍ରୀଛାତ୍ରଙ୍କୁ କୁହାଯାଇଥିଲା। ଓଡ଼ିଶା କ୍ୟାରିୟର ପୋର୍ଟାଲ (http://odishacareerportal.com)ରେ ଉପଲବ୍ଧ ପ୍ରାୟ ୫୫୦ କ୍ୟାରିୟର ଅପ୍ସନ୍ ସମ୍ପର୍କରେ ସୂଚନା ଦିଆଯାଇଥିଲା। www. chseodisha.nic.inରେ ଲଗ୍ ଇନ୍ କରି ପିଲାମାନେ ସିଲାବସ୍ ସମ୍ପର୍କରେ ଏବଂ https://www.textbookbureauodisha.nic.inରେ ଲଗ୍ ଇନ୍ କରି ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପ୍ରଚଳିତ ପାଠ୍ୟପୁସ୍ତକ ପିଡିଏଫ୍ ଆକାରରେ କିପରି ପାଇପାରିବେ ସେସମ୍ପର୍କରେ କୁହାଯାଇଥିଲା। ଏଥିସହ ରାଗିଂ ସମ୍ପର୍କରେ ସେମାନଙ୍କୁ ସଚେତନ କରାଯିବା ସହ ଆଣ୍ଟି ରାଗିଂ ସେଲ୍ ମୁଖ୍ୟଙ୍କ ନାମ ଏବଂ ନମ୍ବର ପ୍ରଦାନ କରାଯାଇଥିଲା। ଯଦି କେହି ରାଗିଂର ଶିକାର ହୁଅନ୍ତି, ତୁରନ୍ତ ସେମାନେ ସେଲ୍ର ମୁଖ୍ୟଙ୍କୁ ଜଣାଇବାକୁ ପରାମର୍ଶ ଦିଆଯାଇଥିଲା। କହିବାକୁ ଗଲେ, ନୂଆକରି କଲେଜରେ ପାଦ ଦେଇଥିବା ଏହି ଛାତ୍ରୀଛାତ୍ରମାନେ ଖୁସିରେ ଖୁସିରେ ସମୟ ବିତାଇଥିଲେ।
