ଦିଗପହଣ୍ଡି,୨୧।୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଥାନା ବଡ଼ ଡୁମ୍ବୁଳା ପଞ୍ଚାୟତ ସୁମନ୍ତପୁର ଗ୍ରାମର ପ୍ରହଲ୍ଲାଦ ପ୍ରଧାନଙ୍କ ଘରୁ ୩ ଲକ୍ଷ ୨୦ ହଜାର ଟଙ୍କା ଓ ପ୍ରାୟ ୮ ଭରି ସୁନାଗହଣା ଚୋରି ଘଟଣାରେ ପର୍ଦ୍ଦାଫାଶ ହୋଇଛି। ସମ୍ପୃକ୍ତ ୪ ଜଣ ପେଶାଦାର ଲୁଟେରା ଏବଂ ସୁନା ଅଳଙ୍କାର କ୍ରୟ କରିଥିବା ଜଣେ ଗହଣା ବ୍ୟବସାୟୀଙ୍କୁ ଗୁରୁବାର ପୋଲିସ ଗିରଫ କରିଛନ୍ତି। ଗିରଫ ଅଭିଯୁକ୍ତମାନେ ହେଲେ କେ . ନୂଆଗାଁ ଥାନା ବମକୋଇ ଗ୍ରାମରେ ରହୁଥିବା ଖୋର୍ଦ୍ଧା ଜିଲା ଜଟଣୀ ଥାନା ବେଣାପଞ୍ଜୁରୀ ଗ୍ରାମର ଜେ. ମୋହନ , କବିସୂର୍ଯ୍ୟ ନଗର ଥାନା ପଥରାପଲ୍ଲୀ ଗ୍ରାମର ବୁଲୁ ପାତ୍ର ଏବଂ କ୍ରିଷ୍ଣା ପାତ୍ର , ବମକୋଇ ଗ୍ରାମର ଜେ . ପ୍ରକାଶ ଓ ଶେରଗଡ଼ ଥାନା ପରମାନନ୍ଦପୁର ଗ୍ରାମର ଗହଣା ବ୍ୟବସାୟୀ ମନୋଜ ପାଢ଼ୀ। ଥାନା ମାମଲା ନଂ.୨୭୩/୨୫ ଅନୁଯାୟୀ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବା ପରେ ଜାମିନ ଆବେଦନ ନାମଞ୍ଜୁର ହେବାରୁ ସେମାନଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ପୋଲିସ ଅଭିଯୁକ୍ତ ମାନଙ୍କ ନିକଟରୁ ୨୫୦ ଗ୍ରାମ ଓଜନର ସୁନା ଅଳଙ୍କାର , ନଗଦ ୧ ଲକ୍ଷ ୫୦ ହଜାର ଟଙ୍କା , ଘର ଗ୍ରିଲ ଭାଙ୍ଗିବା ନିମନ୍ତେ ବ୍ୟବହୃତ ସାମଗ୍ରୀ ଜବତ କରିଛି । ଗତ ୧ ତାରିଖ ବିଳମ୍ବିତ ରାତିରେ ଦିଗପହଣ୍ଡି ବ୍ଳକ ବଡଡୁମୁଳା ପଞ୍ଚାୟତ ସୁମନ୍ତପୁର ଗ୍ରାମର ପ୍ରହଲ୍ଲାଦ ପ୍ରଧାନଙ୍କ ଘରୁ ଏକ ବଡ଼ ଧରଣର ଚୋରି ହୋଇଥିବା ନେଇ ଥାନାରେ ଏତଲା ହୋଇଥିଲା । ପୋଲିସ ପ୍ରହଲ୍ଲାଦଙ୍କ ଏତଲାକୁ ଭିତ୍ତିକରି ତଦନ୍ତ ଆରମ୍ଭ କରିଥିଲା । ପୋଲିସ ଚୋରଙ୍କୁ ଧରିବା ପାଇଁ ଏକ ଟିମ ଗଠନ କରି ବିଭିନ୍ନ ସନ୍ଦିଗ୍ଧ ସ୍ଥାନରେ ଚଢାଉ କରି ଆସୁଥିଲା । ପୋଲିସ ଚୋରି ହୋଇଥିବା ପ୍ରହଲ୍ଲାଦଙ୍କ ମୋବାଇଲକୁ ଟ୍ରାକିଂ କରି ବୁଧବାର ରାତିରେ କେ.ନୂଆଗାଁ ଥାନା ଦେଖାଳି ଗ୍ରାମରୁ ଅଭିଯୁକ୍ତ ମାନଙ୍କୁ କାବୁ କରିଥିଲା । ଏହାପରେ ସେମାନଙ୍କୁ ଥାନାରେ ରଖି ଜେରା କରିବା ପରେ ସେମାନେ ଗତ କିଛିଦିନ ଧରି ଦିଗପହଣ୍ଡି ଥାନା ସୁମନ୍ତପୁର , ବାଗଡା , ଗୋଲଣ୍ଡା ଗ୍ରାମ ସମେତ କେ . ନୂଆଗାଁ ଥାନା ଅର୍ନ୍ତଗତ ପରସମା , ଡଭାର , ଚନ୍ଦନପୁର , କୃଷ୍ଣପୁର ଏବଂ ବଡପଲଙ୍କ ଗ୍ରାମରୁ ସୁନା ଚୋରି କରିବା ସହ ଆସିକାରେ ସୁନା ଦୋକାନ କରିଥିବା ମନୋଜଙ୍କୁ ସବୁ ସୁନା ବିକ୍ରି କରି ଦେଇଥିବା କହିଥିଲେ । ଏହାପରେ ପୋଲିସ ଗହଣା ବ୍ୟବସାୟୀ ମନୋଜଙ୍କୁ ମଧ୍ୟ ଗିରଫ କରି ଜେରା କରିବା ପରେ ସେ ପୋଲିସ ନିକଟରେ ଚୋରି ସୁନାକୁ କିଣିଥିବା ସ୍ବୀକାର କରିଥିଲେ । ପୂର୍ବରୁ ସମସ୍ତ ଅଭିଯୁକ୍ତଙ୍କ ନାମରେ ଦିଗପହଣ୍ଡି ଓ କେ . ନୂଆଗାଁ ଥାନାରେ ୧୦ ରୁ ଉଦ୍ଧର୍ବ ଚୋରି ମାମଲା ଥିବା ପ୍ରାଥମିକ ତଦନ୍ତରୁ ସୂଚନା ମିଳିଥିବା ଭାରପ୍ରାପ୍ତ ଥାନା ଆଇଆଇସି ତଥା ଡିଏସପି ପ୍ରଶାନ୍ତ କୁମାର ପାତ୍ର ସୂଚନା ଦେଇଛନ୍ତି ।
