କେନ୍ଦୁଝର,୯ା୩(ସ୍ବ.ପ୍ର.): ଆସନ୍ତାକାଲି ଅର୍ଥାତ୍ ମାର୍ଚ୍ଚ ୧୦ରେ ଆରମ୍ଭ ହେବାକୁ ଥିବା ଦଶମ ଶ୍ରେଣୀ ବୋର୍ଡ ପରୀକ୍ଷାରେ କେନ୍ଦୁଝର ଜିଲାର ୧୪୨ଟି ପରୀକ୍ଷା କେନ୍ଦ୍ରରେ ୨୩,୨୧୬ ଛାତ୍ରୀଛାତ୍ର ପରୀକ୍ଷା ଦେବେ ବୋଲି ଜଣାପଡ଼ିଛି। ୨୪ଟି ପରୀକ୍ଷା କେନ୍ଦ୍ରକୁ ସମ୍ବେଦନଶୀଳ କେନ୍ଦ୍ର ଭାବେ ଚିହ୍ନଟ କରାଯାଇଛି। ୧୩୮ଟି ପରୀକ୍ଷାକେନ୍ଦ୍ରରେ ୪୭୧ଟି ବିଦ୍ୟାଳୟର ୨୩୦୩୭ ଜଣ ରେଗୁଲାର, ୨ଟି ପରୀକ୍ଷା କେନ୍ଦ୍ରରେ ୬୧ଜଣ ପତ୍ରବିନିମୟ,୨ଟି ପରୀକ୍ଷା କେନ୍ଦ୍ରରେ ରାଜ୍ୟମୁକ୍ତ ବିଦ୍ୟାଳୟ(ଏସ୍ଓଏସସି୍)୧୧୮ ଛାତ୍ରୀଛାତ୍ର ପରୀକ୍ଷା ଦେବେ। ତ୍ରୁଟିଶୂନ୍ୟ ପରୀକ୍ଷା ପରିଚାଳନା ଉପରେ ଗୁରୁତ୍ୱ ଦିଆଯାଇଛି। ପରୀକ୍ଷା ହଲ୍କୁ ଯାଉଥିବା ଛାତ୍ରୀଛାତ୍ର ଏବଂ ପରୀକ୍ଷା ପରିଚାଳନା ସହ ସଂପୃକ୍ତ ବ୍ୟକ୍ତିଙ୍କୁ ଭଲ ଭାବେ ଯାଞ୍ଚ କରି କେନ୍ଦ୍ର ମଧ୍ୟକୁ ଛାଡ଼ିବାକୁ ନିର୍ଦ୍ଦେଶ ଦେଇଛନ୍ତି। ସମସ୍ତ ପରୀକ୍ଷା କେନ୍ଦ୍ର ନିମନ୍ତେ ଆବଶ୍ୟକ ପର୍ଯ୍ୟବେକ୍ଷକ ୩୫ଜଣଙ୍କୁ ନିଯୁକ୍ତି ଦିଆଯାଇଛି ବୋଲି ଜିଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ସେଠୀ ପ୍ରକାଶ କରିଛନ୍ତି। ଜିଲାସ୍ତରରେ ୩ଟି ଫ୍ଲାଇଂ ସ୍କ୍ବାଡ ଏବଂ ମାଧ୍ୟମିକ ଶିକ୍ଷା ପରିଷଦ,କଟକ ପକ୍ଷରୁ ଗୋଟିଏ ଫ୍ଲାଇଂ ସ୍କ୍ବାଡ ମୁତୟନ ରହିବେ। ପ୍ରଶ୍ନପତ୍ର ଏବଂ ଉତ୍ତର ଖାତା ରହୁଥିବା ଷ୍ଟ୍ରଙ୍ଗ ରୁମରେ ୨୪ ଘଣ୍ଟିଆ କଡ଼ା ନିରାପତ୍ତା,ପରୀକ୍ଷା କେନ୍ଦ୍ରରେ ପୋଲିସ ମୁତୟନ,ବିଦ୍ୟୁତ୍ ଓ ପିଇବା ପାଣି ବ୍ୟବସ୍ଥା ସହ ପରୀକ୍ଷା ପରିଚାଳନାରେ ବାଧା ସୃଷ୍ଟି କଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି। ଚଳିତବର୍ଷ ୧୧ଟି ନୋଡାଲ ପରୀକ୍ଷା କେନ୍ଦ୍ର କରାଯାଇଥିବା ସୂଚନା ମିଳିଛି। ପରୀକ୍ଷା ସୁପରିଚାଳନା ପାଇଁ ୩୯ଟି ଡେସପାଚ୍ ଟିମ୍ ଗଠନ କରାଯାଇଥିବା ଜଣାପଡ଼ିଛି। ନୋଡାଲ ସେଣ୍ଟରଗୁଡିକ ମଧ୍ୟରେ ଆନନ୍ଦପୁର ଓ ଘସିପୁରା ବ୍ଲକ ପାଇଁ ବିଏନ୍ ଉଚ୍ଚ ବିଦ୍ୟାଳୟ ଆନନ୍ଦପୁର,ହାଟଡିହୀ ପାଇଁ ହାଟଡିହୀ ଉଚ୍ଚ ବିଦ୍ୟାଳୟ,ଚମ୍ପୁଆ ବ୍ଲକ ପାଇଁ ମହତାବ ଉଚ୍ଚ ବିଦ୍ୟାଳୟ ଚମ୍ପୁଆ,ଝୁମ୍ପୁରା ପାଇଁ ଝୁମ୍ପୁରା ସରକାରୀ ଉଚ୍ଚ ବିଦ୍ୟାଳୟ,ଯୋଡ଼ା ପାଇଁ ବନେଇକଳା ଉଚ୍ଚ ବିଦ୍ୟାଳୟ, ଘଟଗାଁ ବ୍ଲକ ପାଇଁ ତାରିଣୀ ବାଳିକା ଉଚ୍ଚ ବିଦ୍ୟାଳୟ,ଘଟଗାଁ, ହରିଚନ୍ଦନପୁର ବ୍ଲକ ପାଇଁ ହରିଚନ୍ଦନପୁର ଉଚ୍ଚ ବିଦ୍ୟାଳୟ,କେନ୍ଦୁଝର ସଦର ଓ ବାଂଶପାଳ ବ୍ଲକ ପାଇଁ ଧନୁର୍ଜୟନାରାୟଣ ଉଚ୍ଚ ବିଦ୍ୟାଳୟ,ପାଟଣା ବ୍ଲକ ପାଇଁ ଜିଏନ୍ ଉଚ୍ଚ ବିଦ୍ୟାଳୟ ସ୍ବାମପାଟଣା,ସାହାରପଡ଼ା ବ୍ଲକ ପାଇଁ ସାହାରପଡ଼ା ହାଇସ୍କୁଲ ଏବଂ ତେଲକୋଇ ବ୍ଲକ ପାଇଁ ତେଲକୋଇ ଉଚ୍ଚ ବିଦ୍ୟାଳୟକୁ ନୋଡାଲ ସେଣ୍ଟର କରାଯାଇଛି। ଏହା ବ୍ୟତୀତ ମଧ୍ୟମା ପରୀକ୍ଷା ପାଇଁ ଆନନ୍ଦପୁର ବିଏନ୍ ହାଇସ୍କୁଲ ଏବଂ ହାଟଡିହୀ ହାଇସ୍କୁଲ ପରୀକ୍ଷା କେନ୍ଦ୍ର କରାଯାଇଥିବା ବେଳେ ରାଜ୍ୟ ମୁକ୍ତ ବିଦ୍ୟାଳୟ (ଏସ୍ଓଏସ୍ସି) ପରୀକ୍ଷା କେନ୍ଦ୍ର ପାଇଁ ଯୋଡ଼ା ବ୍ଲକର ବନେଇକଳା ହାଇସ୍କୁୁଲ ଏବଂ କେନ୍ଦୁଝର ଡିଏନ୍ ହାଇସ୍କୁଲ ପରୀକ୍ଷା କେନ୍ଦ୍ର କରାଯାଇଥିବା ସୂଚନା ମିଳିଛି। ଚଳିତବର୍ଷ ମାଟ୍ରିକ୍ ପରୀକ୍ଷାକୁ ଅବାଧ ଓ ମୁକ୍ତ ପାଇଁ ଜିଲା ପ୍ରଶାସନ ତରଫରୁ ବ୍ୟାପକ ବ୍ୟବସ୍ଥା ହାତକୁ ନିଆଯାଇଥିବା ବେଳେ ପୋଲିସ ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।
