ନୂଆଦିଲ୍ଲୀ,୧୩।୧୦: ଦେଶର ପ୍ରମୁଖ ୩ ତୈଳ ବିପଣନକାରୀ କମ୍ପାନୀକୁ କେନ୍ଦ୍ର ସରକାର ଏକକାଳନୀ ୨୨ ହଜାର କୋଟି ଟଙ୍କାର ଅନୁଦାନ ପ୍ରଦାନ ପାଇଁ ଘୋଷଣା କରିଛନ୍ତି। ଏପରିକି ଗତ ୨ ବର୍ଷ ମଧ୍ୟରେ ଘରୋଇ ରନ୍ଧନ ଗ୍ୟାସ୍ ଏଲ୍ପିଜି ବିକ୍ରିରେ ହୋଇଥିବା ବ୍ୟାପକ କ୍ଷତିର ଭରଣା ପାଇଁ ବୁଧବାର କେନ୍ଦ୍ର କ୍ୟାବିନେଟ୍ରେ ସରକାର ଏଭଳି ନିଷ୍ପତ୍ତି ନେଇଥିବା ଜଣାପଡ଼ିଛି। ବିଶେଷକରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ବସିଥିବା କେନ୍ଦ୍ର କ୍ୟାବିନେଟ୍ ବୈଠକରେ ଦେଶର ୩ ପ୍ରମୁଖ ତୈଳ ମାର୍କେଟିଂ କମ୍ପାନୀ ଯଥା ଭାରତୀୟ ତୈଳ ନିଗମ ଲିମିଟେଡ୍ (ଆଇଓସିଏଲ୍), ଭାରତ ପେଟ୍ରୋଲିୟମ କର୍ପୋରେଶନ ଲିମିଟେଡ୍ (ବିପିସିଏଲ୍) ଏବଂ ହିନ୍ଦୁସ୍ଥାନ ପେଟ୍ରୋଲିୟମ କର୍ପୋରେଶନ ଲିମିଟେଡ୍ (ଏଚ୍ପିସିଏଲ୍)କୁ ଏକକାଳୀନ ଏତେ ପରିମାଣର ଅନୁଦାନକୁ କେନ୍ଦ୍ର କ୍ୟାବିନେଟର ମଞ୍ଜୁରୀ ମିଳିଛି ବୋଲି ମନ୍ତ୍ରୀ ଅନୁରାଗ ଠାକୁର ମତବ୍ୟକ୍ତ କରିଛନ୍ତି। ସେହିଭଳି ୩ଟି ରାଷ୍ଟ୍ରାୟତ୍ତ ଇନ୍ଧନ ଖୁଚୁରା ବ୍ୟବସାୟୀଙ୍କୁ ୨୨,୦୦୦ କୋଟି ଟଙ୍କା ଏକକାଳୀନ ଅନୁଦାନ ପ୍ରଦାନ କରାଯିବ ବୋଲି ଜଣାପଡ଼ିଛି।
ସୂଚନାଯୋଗ୍ୟ, ୨୦୨୦ ଜୁନ୍ରୁ ୨୦୨୨ ଜୁନ୍ ପର୍ଯ୍ୟନ୍ତ ଉକ୍ତ ତୈଳ କମ୍ପାନୀଗୁଡ଼ିକ ଗ୍ରାହକଙ୍କୁ ଏଲ୍ପିଜି ବିକ୍ରୟ ମୂଲ୍ୟରେ କରିଥିବା କ୍ଷତି ପୂରଣ ପାଇଁ ଏହି ଅନୁଦାନ ପ୍ରଦାନ କରାଯାଉଛି। ଏହି ତିନୋଟି ସଂସ୍ଥା ଗ୍ରାହକଙ୍କୁ ସରକାରୀ ନିୟନ୍ତ୍ରିତ ମୂଲ୍ୟରେ ଘରୋଇ ଏଲ୍ପିଜି ବିକ୍ରି କରିଛନ୍ତି। ଏପରିକି ଜୁନ୍ ୨୦୨୦ ରୁ ୨୦୨୨ ମଧ୍ୟରେ ଏଲ୍ପିଜିର ଅନ୍ତର୍ଜାତୀୟ ମୂଲ୍ୟ ପ୍ରାୟ ୩୦୦% ବୃଦ୍ଧି ପାଇଛି।
ସେହିପରି ଅନ୍ତର୍ଜାତୀୟ ଏଲ୍ପିଜି ମୂଲ୍ୟରେ ପରିବର୍ତ୍ତନରୁ ଗ୍ରାହକଙ୍କୁ ଅଲଗା କରିବା ପାଇଁ ମୂଲ୍ୟ ବୃଦ୍ଧି ଘରୋଇ ଏଲ୍ପିଜି ଗ୍ରାହକଙ୍କୁ ସମ୍ପୂର୍ଣ୍ଣ ରୂପେ ପ୍ରଦାନ କରାଯାଇ ନାହିଁ ବୋଲି ଏକ ସରକାରୀ ବିବୃତିରେ କୁହାଯାଇଛି। ତଦନୁସାରେ ଏହି ସମୟ ମଧ୍ୟରେ ଘରୋଇ ଏଲ୍ପିଜି ମୂଲ୍ୟ ମାତ୍ର ୭୨% ବୃଦ୍ଧି ପାଇଛି ବୋଲି ସରକାରଙ୍କ ପକ୍ଷରୁ କୁହାଯାଇଛି। ଏଥିରେ କୁହାଯାଇଛି, ଏହି କ୍ଷତି ସତ୍ତ୍ୱେ ୩ ଟି ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀ (ପିଏସ୍ୟୁ ଓଏମ୍ସି) ଦେଶରେ ଏହି ଅତ୍ୟାବଶ୍ୟକ ରନ୍ଧନ ଇନ୍ଧନର ନିରନ୍ତର ଯୋଗାଣ ସୁନିଶ୍ଚିତ କରିଛନ୍ତି।
