ଭୁବନେଶ୍ୱର, ୧୨ା୪ (ସ୍ପୋଟର୍ସ ବ୍ୟୁରୋ): ହକି ପ୍ରତି ରହିଥିବା ଭଲପାଇବା ପାଇଁ ଓଡ଼ିଶାରେ ଆଉ ୨୨ଟି ହକି ପ୍ରଶିକ୍ଷଣ ସେଣ୍ଟର(ଏଚ୍ଟିସି) ସ୍ଥାପନ କରାଯାଇଛି। ତୃଣମୂଳ ସ୍ତରରୁ ହକିର ବିକାଶ ପାଇଁ ରାଜ୍ୟ ସରକାରଙ୍କ କ୍ରୀଡା ଓ ଯୁବ ବ୍ୟାପାର ବିଭାଗ ପକ୍ଷରୁ ଏହି ପଦକ୍ଷେପ ନିଆଯାଇଛି। ଓଡ଼ିଶା ନାଭାଲ ଟାଟା ହକି ହାଇପରଫର୍ମାନ୍ସ ସେଣ୍ଟର ଓ କ୍ରୀଡା ଓ ଯୁବବ୍ୟାପାରର ମିଳିତ ଉଦ୍ୟମରେ ଏହି ସେଣ୍ଟରଗୁଡିକ ସ୍ଥାପନ ହୋଇଛି। ତୃଣମୂଳ ସ୍ତରରୁ ପ୍ରତିଭା ଚିହ୍ନଟ ସହିତ ସେମାନଙ୍କୁ ସୁଯୋଗ ପ୍ରଦାନ କରିବା ପାଇଁ ଏହି ବ୍ୟବସ୍ଥା ଆରମ୍ଭ କରାଯାଇଛି। ସୁନ୍ଦରଗଡରେ ରହିଥିବା କାର୍ଯ୍ୟକ୍ଷମ ଟର୍ଫଗୁଡିକ ମଧ୍ୟରେ ବୋଣାଇ, ଟାଙ୍ଗରପଲ୍ଲୀ, ବାରଗାଓଁ, ବିର୍ସା, ଲହୁଣୀପଡା, ଲାଠିକଟା, ଲେଫ୍ରିପଡା, ସବ୍ଡେଗା, ବାଲିଶଙ୍କରା-ତିଲେଇକାନି, ବାଲିଶଙ୍କରା-ସୋନାମାରା, ନୂଆଗାଁ, କୁତ୍ରା, ଗୁରୁଣ୍ଡିଆ, କୁଅଁାରମୁଣ୍ଡା, କୁକୁଡା ଅନ୍ତର୍ଭୁକ୍ତ। ଅନ୍ୟ ସହରଗୁଡିକ ମଧ୍ୟରେ ଯାଜପୁରରେ ଯାଜପୁର ଟାଉନ୍, ସମ୍ବଲପୁରରେ ଯୁଯୁମୁରା ଓ ଗଞ୍ଜାମର ଛତ୍ରପୁରରେ କାର୍ଯ୍ୟକ୍ଷମ ଟର୍ଫ ରହିଛି। ରାଜ୍ୟର ଅନ୍ୟ ୪ଟି ସ୍ଥାନରେ ନୂତନ ଟର୍ଫ ବିଛାଯିବାର କାର୍ଯ୍ୟକ୍ରମ ରହିଛି। ବର୍ତ୍ତମାନ ୧୮ଟି ସ୍ଥାନରେ କାର୍ଯ୍ୟକ୍ଷମ ଟର୍ଫ ରହିଥିବା ବେଳେ ଏଥିରେ ୧୩୦୦ରୁ ଅଧିକ ଖେଳାଳି ପ୍ରଶିକ୍ଷଣ ଗ୍ରହଣ କରୁଛନ୍ତି। ଏଣିକି ପ୍ରତ୍ୟେକ ଏଚ୍ଟିସିରେ ଦୁଇ ଜଣ ପ୍ରଶିକ୍ଷକଙ୍କୁ ନିଯୁକ୍ତି ପ୍ରଦାନ କରାଯିବ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସୁନ୍ଦରଗଡ ଗସ୍ତ ସମୟରେ ଜିଲାରେ କ୍ରୀଡା ଭିତ୍ତିଭୂମିର ଉନ୍ନତି ସମ୍ପର୍କରେ ଆଲୋଚନା ହୋଇଥିଲା। ସ୍ଥାନୀୟ ଖେଳାଳିଙ୍କୁ ଉନ୍ନତ ଭିତ୍ତିଭୂମି, ପ୍ରଶିକ୍ଷଣ ଓ ସୁଯୋଗ ମିଳିଲେ ଯୁବ ପିଢି କ୍ରୀଡାରେ ଆଗକୁ ଅଗ୍ରସର ହୋଇ ପାରିବେ ବୋଲି କହିଥିଲେ। ଏହାପରେ କ୍ରୀଡା ଓ ଯୁବ ବ୍ୟାପାର ବିଭାଗ ପକ୍ଷରୁ ଓଡ଼ିଶା ନାଭାଲ ଟାଟା ହକି ହାଇପରଫର୍ମାନ୍ସ ସେଣ୍ଟର ସହାୟତାରେ ଏଚ୍ଟିସି ଆରମ୍ଭ କରାଯାଇଛି। ଏହି ପ୍ରୋଜେକ୍ଟରେ ନିଯୁକ୍ତ କୋଚ୍ମାନେ ହକି ଓଡ଼ିଶା ନିର୍ଦ୍ଦେଶକ ଡେଭିଡ୍ ଜନଙ୍କ ସହିତ ପ୍ରଶିକ୍ଷଣ ଆରମ୍ଭ କରିଛନ୍ତି। ଏହି ପ୍ରକଳ୍ପ ଆରମ୍ଭ ହେବା ପରେ ପ୍ରତି ସପ୍ତାହରେ କ୍ଲବ୍ ସ୍ତରୀୟ ଟୁର୍ନାମେଣ୍ଟ ଆୟୋଜନ କରାଯିବ। ଆମେରିକା, ଅଷ୍ଟ୍ରେଲିଆ ଓ ୟୁକେରେ ସମାନ ଢଙ୍ଗରେ ଟୁର୍ନାମେଣ୍ଟ ଖେଳାଯାଏ। ବିଦେଶରେ ସଫଳ ଏହି ମଡେଲର ଫାଇଦା ତୃଣମୂଳ ସ୍ତରରୁ କ୍ରୀଡାବିତ୍ଙ୍କୁ ମଧ୍ୟ ମିଳିବ ବୋଲି ଓଡ଼ିଶା ନାଭାଲ ଟାଟା ହକି ହାଇପରଫର୍ମାନ୍ସ ସେଣ୍ଟର ପ୍ରକଳ୍ପ ନିର୍ଦ୍ଦେଶକ ରାଜୀବ ସେଠ କହିଛନ୍ତି। ଏହା ସହିତ ତୃଣମୂଳ ସ୍ତରରୁ କୋଚ୍ମାନଙ୍କ ପାଇଁ ମଧ୍ୟ ଏହା ଏକ ସୁଯୋଗ ସୃଷ୍ଟି କରିବ ବୋଲି ସେ କହିଛନ୍ତି। ଏହି ଇଭେଣ୍ଟରେ ସମସ୍ତ ସ୍କୁଲ, କମ୍ୟୁନିଟି ଓ ଜିଲାଗୁଡିକୁ ସାମିଲ ହେବାକୁ ଆହ୍ବାନ ଦିଆଯାଇଛି। ସ୍ଥାନୀୟ ପ୍ରତିଭାମାନଙ୍କୁ ଆଗକୁ ବଢିବାର ସୁଯୋଗ ଦେବାପାଇଁ ଏହି ବ୍ୟବସ୍ଥା ଆରମ୍ଭ କରାଯାଇଥିବା ସେ କହିଛନ୍ତି।
