କାନପୁର,୧।୧୦ : ଉତ୍ତରପ୍ରଦେଶ କାନପୁରରେ ଶ୍ରଦ୍ଧାଳୁଙ୍କୁ ନେଇ ଯାଉଥିବା ଏକ ଟ୍ରାକ୍ଟର ଟ୍ରଲି ଓଲଟି ୨୨ ଜଣଙ୍କ ମୃତ୍ୟୁ ଘଟିଛି। କାନପୁରର ଘାଟମପୁରର ଭିତରଗାଁରେ ଏହି ଅଭାବନୀୟ ଘଟଣା ଘଟିଛି। ଏହି ଦୁର୍ଘଟଣାରେ ବହୁଲୋକ ଆହତ ହୋଇଛନ୍ତି। ଆହତଙ୍କୁ ଉଦ୍ଧାର କରି ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ଟ୍ରାକ୍ଟର ଟ୍ରଲି ନିୟନ୍ତ୍ରଣ ହରାଇ ଓଲଟି ପଡ଼ିଥିବା ପୋଲିସ ପକ୍ଷରୁ କୁହାଯାଇଛି।
କୋରଥା ଗାଁର ଲୋକେ ଏକ ମୁଣ୍ଡନ ସଂସ୍କାରରେ ଯୋଗଦେବା ପାଇଁ ଫତେହପୁର ଯାଇଥିଲେ। ଫେରୁଥିବା ସମୟରେ ଟ୍ରାକ୍ଟର ଟ୍ରଲି ଓଲଟି ପାଣିରେ ଖସି ପଡ଼ିଥିଲା। ଟ୍ରାକ୍ଟର ଟ୍ରଲି ପାଣିରେ ବୁଡ଼ି ଯିବାରୁ ଅଧିକାଂଶ ଲୋକଙ୍କ ମୃତ୍ୟୁ ଘଟିଛି।
ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଜାରି ରହିଛି। ଏଥିରେ ୧୫ ଆମ୍ବୁଲାନ୍ସକୁ ନିୟୋଜିତ କରାଯାଇଛି। ମୃତକଙ୍କ ମଧ୍ୟରେ ମହିଳା ଏବଂ ଶିଶୁ ରହିଛନ୍ତି। ଟ୍ରାକ୍ଟର ଟ୍ରଲିରେ ୫୦ ଲୋକ ଯାତ୍ରା କରୁଥିବା କୁହାଯାଉଛି।
