ଆଚରଣଗତ ପରିବର୍ତ୍ତନ ପାଇଁ ନିୟୋଜିତ ୨୧୬୮ ସ୍ବଚ୍ଛସାଥୀ
9:17 amMarch 17, 2021March 17, 2021 / 43

ଭୁବନେଶ୍ୱର,୧୭ା୩(ବ୍ୟୁରୋ): ସହରାଞ୍ଚଳରେ ପରିମଳ ପରିଚାଳନା ବିଶେଷକରି କଠିନ ବର୍ଜ୍ୟବସ୍ତୁ ପରିଚାଳନା ନିମେନ୍ତ ରାଜ୍ୟ ସରକାର ପ୍ରତିଶୃତିବଦ୍ଧ। ସହରରେ ଥିବା ପ୍ରତିଟି ଘରୁ, ଦୋକାନ ବଜାର, ଅନୁଷ୍ଠାନ,ପ୍ରତିଷ୍ଠାନ ଆଦିରୁ ଓଦା ଏବଂ ଶୁଖିଲା ବର୍ଜ୍ୟବସ୍ତୁ ଅଲଗା ଅଲଗା ଭାବେ ସଂଗ୍ରହ ଉପରେ ଗୁରୁତ୍ୱ ଦିଆଯାଉଛି। ବର୍ତ୍ତମାନ ୨,୧୬୮ ସ୍ବଚ୍ଛସାଥି ଏବଂ ୪୮୬ ଜଣ ସ୍ବଚ୍ଛ ସୁପରଭାଇଜର ରାଜ୍ୟର ୧୧୪ଟି ପୈାରସଂସ୍ଥାରେ ପରିମଳ କାର୍ଯ୍ୟରତ ଅଛନ୍ତି। ଏ ପର୍ଯ୍ୟନ୍ତ ବିଭିନ୍ନ ପୈାରସଂସ୍ଥାରେ ୧୬୫ଟି ମେଇକ୍ରୋ କାମ୍ପୋଷ୍ଟିଙ୍ଗ ସେଣ୍ଟର ଏବଂ ୧୪୦ଟି ମ୍ୟାଟେରିଆଲ ରିକଭରୀ ଫ୍ୟାସିଲିଟି ସେଣ୍ଟର କାର୍ଯ୍ୟକ୍ଷମ ହୋଇଛି। ମିଶନ ଶକ୍ତି ସ୍ବୟଂ ସହାୟକ ଦଳ ତରଫରୁ ୪ ଜଣ ସ୍ବଚ୍ଛ ସାଥୀଙ୍କ ପାଇଁ ଜଣେ ସ୍ବଚ୍ଛ ସୁପରଭାଇଜର ନିୟୋଜିତ ହୋଇଛନ୍ତି। ଯେଉଁମାନେ ଲୋକଙ୍କ ମଧ୍ୟରେ ଆଚରଣଗତ ପରିବର୍ତ୍ତନ ଆଣିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।
ମିଶନ ଶକ୍ତି ସ୍ବୟଂ ସହାୟକ ଗୋଷ୍ଠୀଙ୍କ ଦ୍ୱାରା ମନୋନୀତ ସ୍ବଚ୍ଛ କର୍ମୀ ବ୍ୟାଟେରୀ ଚାଳିତ ଅଳିଆ ସଂଗ୍ରହ ଗାଡ଼ି ସହାୟତାରେ ଅଳିଆ ସଂଗ୍ରହ କରୁଛନ୍ତି । ଅଳିଆ ଅଲଗା ହୋଇ ସଂଗ୍ରହ ହେବାପରେ ‘ସମ୍ପଦ କେନ୍ଦ୍ର’ କୁ ନିଆଯାଇ ସେଠାରେ ଓଦା ଅଳିଆ ମେଇକ୍ରୋ କାମ୍ପୋଷ୍ଟିଙ୍ଗ ସେଣ୍ଟର ଏବଂ ଶୁଖିଲା ଅଳିଆ ମ୍ୟାଟେରିଆଲ ରିକଭରୀ ଫ୍ୟାସିଲିଟିରେ ପ୍ରକ୍ରିୟାକରଣ କରାଯାଉଛି । ମାଇକ୍ରୋ କାମ୍ପୋଷ୍ଟିଙ୍ଗ ସେଣ୍ଟରରେ ଓଦା ଅଳିଆ ପ୍ରକ୍ରିୟାକରଣ ହୋଇ ମୋ ଖତ (ଜୈବିକଖତ) ପ୍ରସ୍ତୁତ ହେଉଛି । ”ମୋ ଖତ ବିକ୍ରୟ କାଉଣ୍ଟର“ ଏବଂ ମାଇକ୍ରୋ କମ୍ପୋଷ୍ଟିଙ୍ଗ ସେଣ୍ଟରରେ କିଲୋଗ୍ରାମ ପ୍ରତି ୨୦ ଟଙ୍କାରେ ବିକ୍ରି ହେଉଛି ଓ ଏହାର ଅନେକ ଚାହିଦା ରହିଛି । ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ, ମହିଳା ଏବଂ କିନ୍ନରଙ୍କ ଦକ୍ଷତାକୁ ସ୍ବୀକୃତି ଦେଇ, ସେ ବର୍ଜ୍ୟବସ୍ତୁ ସଂଗ୍ରହ ହେଉ ଅବା ସମ୍ପଦ କେନ୍ଦ୍ରର ପରିଚାଳନା ସବୁଥିରେ ସେମାନଙ୍କର ଭାଗିଦାରୀତା ନିଶ୍ଚିତ କରିଛନ୍ତି। ଏତଦ୍‌ ବ୍ୟତୀତ ଗୋଷ୍ଠୀ ସଂଗଠନ, ବଜାର ସମିତିିଙ୍କ ବର୍ଜ୍ୟ ବସ୍ତୁ ପରିଚାଳନାରେ ସକ୍ରିୟ ଅଂଶଗ୍ରହଣ ରାଜ୍ୟ ସରକାରଙ୍କ ଏହି ପ୍ରୟାସକୁ ଆହୁରି ସୁଦୃଢ କରିଛି ବୋଲି ପୌର ପ୍ରଶାସନ ନିର୍ଦ୍ଦେଶକଙ୍କ ସଂଗ୍ରାମଜିତ ନାୟକ କହିଛନ୍ତି ।
ରାଜ୍ୟର ସହରାଞ୍ଚଳକୁ ସ୍ବଚ୍ଛ ଓ ସୁନ୍ଦର ରଖିବାର ପ୍ରୟାସକୁ ମଧ୍ୟ ଅନେକ ସ୍ବୀକୃତି ମିଳିଛି। କେନ୍ଦ୍ର ସରକାରଙ୍କ ଦ୍ୱାରା ହେଉଥିବା ପରିମଳ ”ସ୍ବଚ୍ଛସର୍ବେକ୍ଷଣ-୨୦୨୦’ରେ ଓଡିଶା ଦୁଇଟି ଜାତୀୟ ପୁରସ୍କାର ସହିତ ପୈାରସଂସ୍ଥାଗୁଡିକର ଭଲପ୍ରଦର୍ଶନ ଗୌରବ ଆଣିଦେଇଛି। ଓଡ଼ିଶାକୁ ‘ଦ୍ରୁତଗାମୀ ରାଜ୍ୟ’ ଓ ବ୍ରହ୍ମପୁର ମହାନଗର ନିଗମକୁ ଅଭିନବ କାର୍ଯ୍ୟକ୍ରମ ପାଇଁ ଶ୍ରେଷ୍ଠ ସହର ଭାବେ ପୁରସ୍କୃତ କରାଯାଇଛି। କୋଭିଡ଼ ସତ୍ୱେ କୋଭିଡ଼ ନିୟମସବୁକୁ କଡ଼ାକଡ଼ି ପାଳନ କରାଯାଇ ରାଜ୍ୟର ସମସ୍ତ ପୌରସଂସ୍ଥାରେ ଥିବା ସଫେଇ କର୍ମଚାରୀ, ସ୍ବଚ୍ଛ କର୍ମୀ, ସ୍ବଚ୍ଛ ସାଥୀ, ସ୍ବଚ୍ଛସୁପରଭାଇଜର ଏବଂ ପରିମଳରେ ନିୟୋଜିତ କର୍ମଚାରୀଙ୍କୁ ତାଲିମ ଦିଆଯାଇଥିଲା । ୩ଟି ପର୍ଯ୍ୟାୟରେ ୧୧୪ଟି ପୈାରସଂସ୍ଥାରେ ୩୩୬୦୬ ଜଣ ତାଲିମ ପାଇଥିଲେ । ଏହା ପୂର୍ବରୁ ପୌରସଂସ୍ଥାରେ ତାଲିମ ଦେବାକୁ ଥିବା ତାଲିମଦାତାଙ୍କ ଭିଡ଼ିଓ କନଫରେନସିଂ ମାଧ୍ୟମରେ ବିଭାଗ ତରଫରୁ ପ୍ରଦାନ କରାଯାଇଥିଲା ।”ସ୍ବଚ୍ଛ ଓଡ଼ିଶା ସୁସ୍ଥ ଓଡ଼ିଶା“ ଗଢିବା ଲକ୍ଷ୍ୟରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ମୁଖ୍ୟମନ୍ତ୍ରୀଙ୍କ ସୁଦୁର ପ୍ରସାରୀ ଦଗ୍‌ଦର୍ଶନ ଓ ନିର୍ଦ୍ଦେଶ କ୍ରମେ ଲୋକାଭିମୁଖୀ ଯୋଜନା ଏବଂ କାର୍ଯ୍ୟକ୍ରମ ହାତକୁ ନେଇଛି ବୋଲି ନିର୍ଦ୍ଦେଶକ କହିଛନ୍ତି।