ଅନୁଗୋଳ ଅଫିସ,୨୦ା୧୨: ଅନୁଗୋଳ ଜିଲା କ୍ରିକେଟ୍ ସଂଘ (ଏଡିସିଏ) ଚଳିତବର୍ଷ ରୌପ୍ୟ ଜୟନ୍ତୀ ପାଳନ କରିବ। ଏ ନେଇ ଆସନ୍ତା ବୁଧବାରଠାରୁ ସ୍ଥାନୀୟ କଦମ ପଡ଼ିଆରେ ରାଜ୍ୟସ୍ତରୀୟ ପ୍ରତିଯୋଗିତା ଆୟୋଜନ କରାଯିବ। ଏହି ଟୁର୍ନାମେଣ୍ଟରେ ରାଜ୍ୟ ଓ ରାଜ୍ୟ ବାହାରର ୮ଟି ଦଳ ଅଂଶ ଗ୍ରହଣ କରିବେ ବୋଲି ଏଡିସିଏ ପକ୍ଷରୁ ସଭାପତି ତଥା ଓସିଏ ଆପେକ୍ସ କାଉନସିଲ ସଦସ୍ୟ ପ୍ରତାପ ଚନ୍ଦ୍ର ପ୍ରଧାନ କଦମ ପଡ଼ିଆରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏହି ପ୍ରତିଯୋଗିତାର ଉଦ୍ଯାପନୀ ଉତ୍ସବରେ ବିଶ୍ୱକପ୍ ବିଜେତା ଭାରତୀୟ ଦଳର ପୂର୍ବତନ ଓପନର ଗୌତ୍ତମ ଗମ୍ଭୀର ଯୋଗଦେବାର କାର୍ଯ୍ୟକ୍ରମ ରହିଛି।
ସୂଚନା ଅନୁଯାୟୀ, ଅନୁଗୋଳ କଦମ ପଡ଼ିଆରେ ସର୍ବଭାରତୀୟ ଅନୁଗୋଳ କ୍ରିକେଟ୍ କପ୍ ଆସନ୍ତା ବୁଧବାର ଠାରୁ ଆରମ୍ଭ ହେବ। ଏହି ଟୁର୍ନାମେଣ୍ଟରେ ସମସ୍ତ ମ୍ୟାଚ୍ ଗୁଡ଼ିକ ଟି-୨୦ ଫର୍ମାଟ୍ରେ ଆୟୋଜନ କରାଯିବ। ଓଡ଼ିଶା ପୋଷ୍ଟାଲ, ସୋଲର କ୍ରିକେଟ୍ କ୍ଲବ, ୟୁନିୟନ୍ ସ୍ପୋର୍ଟିଂ, ଜାମସେଦ୍ପୁର ଇଲେଭେନ୍, ଅନୁଗୋଳ କ୍ରିକେଟ୍ କ୍ଲବ, କଲିକତା ରେଲୱେ, ରାଇଜିଂ ଷ୍ଟୁଡେଣ୍ଟ, ଏନ୍ସିଏ ଭିଲାଇ ଦଳ ଏଥିରେ ଅଂଶ ଗ୍ରହଣ କରିବେ। ଅନୁଗୋଳ ଜିଲା କ୍ରିକେଟ୍ ସଂଘର ରୌପ୍ୟ ଜୟନ୍ତୀ ଓ ଅନୁଗୋଳ ଜିଲାର ୩୦ ବର୍ଷ ପୂର୍ତ୍ତି ଅବସରରେ ଟୁର୍ନାମେଣ୍ଟକୁ ସ୍ମରଣୀୟ କରିବାକୁ ଆୟୋଜକଙ୍କ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି। ଏଥିସହ ଜିଲାର ବହୁ ବରିଷ୍ଠ ଖେଳାଳିଙ୍କ ସହ ରାଜ୍ୟ ସ୍ତରରେ ପ୍ରତିନିଧିତ୍ୱ କରିଥିବା ପ୍ରତିଭାବାନ ଖେଳାଳିଙ୍କୁ ଏହି ଅବସରରେ ସମ୍ମାନିତ କରାଯିବାର କାର୍ଯ୍ୟକ୍ରମ ରହିଛି। ଜିଲାରେ କିଭଳି ପ୍ରତାଭା ବାହାରିବେ ଓ ରାଜ୍ୟ ତଥା ଦେଶ ପାଇଁ ଖେଳିବେ ସେ ନେଇ ଏବେଠାରୁ ଖସଡ଼ା ପ୍ରସ୍ତୁତ କରାଯାଇଥିବା ସଭାପତି କହିଥିଲେ। ଆୟୋଜିତ ଖବରଦାତା ସମ୍ମିଳନୀରେ ସଂଘ ସମ୍ପାଦକ ସାଗରନାଥ ମିଶ୍ର ବରିଷ୍ଠ ସଦସ୍ୟ ଓ ଖେଳାଳିଙ୍କ ଜିଲା ସଂଘ ପ୍ରତି ରହିଥିବା ଅବଦାନ ବିଷୟରେ ସୂଚନା ଦେଇଥିଲେ। ବରିଷ୍ଠ ସଦସ୍ୟ ସେକ୍ ରଫିକ୍ ଅନୁଗୋଳ ଜିଲାରେ କ୍ରିକେଟ୍ ଖେଳକୁ ଆଗକୁ ନେବା ପାଇଁ ପଞ୍ଚାୟତ ସ୍ତରରେ ପ୍ରତିଭାବାନ ଖେଳାଳି ଖୋଜିବା ଉପରେ ଗୁରୁତ୍ୱ ଦେଇଥିଲେ। ଅନ୍ୟମାନଙ୍କ ମଧ୍ୟରେ ବରିଷ୍ଠ ଖେଳାଳି ତଥା ସଦସ୍ୟ ମାୟାଧର ମିଶ୍ର, ବରିଷ୍ଠ ସଦସ୍ୟ ଶିବ ରାଉତ, ଉପସଭାପତି ପ୍ରଭାତ କୁମାର ସିହ୍ନା, ଉପସଭାପତି ଅରୁଣ କୁମାର ପୁଷ୍ପାଳକ, ଯୁଗ୍ମ ସମ୍ପାଦକ ଗଙ୍ଗାଧର ପଟ୍ଟନାୟକ, ସଦସ୍ୟ ବୀରେନ ସାମଲ ଓ ଜଗଦୀଶ ସିଂହ, ଦୀପକ ସାହୁ, ଜୟକୃଷ୍ଣ ରାଉତ ଓ ଉତ୍ାନପାଦ ମହାପାତ୍ର ପ୍ରମୁଖ ଉପସ୍ଥିତ ଥିଲେ।
