ନ୍ୟୁୟର୍କ,୧୯ା୯:ଗ୍ଲୋବାଲ ଓ୍ବାର୍ମିଂ ଯୋଗୁ ସାରା ବିଶ୍ୱରେ ଏବେ ଜଳବାୟୁ ପରିବର୍ତ୍ତନ ଘଟିବାରେ ଲାଗିଛି। ପରିଣାମ ସ୍ବରୂପ ଅନିୟମିତ ବର୍ଷା ହେଉଥିବାବେଳେ ସ୍ବାଭାବକ ଠାରୁ ଅଧିକ ଗ୍ରୀଷ୍ମ ପ୍ରବାହ ଅନୁଭୂତ ହେଉଛି। ଏହି ସ୍ଥିତି ଜାରି ରହିଲେ ଆଗାମୀ ଦିନରେ ପରିସ୍ଥିତି ଅଧିକ ଜଟିଳ ହେବ ବୋଲି ନାସା ପକ୍ଷରୁ କୁହାଯାଇଛି। ୧୮୮୦ ପରେ ୨୦୨୩ ହେଉଛି ସବୁଠୁ ଉତ୍ତପ୍ତ ବର୍ଷ। ପ୍ରାୟ ୧୪୩ ବର୍ଷ ପରେ ଚଳିତ ବର୍ଷ ଗ୍ରୀଷ୍ମଋତୁରେ ପ୍ରବଳ ଗରମ ଅନୁଭୁତ ହୋଇଥିଲା। ଏସିଆ, ୟୁରୋପ, ଉତ୍ତର ଆମେରିକା ସମେତ ସାରା ବିଶ୍ୱରେ ଚଳିତବର୍ଷ ପ୍ରବଳ ଗ୍ରୀଷ୍ମ ପ୍ରବାହ ହୋଇଥିଲା ବୋଲି ନ୍ୟାଶନାଲ ଏରୋନଟିକ୍ସ ଆଣ୍ଡ ସ୍ପେଶ୍ ଆଡମିନିଷ୍ଟ୍ରେଶନ(ନାସା) ପକ୍ଷରୁ କୁହାଯାଇଛି। ଗ୍ଲୋବାଲ ଓ୍ବାର୍ମିଂ ଯୋଗୁ ଚଳିତ ବର୍ଷ ଏଲ୍ନିନୋ ପ୍ରଭାବ ରହିଥିଲା। ଫଳରେ ସାରା ବିଶ୍ୱରେ ଗ୍ରୀଷ୍ମ ପ୍ରବାହ ଜାରି ରହିଥିଲା। ନାସା ପକ୍ଷରୁ ଜାରି କରାଯାଇଥିବା ଏକ ବିବୃତି ଅନୁସାରେ, ଚଳିତ ବର୍ଷ ଅଗଷ୍ଟ ମାସର ତାପମାତ୍ରା ସ୍ବାଭାବିକଠାରୁ ୧.୨ ଡିଗ୍ରୀ ଅଧିକ ଥିଲା। ଫଳରେ ଆମେରିକାର ଦକ୍ଷିଣ ଓ ଦକ୍ଷିଣପଶ୍ଚିମାଞ୍ଚଳରେ ରହୁଥିବା ୫୭ ନିୟୁତ ଲୋକ ପ୍ରଭାବିତ ହୋଇଥିଲେ। ଜୁନ, ଜୁଲାଇ ଏବଂ ଅଗଷ୍ଟ ମାସର ତାପମାତ୍ରାକୁ ଯଦି ତୁଳନା କରାଯିବ, ତେବେ ଅନ୍ୟ ବର୍ଷଗୁଡ଼ିକ ଅପେକ୍ଷା ଚଳିତ ବର୍ଷ ଏହି ୩ ମାସରେ ତାପମାତ୍ରା ସ୍ବାଭାବିକ ଠାରୁ ୦.୨୩ ଡିଗ୍ରୀ ଅଧିକ ଥିଲା। ଜଳବାୟୁ ପରିବର୍ତ୍ତନ ସମସ୍ୟାକୁ ନେଇ ଗତମାସରେ ନାସା ପକ୍ଷରୁ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବୈଜ୍ଞାନିକମାନେ ଏକଥା ଦର୍ଶାଇଥିଲେ ଯେ, ଗତ ୫ବର୍ଷର ଜୁଲାଇ ମାସ ଅପେକ୍ଷା ଚଳିତ ବର୍ଷ ଜୁଲାଇ ମାସରେ ଅଧିକ ଗ୍ରୀଷ୍ମ ପ୍ରବାହ ଜାରି ରହିଥିଲା। ଆପଣଙ୍କ ଚତୁଃପାର୍ଶ୍ୱରେ କଣ ସବୁ ଘଟୁଛି ତାହା ଆପଣ ଦେଖୁଥାନ୍ତୁ ବୋଲି ବୈଠକରେ ଯୋଗଦେଇ ନାସାର ଅଧିକାରୀ ବିଲ୍ ନେଲ୍ସନ୍ କହିଥିଲେ। ଚଳିତବର୍ଷ ହାଓ୍ବାଇ ଜଙ୍ଗଲରେ ନିଆଁ ଲାଗିବା ଠାରୁ ଆରମ୍ଭ କରି ଫୋଇନିକ୍ସ ଓ ମିଆମି ଅଞ୍ଚଳର ଗ୍ରୀଷ୍ମ ପ୍ରବାହର ଉଦାହରଣ ଦେଇ ନେଲ୍ସନ୍ କହିଥିଲେ, ଜଙ୍ଗଲ ନିଆଁ ଯୋଗୁ ଆମେରିକା ସମେତ ସାରା ୟୁରୋପରେ ଅଧିକ ଗ୍ରୀଷ୍ମ ପ୍ରବାହ ହୋଇଥିଲା। ଜଳବାୟୁ ପରିବର୍ତ୍ତନର ସବୁଠୁ ଅଧିକ ପ୍ରଭାବ ଫେବୃୟାରୀରୁ ଏପ୍ରିଲ ପର୍ଯ୍ୟନ୍ତ ପଡ଼ିଥିଲା। ଏହାପରେ ତାପମାତ୍ରା କ୍ରମାଗତଭାବେ ବୃୃଦ୍ଧି ପାଇ ଜୁଲାଇ ମାସ ବେଳକୁ ପରିସ୍ଥିତି ଅଣାୟତ୍ତ ହେବା ସହ ହାଓ୍ବାଇ ଓ କାନାଡ଼ାରେ ଜଙ୍ଗଲ ନିଆଁ ବ୍ୟାପିଥିଲା। ସେହିପରି ଜଳବାୟୁ ପରିବର୍ତ୍ତନ କାରଣରୁ ଗ୍ରୀସ୍ ଏବଂ ଇଟାଲୀରେ ମାତ୍ରାଧିକ ବର୍ଷା କାରଣରୁ ବନ୍ୟା ପରିସ୍ଥିତି ଉପୁଜିଥିଲା ବୋଲି ବୈଜ୍ଞାନିକମାନେ କହିଛନ୍ତି।
ସୂଚନାଯୋଗ୍ୟ ଏଲ୍ନିନୋ ପ୍ରଭାବରୁ ଅଧିକ ଗରମ ଅନୁଭୂତ ହୋଇଥାଏ। ଏହା ପ୍ରତି ୨ରୁ ୭ ବର୍ଷ ମଧ୍ୟରେ ବାରମ୍ବାର ଆସିଥାଏ। ତେବେ ପ୍ରଶାନ୍ତ ମହାସାଗର ଉପର ଦେଇ ବହୁଥିବା ପବନର ଗତିପଥ ଉପରେ ଏହା ନିର୍ଭର କରିଥାଏ ବୋଲି କୁହାଯାଉଛି। ନାସାର ଆକଳନ ଅନୁସାରେ ଏଲ୍ନିନୋର ପ୍ରଭାବ ଆସନ୍ତା ବର୍ଷ ଏପ୍ରିଲ ପର୍ଯ୍ୟନ୍ତ ରହିପାରେ।
