କେନ୍ଦୁଝର,୨୯ା୧୦(ସ୍ବ.): ସ୍ଥାନୀୟ ଅତିରିକ୍ତ ଜିଲା ଓ ଦୌରା ଜଜ୍ ତଥା ଫାଷ୍ଟଟ୍ରାକ୍ କୋର୍ଟ ବିଚାରପତି ଶନିବାର ଜଣେ ନାବାଳିକାଙ୍କୁ ବଳାତ୍କାର ମାମଲାରେ ଜଣେ ଅପରାଧୀକୁ ୨୦ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଜରିମାନା ଅନାଦେୟ ଅଧକ ୧ବର୍ଷ ଜେଲଦଣ୍ଡ ହୋଇଛି।
ମିଳିଥିବା ସୂଚନାନୁଯାୟୀ, ୨୦୧୯ ମସିହା ଅଗଷ୍ଟ ୧୩ରେ କେନ୍ଦୁଝର ସଦର ଥାନା ମହାଦେବପୁର ଗାଁ ଦାଣ୍ଡରେ ସେହି ଗ୍ରାମର ୯ ବର୍ଷର ନାବାଳିକା ଖେଳୁଥିଲେ। ଏହି ସମୟରେ ସେହି ଗ୍ରାମର ଚୈତନ୍ୟ ମହାନ୍ତ(୫୭) ସେହି ରାସ୍ତା ଦେଇ ଛେଳି ନେଇ ଯାଉଥିଲେ। ତେବେ ଛେଳି ଧରିବା ପାଇଁ କହି ନାବାଳିକାଙ୍କୁ ଡାକିଥିଲେ। ନାବାଳିକା ତାଙ୍କୁ ଚିହ୍ନି ଥିବାରୁ ତାଙ୍କ କଥାରେ ଛେଳି ଧରିବା ପାଇଁ ଚାଲି ଯାଇଥିଲେ। ତେବେ ନାବାଳିକାଙ୍କୁ ଏକାକୀ ପାଇ ଚୈତନ୍ୟ ବଳାତ୍କାର କରିଥିଲେ। ଏଥିସହିତ ଏ ସମ୍ପର୍କରେ କାହାରିକୁ କିଛି ନ କହିବା ପାଇଁ ଧମକ ମଧ୍ୟ ଦେଇ ଚାଲି ଯାଇଥିଲେ। ନାବାଳିକା ରକ୍ତ ଜୁଡୁବୁଡୁ ଅବସ୍ଥାରେ ଘରେ ପହଞ୍ଚିବାରୁ ତାଙ୍କ ମାଆ କ’ଣ ହୋଇଛି ବୋଲି ପଚାରିଥିଲେ। ଫଳରେ ସେ ଘଟଣା ସମ୍ପର୍କରେ ସବୁ କହିଥିଲେ । ତେଣୁ ତାଙ୍କ ମାଆ ସଦର ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇ ପୋଲିସ ଏକ ମାମଲା ରୁଜୁ କରିଥିଲା। ସଦର ଥାନା କେସ୍ ନଂ ୨୦୫/୨୦୧୯ ରୁଜୁ କରିଥିଲା। ଅଭିଯୋଗକୁ ଭିତ୍ତିକରି ପୋଲିସ ଚୈତନ୍ୟକୁ ଗିରଫ କରି କୋର୍ଟ ଚାଲାଣ କରିଥିଲା। ଏହି କେସ୍ରେ ଫାଷ୍ଟଟ୍ରାକ କୋର୍ଟ ବିଚାରପତି ମାନସ କୁମାର ମିଶ୍ର ୧୫ ଜଣ ସାକ୍ଷୀଙ୍କ ଅଭିଯୋଗକୁ ଭିତ୍ତି କରି ଚୈତନ୍ୟକୁ ୨୦ବର୍ଷ ସଶ୍ରମ ଜେଲଦଣ୍ଡ ସହିତ ୨୦ ହଜାର ଟଙ୍କା ଜରିମାନା କରିଥିଲେ। ଜରିମାନା ଅନାଦେୟ ଅଧିକ ୧ବର୍ଷ ଜେଲଦଣ୍ଡ ଭୋଗିବାକୁ ପଡ଼ିବ। ସେହିପରି ପୀଡ଼ିତାଙ୍କୁ ୪ଲକ୍ଷ ଟଙ୍କା ସହାୟତା ପ୍ରଦାନ ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି। ଏହି କେସକୁ ସରକାରଙ୍କ ପକ୍ଷରୁ ସ୍ପେଶାଲ ପିପି ଜ୍ଞାନେନ୍ଦ୍ରନାଥ ଜେନା ଓ ଏପିପି ପ୍ରଫୁଲ୍ଲ ପାତ୍ର ପରିଚାଳନା କରୁଥିଲେ। ପୀଡ଼ିତା ନାବାଳିକାଙ୍କୁ ଆଇନ ସହାୟତା କେନ୍ଦ୍ରରୁ ୪ଲକ୍ଷ ଟଙ୍କାର କ୍ଷତିପୂରଣ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି।
