ନୂଆଦିଲ୍ଲୀ, ୨୨।୯: କରୋନା ମହାମାରୀ ହେତୁ ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ବାତିଲ ହେବା ପରିସ୍ଥିତିରେ ରହିଥିଲା। ବିସିସିଆଇ ସଭାପତି ସୌରଭ ଗାଙ୍ଗୁଲି କହିଥିଲେ, ଯଦି ଚଳିତ ବର୍ଷ ଆଇପିଏଲ୍ ଅନୁଷ୍ଠିତ ନ ହୁଏ ତେବେ ବୋର୍ଡକୁ ୪ ହଜାର କୋଟି ଟଙ୍କାର କ୍ଷତି ସହିବାକୁ ପଡ଼ିପାରେ। ମାର୍ଚ୍ଚ ୨୯ରୁ ମୁମ୍ବାଇରେ ଏହି ଟୁର୍ନାମେଣ୍ଟ ଖେଳାଯିବାକୁ ସ୍ଥିର ହୋଇଥିଲା। କିନ୍ତୁ ଭାରତରେ କରୋନା ମାମଲାର ଦ୍ରୁତ ବୃଦ୍ଧି ସାଙ୍ଗକୁ ଲକ୍ଡାଉନ ଲାଗି ଏହା ସମ୍ଭବପର ହୋଇପାରି ନ ଥିଲା। ତେଣୁ ବିସିସିଆଇ ଏହି ଟୁର୍ନାମେଣ୍ଟକୁ ୟୁଏଇକୁ ସ୍ଥାନାନ୍ତରିତ କରିଥିଲା।
ଏହି ଟୁର୍ନାମେଣ୍ଟ ଦୁବାଇ, ଆବୁଧାବି ଓ ଶାରଜାର ୩ଟି ଗ୍ରାଉଣ୍ଡରେ ଚାଲିଛି। ସେପ୍ଟେମ୍ବର ୧୯ରୁ ଆରମ୍ଭ ହୋଇଥିବା ଏହି ପ୍ରତିଯୋଗିତା ଏବେ ନଭେମ୍ବର ୧୦ ତାରିଖ ପର୍ଯ୍ୟନ୍ତ ଚାଲିବ। ଲିଗ୍ର ପ୍ରଥମ ମ୍ୟାଚ୍ରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସ ୫ ଉଇକେଟ୍ରେ ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସକୁ ମାତ୍ ଦେଇଥିଲା। ଷ୍ଟାଡିୟମରେ ଦର୍ଶକଙ୍କୁ ମ୍ୟାଚ୍ ଉପଭୋଗ କରିବାର ଅନୁମତି ଦିଆଯାଇ ନ ଥିଲେ ମଧ୍ୟ ଉଦ୍ଘାଟନୀ ମ୍ୟାଚ୍ ବିଶ୍ୱ ରେକର୍ଡ କରିଛି। ବିସିସିଆଇର ସମ୍ପାଦକ ଜୟ ଶାହ ମଙ୍ଗଳବାର କହିଛନ୍ତି, ଚେନ୍ନାଇ ଓ ମୁମ୍ବାଇ ମଧ୍ୟରେ ଖେଳାଯାଇଥିବା ଉଦ୍ଘାଟନୀ ମ୍ୟାଚ୍କୁ ବିଶ୍ୱର ପାଖାପାଖି ୨୦ କୋଟି ଦର୍ଶକ ଟିଭି ଓ ଅନ୍ୟ ଅନ୍ଲାଇନ ପ୍ଲାଟଫର୍ମ ଜରିଆରେ ଦେଖିଥିଲେ। ପୂର୍ବରୁ ଆଇପିଏଲ୍ରେ କେବେ ମଧ୍ୟ ଏତେ ସଂଖ୍ୟକ ଦର୍ଶକ ଉଦ୍ଘାଟନୀ ମ୍ୟାଚ୍କୁ ଦେଖି ନ ଥିଲେ। ସେହିଭଳି ଆଇପିଏଲ୍ ପକ୍ଷରୁ ଏହାର ଅଫିସିଆଲ ଟୁଇଟର୍ ଆକାଉଣ୍ଟରେ କୁହାଯାଇଛି ଯେ, ଅନ୍ୟ ଦେଶର କୌଣସି ଲିଗ୍ର ପ୍ରଥମ ମ୍ୟାଚ୍କୁ ଏତେ ସଂଖ୍ୟକ ଦର୍ଶକ ଟିଭି ଓ ଡିଜିଟାଲ ପ୍ଲାଟଫର୍ମରେ ଦେଖିବା ହେଉଛି ଏକ ସର୍ବକାଳୀନ ରେକର୍ଡ। ସେଥିଲାଗି ଆଇପିଏଲ୍ ପକ୍ଷରୁ ଭାରତ ଓ ବିଶ୍ୱର ଅନ୍ୟ ଦେଶର ଦର୍ଶକଙ୍କୁ ଧନ୍ୟବାଦ ଦିଆଯାଇଛି।
