କେନ୍ଦୁଝର/ପାଟଣା,୧୧ା୩(ସ୍ବ.ପ୍ର.): ମହାବଳ ବାଘର ଗତିବିଧି ନିରୀକ୍ଷଣ ପାଇଁ କେନ୍ଦୁଝର ଜିଲା ପାଟଣା ରେଞ୍ଜ ଅଞ୍ଚଳରେ ଲଗାଯାଇଥିବା ୨ ଟ୍ରାପ୍ (ସିସିଟିଭି) କ୍ୟାମେରା ଚୋରି ହୋଇଯାଇଛି। ଦୁଇ କ୍ୟାମେରା ରୋହିଣୀଦୁମା ଜଙ୍ଗଲରେ ଲଗାଯାଇଥିଲା। ଚୋରି ପଛରେ ସ୍ଥାନୀୟ ଲୋକ କିମ୍ବା ଶିକାରୀଙ୍କ ହାତ ଥିବା ବନ ବିଭାଗ ସନ୍ଦେହ କରୁଛି। ଚୋରି ନେଇ ପାଟଣା ଥାନାରେ ଲିଖିତ ଅଭିଯୋଗ ହୋଇଥିବା ଡିଏଫ୍ଓ ଏଚ୍.ଡି.ଧନରାଜ କହିଛନ୍ତି।
ପ୍ରକାଶ ଯେ, କିଛି ମାସ ତଳେ ପାଟଣା ବନାଞ୍ଚଳ ଅନ୍ତର୍ଗତ ଉକ୍ତ ଗ୍ରାମ ନିକଟରେ ଜଣେ ବ୍ୟକ୍ତିଙ୍କ କ୍ଷତାକ୍ତ ମୃତଦେହ ରାସ୍ତାରୁ ମିଳିବା ପରେ ବାଘ ଆତଙ୍କ ଦେଖାଦେଇଥିଲା। କିନ୍ତୁ ବାଘ ଆକ୍ରମଣ ନୁହେଁ ଏହା ଏକ ହତ୍ୟାକାଣ୍ଡ ବୋଲି ବନ ବିଭାଗ କହି ଆସୁଥିଲା। ବ୍ୟବଚ୍ଛେଦ ରିପୋର୍ଟରେ କ’ଣ ବାହାରିଲା ତାହାର ଯାଞ୍ଚ କଲେ ସତ୍ୟାସତ୍ୟ ଜଣାପଡ଼ିବ ବୋଲି ମତପ୍ରକାଶ ପାଉଛି। ଅଭିଯୋଗ ପରେ କେନ୍ଦୁଝର ବନଖଣ୍ଡର ପାଟଣା ଓ ଘଟଗଁା ରେଞ୍ଜରେ ମହାବଳ ବାଘ ନିରୀକ୍ଷଣ ପାଇଁ ସମୁଦାୟ ୫୫ଟି ସିସିଟିଭି ବା ଟ୍ରାପ୍ କ୍ୟାମେରା ବିଭିନ୍ନ ଗଛରେ ଲଗାଯାଇଥିଲା। ସେଥି ମଧ୍ୟରୁ ଦୁଇ କ୍ୟାମେରା ମିଳୁ ନ ଥିବା ଅଭିଯୋଗରେ ଦର୍ଶାଯାଇଛି। ଟ୍ରାପ୍ କ୍ୟାମେରା ଲାଗିବା ଫଳରେ ଅଟେଇ ଜଙ୍ଗଲରେ ଶିକାରୀମାନଙ୍କ ଚଳପ୍ରଚଳ ଉପରେ ଅଂକୁଶ ଲାଗିଛି। ଏଣୁ ଏହି ଚୋରି ପଛରେ ଶିକାରୀ କିମ୍ବା ସ୍ଥାନୀୟ ଲୋକଙ୍କ ହାତ ଥିବା ସନ୍ଦେହ କରାଯାଉଛି। ଅନ୍ୟପକ୍ଷରେ କିଛି ଦିନ ତଳେ ମହାବଳ ବାଘର ଏକ ଫଟୋକୁ ନେଇ ବନ ବିଭାଗ ପକ୍ଷରୁ ଘଟଗଁା ଅଞ୍ଚଳରେ ବାଘର ଉପସ୍ଥିତି ନେଇ ଦାବି କରାଯାଇଥିଲା। କିନ୍ତୁ ଅଦ୍ୟାବଧି ବାଘର ଉପସ୍ଥିତି ନେଇ କୌଣସି ସୂଚନା ମିଳୁନାହିଁ। ଏନେଇ ବନ ବିଭାଗ ଅଧିକ ସିସିଟିଭି କ୍ୟାମେରା ଲଗାଇଥିଲେ ହେଁ ବାଘର ଫଟୋ କୌଣସି କ୍ୟାମେରାରେ କଏଦ ହୋଇ ନ ଥିବା ସମସ୍ତଙ୍କୁ ଚକିତ କରିଛି। ଆଖପାଖ ଜଙ୍ଗଲରେ ବାଘର ଉପସ୍ଥିତିକୁ ନେଇ ସେଭଳି ପାରିପାର୍ଶ୍ୱିକ ପ୍ରମାଣ ଯଥା ଲୋକଙ୍କୁ ଆକ୍ରମଣ, ବାଘର ଗର୍ଜନ, ଗୋରୁ ବା ମଇଁଷିକୁ ଆକ୍ରମଣ ଆଦି ମଧ୍ୟ ମିଳୁନାହିଁ। ଏଣୁ ମହାବଳ ବାଘର ଉପସ୍ଥିତିର ସତ୍ୟତାକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି। ଅନ୍ୟପକ୍ଷରେ ବାଘର କୌଣସି ଫଟୋ ଉତ୍ତୋଳନ ହୋଇ ନ ଥିବାରୁ ବାଘଟି ପୁଣି ନିଜ ବାସସ୍ଥାନକୁ ଚାଲିଯାଇଥାଇ ପାରେ ବୋଲି ବନ ବିଭାଗର ବରିଷ୍ଠ ଅଧିକାରୀମାନେ ଆଶଙ୍କା କରୁଛନ୍ତି।
