ଖଣ୍ଡପଡ଼ା,୨୫ା୧୧(ସ୍ବ.ପ୍ର.): ଖଣ୍ଡପଡ଼ା ସହରର ବିଭିନ୍ନ ସ୍ଥାନରେ ନୂତନ ପ୍ରକଳ୍ପ ନିର୍ମାଣ ନିମନ୍ତେ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲେ ମଧ୍ୟ ଅଦ୍ୟାବଧି ନୂତନ ପ୍ରକଳ୍ପ ନିର୍ମାଣ ହୋଇପାରୁନାହିଁ। ଅନୁଦାନ ଅର୍ଥ ମଞ୍ଜୁର ପରେ ବି ରାଜନୈତିକ ଇଚ୍ଛାଶକ୍ତିର ଅଭାବ ଓ ପ୍ରଶାସନିକ ସ୍ଥାଣୁତା ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି ଅଭିଯୋଗ ହୋଇଛି।
ଖଣ୍ଡପଡ଼ା ସହର ବାଇପାସ୍ ରାସ୍ତା ପାର୍ଶ୍ୱରେ ଦେୱାନୀ ଅଦାଲତର ନୂତନ କୋଠାନିର୍ମାଣ ନିମନ୍ତେ ୨୦୧୯ରେ ଶିଳନ୍ୟାସ କରାଯାଇଥିଲା। ଏଥି ନିମନ୍ତେ ଖଣ୍ଡପଡ଼ା ତହସିଲ କର୍ତ୍ତୃପକ୍ଷ ଆବଶ୍ୟକ ସରକାରୀ ଜାଗା ଚିହ୍ନଟ କରି ବିଚାର ବିଭାଗୀୟ କର୍ତ୍ତୃପକ୍ଷଙ୍କୁ ହସ୍ତାନ୍ତର କରିଥିଲେ ମଧ୍ୟ ଅଦ୍ୟାବଧି ଉକ୍ତ କାମ କେବଳ ସୂଚନା ଫଳକରେ ସୀମିତ ରହିଛି। ଦେୱାନୀ ଅଦାଲତ ନୂତନ କୋଠା ନିର୍ମାଣ କାମ ଖଣ୍ଡପଡ଼ା ପୂର୍ତ୍ତ ବିଭାଗ ଉପରେ ନ୍ୟସ୍ତ କରାଯାଇଛି। ସେହିପରି ଖଣ୍ଡପଡ଼ା ସହରର ୧୩ ନଂ. ୱାର୍ଡ ଅଧୀନ ମା’ଉମାଦେବୀଙ୍କ ମନ୍ଦିର ପାର୍ଶ୍ୱ ୫.୫ ଏଳର ସରକାରୀ ଜାଗାରେ ଏକ ବିଜ୍ଞାନ କେନ୍ଦ୍ର ନିର୍ମାଣ ପାଇଁ ୨୦୧୯ ମାର୍ଚ୍ଚ ୪ରେ ପ୍ରଶାସନ ପକ୍ଷରୁ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ଅଦ୍ୟାବଧି ବିଜ୍ଞାନ କେନ୍ଦ୍ର ନିର୍ମାଣ କାମ ଆରମ୍ଭ ହୋଇ ନ ଥିବା ବେଳେ ଏଥିପାଇଁ ମଞ୍ଜୁର ଅନୁଦାନ ଅର୍ଥ ପଡିରହିଛି। କେବେ ବିଜ୍ଞାନ କେନ୍ଦ୍ର ନିର୍ମାଣ ହେବ ଏ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାଛଡା ଖଣ୍ଡପଡା ବାଇପାସ ରାସ୍ତାର ସମ୍ପ୍ରସାରଣ, ମଧୁବନ ମିନି ଷ୍ଟାଡିୟମର ଉନ୍ନତିକରଣ, ଶ୍ରୀହୀନ ଅବସ୍ଥାରେ ପଡି ରହିଥିବା ସୁନାମୁହିଁ ପରିବେଶ ପର୍ଯ୍ୟଟନ ସ୍ଥଳୀର ଉନ୍ନତୀକରଣ, ନୂଆ ପୋଖରୀ ହୁଡାରେ ନୂତନ ପାର୍କ ନିର୍ମାଣ କାମ ଅଧାରେ ଅଟଳି ରହିଛି। ଏଥିପ୍ରତି ନୟାଗଡ଼ ଜିଲାପାଳ, ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ଓ ବିଭାଗୀୟ ଉଚ୍ଚପଦସ୍ଥ ଅଧିକାରୀମାନେ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
