ବୁଗୁଡ଼ା,୧୭।୨(ଡି.ଏନ.ଏ.) ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଦ୍ୱିତୀୟ ପର୍ଯ୍ୟାୟ ୧୮ରେ ଭୋଟ ଗ୍ରହଣ ହେବ। ବୁଗୁଡ଼ା ବ୍ଲକର ୨୮୭ଟି ବୁଥ୍ ମଧ୍ୟରୁ ବାଲିପଦର ଗ୍ରାମସ୍ଥ ନୋଡାଲ୍ ଉଚ୍ଚ ପ୍ରାଥମିକ ବିଦ୍ୟାଳୟରେ ଥିବା ବୁଥ୍ ନମ୍ବର ୮ ଏବଂ କଳମ୍ବ ପଞ୍ଚାୟତ ଅନ୍ତର୍ଗତ କାଦପଡା ଗାଁର ଉଚ୍ଚ ପ୍ରାଥମିକ ବିଦ୍ୟାଳୟରେ ଥିବା ବୁଥ୍ ନମ୍ବର ୭କୁ ପିଙ୍କ୍ ବୁଥ୍ ଭାବେ ଚିହ୍ନଟ କରାଯାଇଥିବା ନେଇ ବ୍ଲକ ନିର୍ବାଚନ ଅଧିକାରୀ ତନ୍ମୟ ପାତ୍ରଙ୍କଠାରୁ ପ୍ରକାଶ। ପିଙ୍କ୍ ବୁଥର ବିଶେଷତ୍ୱ ହେଲା ଏଠାରେ ନିର୍ବାଚନ ବେଳେ ଭୋଟ ଗ୍ରହଣ ଦାୟିତ୍ୱରେ କେବଳ ମହିଳା ଅଧିକାରୀ ଏବଂ କର୍ମଚାରୀ ନିୟୋଜିତ ହେବେ। ଉକ୍ତ କେନ୍ଦ୍ରରେ ସମସ୍ତ ଭୋଟରଙ୍କ ହିତକୁ ପ୍ରାଧାନ୍ୟ ଦିଆଯିବା ସହ ଗର୍ଭବତୀ, ଦିବ୍ୟାଙ୍ଗଙ୍କ ପାଇଁ ସ୍ବତନ୍ତ୍ର ସୁବିଧା ରହିବ। ଏ ନେଇ ଜିଲା ନିର୍ବାଚନ ଅଧିକାରୀ ତଥା ଜିଲାପାଳଙ୍କ କାର୍ଯ୍ୟାଳୟର ଚିଠି ୬୭୫/ ୧୦-୦୨-୨୨ ଜରିଆରେ ବୁଗୁଡ଼ା ପଞ୍ଚାୟତ ସମିତି ପ୍ରଶାସନକୁ ଅବଗତ କରାଯାଇଛି। ଉଲ୍ଲେଖଯୋଗ୍ୟ, ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବ୍ଲକର ମୋଟ ୯୮ ହଜାର ୩୮୦ ଜଣ ଭୋଟରଙ୍କ ମଧ୍ୟରୁ ୪୬,୨୩୫ (୪୭%) ମହିଳା ଭୋଟର ରହିଥିବା ବେଳେ ୩ ଜିଲା ପରିଷଦ ଜୋନ୍ ପାଇଁ ୬ ଜଣ ମହିଳା ପ୍ରାର୍ଥୀ, ୨୧ ସମିତି ସଭ୍ୟ ପଦବୀ ପାଇଁ ୩୦ ଜଣ ମହିଳା ପ୍ରାର୍ଥୀ ଏବଂ ପାଙ୍ଗିଡ଼ି ପଞ୍ଚାୟତର ଅପ୍ରତିଦ୍ୱନ୍ଦ୍ୱୀ ପ୍ରାର୍ଥିନୀ ଭାଗ୍ୟଲତା ବିଷୋୟୀଙ୍କୁ ବାଦ ଦେଇ ଅନ୍ୟ ୨୦ ପଞ୍ଚାୟତର ସରପଞ୍ଚ ପଦବୀ ପାଇଁ ୩୫ ଜଣ ମହିଳା ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିବା ଜଣାପଡ଼ିଛି।
