ଇମ୍ଫାଲ/ଲକ୍ଷ୍ନୌ,୨୧ା୭: ଭାଜପା ଶାସିତ ମଣିପୁରରେ ୨ କୁକି ମହିଳାଙ୍କୁ ଉଲଗ୍ନ କରି ରାସ୍ତାରେ ବୁଲାଯାଇଥିବା ଭିଡିଓ ଭାଇରାଲ ପରେ ବର୍ତ୍ତମାନ ଦେଶବ୍ୟାପୀ ବିକ୍ଷୋଭ ଦେଖିବାକୁ ମିଳିଛି। ଏଭଳି ସ୍ଥିତିରେ ଆଉ ଏକ ଭିଡିଓ ସୋସିଆଲ ମିଡିଆରେ ସାମ୍ନାକୁ ଆସିଛି। ପୁଣି ମଣିପୁରରେ କୁକି ସମ୍ପ୍ରଦାୟର ଜଣେ ବ୍ୟକ୍ତିଙ୍କ ମୁଣ୍ଡକାଟ କରାଯାଇଥିବା ଭିଡିଓରେ ଦେଖିବାକୁ ମିଳିଛି। ମୁଣ୍ଡ କଟାଯାଇଥିବା ବ୍ୟକ୍ତି ଜଣକ ହେଲେ ଡାଭିଡ୍ ଥିଏକ୍। ବିଷ୍ଣୁପୁର ଜିଲାର ଏକ ଜନବସତି ଅଞ୍ଚଳରେ ତାଙ୍କ କଟାମୁଣ୍ଡକୁ ବାଉଁଶରେ ତିଆରି ଏକ ବାଡ଼ରେ ରଖାଯାଉଛି। ଜୁଲାଇ ୨ ତାରିଖ ରାତି ୧୨ଟାରେ ସଶସ୍ତ୍ର ଉଗ୍ରପନ୍ଥୀମାନେ ହତ୍ୟା କରିଥିବା ୩ ବ୍ୟକ୍ତିଙ୍କ ମଧ୍ୟରୁ ଡାଭିଡ୍ ଅନ୍ୟତମ।
କେବଳ ମଣିପୁର ନୁହେଁ, ଭାଜପା ଶାସିତ ଉତ୍ତର ପ୍ରଦେଶ (ୟୁପି)ରେ ଆଇନ ଶୃଙ୍ଖଳାକୁ ନେଇ ପ୍ରଶ୍ନ ଉଠୁଥିବା ବେଳେ ଶୁକ୍ରବାର ସେଠାରେ ମଧ୍ୟ ଏକ ଅନୁରୂପ ଘଟଣା ଘଟିଛି। ବରାବାଙ୍କି ଜିଲା ମିଠଓ୍ବାରାର ରିୟାଜ(୨୪) ନିଜ ଭଉଣୀଙ୍କ ମୁଣ୍ଡକାଟ୍ କରିଛନ୍ତି। ସେ କଟାମୁଣ୍ଡ ଧରି ଫତେପୁର ଥାନାରେ ପହଞ୍ଚିବା ପରେ ପୋଲିସ ତାଙ୍କୁ ଗିରଫ କରିଛି। ଭଉଣୀ ଅସିଫା(୧୮)ଙ୍କ ପ୍ରେମ ସମ୍ପର୍କକୁ ନେଇ ରିୟାଜଙ୍କ ଯୁକ୍ତିତର୍କ ହୋଇଥିଲା। ବଡ଼ଭାଇ ରିୟାଜ ଏଥିରେ ଉତ୍ତ୍ୟକ୍ତ ହୋଇ ଏକ ଧାରୁଆ ଅସ୍ତ୍ରରେ ଭଉଣୀର ମୁଣ୍ଡକାଟି ଦେଇଥିଲେ। ସେ କଟାମୁଣ୍ଡକୁ ଧରି ଥାନାରେ ପହଞ୍ଚି ଥିଲେ।
ଅସିଫା ନିଜ ପୁରୁଷବନ୍ଧୁ ଚାନ୍ଦ ବାବୁଙ୍କୁ ବିବାହ କରିବାକୁ ଚାହୁଁଥିବାବେଳେ ପରିବାର ଲୋକେ ଏହାକୁ ବିରୋଧ କରିଆସୁଥିଲେ। ଗତ ମେ’ ୨୯ରେ ଅସିଫାଙ୍କ ବାପା ଅବ୍ଦୁଲ ରଶିଦ୍ ଝିଅଙ୍କୁ ବିବାହ ଉଦ୍ଦେଶ୍ୟରେ ଅପହରଣ ଅଭିଯୋଗ ଆଣି ଆଇପିସି ଦଫା ୩୬୬ବଳରେ ଥାନାରେ ଏତଲା ଦେଇଥିଲେ। ଚାନ୍ଦ ବାବୁଙ୍କୁ ଗିରଫ କରି ଜେଲକୁ ପଠାଯାଇଛି। କିନ୍ତୁ ଅସିଫା ତାଙ୍କୁ ବିବାହ କରି ନୂଆ ଜୀବନ ଆରମ୍ଭ କରିବାକୁ ଚାହୁଁଥିବାରୁ ଏହାକୁ ନେଇ ଘରେ ବିବାଦ ଲାଗି ରହିଥିଲା।
