ହିଞ୍ଜିଳିକାଟୁ, ୧୪ା୧(ଦ୍ବିତୀକୃଷ୍ଣ ପଣ୍ଡା): ଚାକିରି କରାଇଦେବା ନା’ରେ ଲୋକଙ୍କୁ ଠକିଥିବା ୨ ଦମ୍ପତିଙ୍କୁ ଉତ୍ୟକ୍ତ ଲୋକମାନେ ହିଞ୍ଜିଳି ଥାନାରେ ଦେବା ପରେ ପୋଲିସ ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ୧୧ ଜଣଙ୍କ ଠାରୁ ପ୍ରାୟ ୧୮.୭୦ ଲକ୍ଷ ଟଙ୍କା ଲୁଟି ନେଇଥିବା ଥାନାରେ ଅଭିଯୋଗ ହୋଇଛି। ଏହି ଘଟଣା ହିଞ୍ଜିଳିକାଟୁ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ପ୍ରକାଶ ଯେ , ହିଞ୍ଜିଳିଥାନା କାଞ୍ଜିଆମା ଗ୍ରାମର ବୁଲୁ ଜେନା ଭୁବନେଶ୍ୱର ସାଲିଆ ସାହିରେ ଏକ ତେଜରାତି ଦୋକାନ କରିଥିଲେ । ସେହି ସମୟରେ ଭୁବନେଶ୍ୱର ସହିଦନଗର ଥାନା ପଥରବନ୍ଧ ଅଞ୍ଚଳର ବିପିନି ପାତ୍ର ବୁଲୁଙ୍କ ସହ ଭାବ ବିନିମୟ କରିଥିଲେ । କିଛି ଦିନ ପରେ ବୁଲୁଙ୍କ ତେଜରାତି ଦୋକାନରୁ ବିଭିନ୍ନ ସମୟରେ ପ୍ରାୟ ୨ଲକ୍ଷ ଟଙ୍କାର ସଉଦା କିଣିଥିଲେ । ବୁଲୁ ବକେୟା ଟଙ୍କା ମାଗିବାରୁ ବିପିନି ଓ ତାଙ୍କର ଜଣେ ସହଯୋଗୀ ବାଲେଶ୍ୱର ଜିଲା ନୀଳଗିରି ଅଞ୍ଚଳର ଗଣେଷ ନାୟକଙ୍କ ଗଞ୍ଜାମ ଜିଲା ବ୍ରହ୍ମପୁର ଅଞ୍ଚଳରେ ଏକ ଘରବାରି ଜମି ରହିଥିବା ଓ ତାକୁ ବିକ୍ରୟ କରି ବକେୟା ଟଙ୍କା ଦେବାକୁ ପ୍ରତଶ୍ରୁତି ଦେଇଥିଲେ । ପରେ ଗଣେଶ, ବିପିନି ପରିବାର ସହ ଭୁବନେଶ୍ୱରରୁ ଆସି ହିଞ୍ଜିଳି ଥାନା କାଞ୍ଜିଆମା ଗ୍ରାମରେ ଏକ ଭଡ଼ା ଘରେ ରହିଥିଲେ। କୌଶଳକ୍ରମେ ଉଭୟ ଦମ୍ପତି ସ୍ଥାନୀୟ ଅଞ୍ଚଳରେ ଚାକିରି କରାଇ ଦେବା ନାରେ ୧୧ ଜଣଙ୍କ ଠାରୁ ପ୍ରାୟ ୧୮.୭୦ଲକ୍ଷ ଟଙ୍କା ଠକି ନେଇଥିଲେ । ଦୀର୍ଘ ଦିନ ଧରି ଚାକିରି ନ ମିଳିବାରୁ ସଂପୃକ୍ତ ଲୋକେ ଉଭୟ ଦମ୍ପତିଙ୍କୁ ଟଙ୍କା ଫେରସ୍ତ କରିବାକୁ କହିଥିଲେ । ଚାକିରି ଦେବାକୁ କହି ହିଞ୍ଜିଳି ଥାନା କାଞ୍ଜିଆମା ଗ୍ରାମର ରଶ୍ମିତା ସ୍ବାଇଁଙ୍କ ଠାରୁ ୨ ଲକ୍ଷ, ବନିତା ସ୍ବାଇଁଙ୍କ ଠାରୁ ୮୦ ହଜାର, ରୀତା ଜେନାଙ୍କ ଠାରୁ ୧ଲକ୍ଷ, ମଙ୍ଗୁଳୁ ବିଷୋୟୀଙ୍କ ଠାରୁ ୩ ଲକ୍ଷ ୫୯ ହଜାର, ସଂଗ୍ରାମ ରାଉତଙ୍କ ଠାରୁ ୨ଲକ୍ଷ ୫୦ ହଜାର, ବିଦ୍ୟାଦର ରାଉତଙ୍କ ଠାରୁ ୪୬ ହଜାର, ରୋହି ଜେନାଙ୍କ ଠାରୁ ୧ଲକ୍ଷ ୯୦ ହଜାର, ଦାଶରଥି ବେହେରାଙ୍କ ଠାରୁ ୮୦ ହଜାର ନେଇଛନ୍ତି। ସେହିପରି ଆମ୍ବିଳାପଲ୍ଲୀ ଗ୍ରାମର ପଞ୍ଚାନନ ବେହେରାଙ୍କ ଠାରୁ ୧ଲକ୍ଷ ୨୦ ହଜାର, ଜୀବନ ବେହେରାଙ୍କ ଠାରୁ ୨ ଲକ୍ଷ, ସନ୍ତୋଷ ଡାକୁଆଙ୍କ ଠାରୁ ୪୫ ହଜାର ଟଙ୍କା ସମୁଦାୟ ୧୧ ଜଣଙ୍କ ଠାରୁ ପ୍ରାୟ ୧୮.୭୦ ଲକ୍ଷ ଟଙ୍କା ଠକେଇ କରି ନେଇଥିବା ନେଇ ଠକାମୀର ଶୀକାର ହୋଇଥିବା ବ୍ୟକ୍ତି ମାନେ ହିଞ୍ଜିଳି ଥାନାରେ ରବିବାର ଅଭିଯୋଗ କରିଥିଲେ । ଅଭିଯୋଗ ଭିତ୍ତିରେ ହିଞ୍ଜିଳି ଥାନାରେ କେସ ନଂ- ୩୫/୨୫ରେ ଏକ ମାମଲା ରୁଜୁ କରି ୨ ଦମ୍ପତିଙ୍କୁ ପୋଲିସ ଗିରଫ କରିଛି । ଗିରଫମାନେ ହେଲେ ବାଲେଶ୍ୱର ଜିଲା ନୀଳଗିରି ଅଞ୍ଚଳର ଗୋପାଳ ନାୟକ, ତାଙ୍କରି ସ୍ତ୍ରୀ ତପସ୍ବିନୀ ସିଂ, ଭୁବନେଶ୍ୱର ଶହୀଦନଗର ଥାନା ପଥରବନ୍ଧ ଗ୍ରାମର ବିପିନି ପାତ୍ର ଓ ତାଙ୍କ ସ୍ତ୍ରୀ ବିଜୁଳି ପାତ୍ର । ଗିରଫ ଉଭୟ ଦମ୍ପତିଙ୍କୁ ସୋମବାର କୋର୍ଟ ଚାଲାଣ କରାଯାଇଥିବା ତଦନ୍ତକାରୀ ଅଧିକାରୀ ତଥା ଥାନା ଏସ.ଆଇ. ସିଦ୍ଧାର୍ଥ ଶଙ୍କର ଜେନାଙ୍କ ସୂତ୍ରରୁ ପ୍ରକାଶ । ଗିରଫ ଗଣେଷ ନାୟକଙ୍କ ନାମରେ ଭୁବନେଶ୍ୱର ସମେତ ବିଭିନ୍ନ ଥାନାରେ ଅପରାଧିକ ମାମଲା ରହିଛି ।
