ମେଇତି ସମ୍ପ୍ରଦାୟକୁ ଏସ୍ଟି ତାଲିକାରେ ସାମିଲ ପାଇଁ ମଣିପୁର ହାଇକୋର୍ଟ ରାଜ୍ୟର ଭାଜପା ସରକାରଙ୍କୁ ନିର୍ଦ୍ଦେଶ ଦେବା ପରେ ମେ’ ୩ରେ ଜାତିଆଣ ହିଂସା ଆରମ୍ଭ ହୋଇଥିଲା। ଏହାର ଦିନକ ପରେ କୁକି-ଜୁ ସମ୍ପ୍ରଦାୟର ୨ଜଣ ମହିଳାଙ୍କୁ ଏକ ବିଲକୁ ନେଇ ଗଣବଳାତ୍କାର କରାଯାଇଥିଲା। ଦୁହିଁଙ୍କୁ ଉଲଗ୍ନ କରି ରାସ୍ତାରେ ପରେଡ୍ ମଧ୍ୟ କରାଯାଇଥିଲା, ଯାହାର ଭିଡିଓ ବୁଧବାର ଭାଇରାଲ ହୋଇଛି। ମଣିପୁର ଜାତିଆଣ ହିଂସାରେ ୧୬୦ରୁ ଊର୍ଦ୍ଧ୍ୱ ଜଣଙ୍କ ମୃତ୍ୟୁ ଘଟିଥିବାବେଳେ ସଦ୍ୟ ସାମ୍ନାକୁ ଆସିଥିବା ବର୍ବରତା ବିରୋଧରେ ଗୁରୁବାର ଇଣ୍ଡିଜେନସ୍ ଟ୍ରାଇବାଲ୍ ଲିଡର୍ସ ଫୋରମ୍ (ଆଇଟିଏଲ୍ଏଫ୍) ପକ୍ଷରୁ ଚୂଡ଼ାଚାନ୍ଦପୁରରେ ବିକ୍ଷୋଭ ଶୋଭାଯାତ୍ରା କରାଯିବ। ଗୁରୁବାର ଆରମ୍ଭ ହେଉଥିବା ସଂସଦର ମୌସୁମୀ ଅଧିବେଶନରେ ତୃଣମୂଳ କଂଗ୍ରେସ (ଟିଏମ୍ସି) ଏହି ପ୍ରସଙ୍ଗ ଉଠାଇ କେନ୍ଦ୍ରକୁ ଘେରିବା ପାଇଁ ପ୍ରସ୍ତୁତ ହୋଇଛି ।
ଇମ୍ଫାଲ,୨୦ା୭: ଭାଜପା ଶାସିତ ଉତ୍ତରପୂର୍ବାଞ୍ଚଳ ରାଜ୍ୟ ମଣିପୁରରେ ଦୀର୍ଘ ଅଢ଼େଇ ମାସ ଧରି ସଂଘର୍ଷ ଲାଗିରହିଥିବାବେଳେ ୨ ଜଣ ଆଦିବାସୀ ମହିଳାଙ୍କୁ ଉଲଗ୍ନ କରି ରାସ୍ତାରେ ବୁଲାଯାଉଥିବା ବେଳର ଭିଡିଓ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହୋଇଛି। ୨ ପୀଡ଼ିତାଙ୍କୁ ନିକଟସ୍ଥ ଚାଷଜମିରେ ଗଣବଳାତ୍କାର କରାଯାଇଥିବା ନେଇ ଏକ ଆଦିବାସୀ ସଙ୍ଗଠନ ଅଭିଯୋଗ ଆଣିଛି। ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଛି। ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ପାଇଁ ଦାବି ହୋଇଛି। ଇଣ୍ଡିଜେନସ୍ ଟ୍ରାଇବାଲ୍ ଲିଡର୍ସ ଫୋରମ୍ (ଆଇଟିଏଲ୍ଏଫ୍) ପକ୍ଷରୁ ବୁଧବାର ଜାରି ଏକ ବିବୃତିରେ କୁହାଯାଇଛି ଯେ ରାଜଧାନୀ ଇମ୍ଫାଲଠାରୁ ୩୫ କି.ମି. ଦୂରରେ ଅବସ୍ଥିତ କାଙ୍ଗ୍ପୋକ୍ପି ଜିଲାରେ ମେ’ ୪ରେ ଏହି ଘଟଣା ଘଟିଥିଲା। ଏହାର ଦିନକ ପୂର୍ବରୁ ଉପତ୍ୟକାର ସଂଖ୍ୟାବହୁଳ ମେଇତି ଓ ପାର୍ବତ୍ୟ ଅଞ୍ଚଳରେ ବସବାସ କରୁଥିବା କୁକି ସମ୍ପ୍ରଦାୟ ମଧ୍ୟରେ କ୍ୟାମେରା ଆଗରେ ସଂଘର୍ଷ ହୋଇଥିଲା। ବଳାତ୍କାରର ଶିକାର ହୋଇଥିବା ୨ ମହିଳା କୁକି-ଜୁ ଜାତିର ବୋଲି କୁକି ସମ୍ପ୍ରଦାୟର ପ୍ରତିନିଧିତ୍ୱ କରୁଥିବା ଆଇଟିଏଲ୍ଏଫ୍ କହିଛି। ଭାଇରାଲ ହୋଇଥିବା ଭିଡିଓରେ ମେଇତି ସମ୍ପ୍ରଦାୟର ବହୁସଂଖ୍ୟକ ପୁରୁଷ କୁକି-ଜୁ ଆଦିବାସୀ ମହିଳାଦ୍ୱୟଙ୍କୁ ବିବସ୍ତ୍ର କରି ବଳାତ୍କାର କରିବା ପାଇଁ ବିଲ ଆଡ଼କୁ ଟାଣିନେଉଥିବା ଦେଖିବାକୁ ମିଳିଛି। କିନ୍ତୁ ଉପସ୍ଥିତ ଜନତା ଦେଖଣାହାରି ସାଜି ସାହାଯ୍ୟ ପାଇଁ ଆକୁଳ ନିବେଦନ କରୁଥିବା ଦୁଇ ମହିଳାଙ୍କ କଥା ଶୁଣି ନ ଥିଲେ। ଜାତୀୟ ମହିଳା କମିଶନ ଏବଂ ଜାତୀୟ ଏସ୍ସି/ଏସ୍ଟି କମିଶନ ତୁରନ୍ତ କାର୍ଯ୍ୟାନୁଷ୍ଠାନ ନିଅନ୍ତୁ ବୋଲି ଆଇଟିଏଲ୍ଏଫ୍ ଦାବି କରିଛି। ଏନେଇ ପୋଲିସ ଥୋଉବଲ ଜିଲା ନୋଙ୍ଗପୋକ୍ ସେକ୍ମାଇ ଥାନାରେ ଅଜ୍ଞାତ ଅପରାଧୀଙ୍କ ବିରୋଧରେ ଅପହରଣ, ଗଣବଳାତ୍କାର ଓ ହତ୍ୟା ମାମଲା ରୁଜୁ କରିଛି। କିନ୍ତୁ ଅଦ୍ୟାବଧି କାହାକୁ ଗିରଫ କରି ପାରିନାହିଁ। ବିରୋଧୀ ଦଳଗୁଡ଼ିକର ନେତାମାନେ ଏହା ଉପରେ ରାଜ୍ୟ ଓ କେନ୍ଦ୍ର ସରକାର ତୁରନ୍ତ କାର୍ଯ୍ୟାନୁଷ୍ଠାନ ନିଅନ୍ତୁ ବୋଲି ଦାବି କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଟିଏମ୍ସିର ୫ ଜଣିଆ ପ୍ରତିନିଧି ଟିମ୍ ଚୂଡ଼ାଚାନ୍ଦପୁର ରିଲିଫ୍ ଶିବିର ଏବଂ ଇମ୍ଫାଲ ଉପତ୍ୟକା ବୁଲି ଦେଖିଛନ୍ତି। ନେତାମାନେ ରାଜଭବନରେ ରାଜ୍ୟପାଳ ଅନସୂୟା ଉଇକେଙ୍କୁ ଭେଟି ହିଂସା ପ୍ରଭାବିତ ଲୋକଙ୍କ ଦୁର୍ଦ୍ଦଶା ଅବଗତ କରାଇଛନ୍ତି। ପାର୍ଲାମେଣ୍ଟରେ ଆମେ ଏହି ପ୍ରସଙ୍ଗ ଉଠାଇବୁ ବୋଲି କହିଛନ୍ତି।
