ଭୁବନେଶ୍ୱର,୨୨ା୧୦(ବ୍ୟୁରୋ): ତେଲ ଟ୍ୟାଙ୍କରରେ ଚାଲାଣ ହେଉଥିଲା ଗଞ୍ଜେଇ। ସ୍ବତନ୍ତ୍ର ଭାବେ ପ୍ୟାକିଂ କରାଯାଇ ଟାଙ୍କି ଭିତରେ ରଖାଯାଇଥିଲା। ପୋଲିସ ନଜରରୁ ବର୍ତ୍ତିବା ପାଇଁ ଏଭଳି ଅଭିନବ କୌଶଳ ଆପଣାଇଥିଲେ ଗଞ୍ଜେଇ ଚାଲାଣକାରୀ। ଏପରି କି କୋରାପୁଟରୁ ଦୀର୍ଘ ୪୫୦ କିମିରୁ ଅଧିକ ଦୂର ଅତିକ୍ରମ କରି ଭୁବନେଶ୍ୱରରେ ପହଞ୍ଚତ୍ ସାରିଥିଲେ। ରସୁଲଗଡ଼ ଦେଇ ଜାତୀୟ ରାଜପଥରେ ଯାଉଥିବାବେଳେ ଧରି ପକାଇଥିଲା ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନ୍ସିବି) ଟିମ୍। ଟ୍ୟାଙ୍କର ଯାଞ୍ଚ କରାଯିବାରୁ ଟାଙ୍କିରୁ ମିଳିଥିଲା ୨.୫ କୁଇଣ୍ଟାଲ ଗଞ୍ଜେଇ। ଜବତ ଗଞ୍ଜେଇର ଆନୁମାନିକ ମୂଲ୍ୟ ୨୫ ଲକ୍ଷ ଟଙ୍କା ହେବ। ଏହି ଘଟଣାରେ ଦୁଇଜଣ ଆନ୍ତଃରାଜ୍ୟ ବେପାରିଙ୍କୁ ଏନ୍ସିବି ଗିରଫ କରିଛି। ସେମାନେ ହେଲେ ବିହାର ଭୋଜପୁର ଜିଲା ଆର୍ହା ଅଞ୍ଚଳର ସୁନିଲ୍ ରଏ ଓ ଦଖିଣୱାର୍ ଅଞ୍ଚଳର ଅଜିନ୍ଦେଓ ବିନ୍। ଅଭିଯୁକ୍ତଦ୍ୱୟଙ୍କୁ ଏନ୍ସିବି କୋର୍ଟ ଚାଲାଣ କରିଥିଲା। ଜାମିନ୍ ନାମଞ୍ଜୁର ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
