ସାକ୍ଷୀଗୋପାଳ,୪ା୬(ଡି.ଏନ୍.ଏ.): କେନ୍ଦ୍ରରେ ମୋଦି ସରକାରଙ୍କ ଅଷ୍ଟମ ବର୍ଷ ପୂର୍ତ୍ତି ସମାରୋହ ପୁରୀ ଜିଲା ସତ୍ୟବାଦୀ ବ୍ଲକର ବୀରଗୋବିନ୍ଦପୁର ଗ୍ରାମରେ ଶୁକ୍ରବାର ଅନୁଷ୍ଠିତ ହୋଇଯାଇଛି। ସମାରୋହର ମୁଖ୍ୟ ଅତିଥି ଭାବେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇ (ଇଣ୍ଡିଆନ ଅଏଲ୍ କର୍ପୋରେଶନ ଲିଃ) ଆଇଓସିଏଲ ପକ୍ଷରୁ ୨. ୪୦ କୋଟି ଟଙ୍କା ବ୍ୟୟରେ ବୀରଗୋବିନ୍ଦପୁର ଗ୍ରାମର ସୌନ୍ଦର୍ଯ୍ୟକରଣ ପ୍ରକଳ୍ପର ଶିଳାନ୍ୟାସ କରିଥିଲେ। ଗାଁ ହେଉଛି ଭାରତର ଆତ୍ମା, ଗ୍ରାମର ବିକାଶ ଓ ଗାଁର ଲୋକମାନଙ୍କ ନିକଟରେ ସମସ୍ତ ସୁବିଧା ପହଞ୍ଚାଇଦେବା ଲକ୍ଷ୍ୟରେ ମୋଦି ସରକାର କାମ କରୁଛି। ଏହି ସୁଯୋଗରେ ବୀରଗୋବିନ୍ଦପୁର ଗ୍ରାମର ୩୦ ବର୍ଷର ଆତ୍ମୀୟତା ତାଙ୍କୁ ସେବା କରିବାର ସୁଯୋଗ ଦେଇଛି ବୋଲି ମନ୍ତ୍ରୀ ପ୍ରଧାନ କହିଥିଲେ। ଗ୍ରାମର ଗୁରୁଜନ, ମା’ମାନଙ୍କ ନିକଟରୁ ସେ ଆଶିଷ ନେଇଥିଲେ। ସମ୍ମିଳନୀ ଗୃହ, ବାୟୋ ଶୌଚାଳୟ, ସୋଲାର ପାନୀୟ ଜଳ, ଆଲୋକୀକରଣ ଓ ପୁଷ୍କରିଣୀ ସୌର୍ନ୍ଦ୍ୟକରଣ କାମ କରାଯିବ ବୋଲି ସେ ସୂଚନା ଦେଇଥିଲେ। ପିଲାଦିନେ ଗ୍ରାମର ପୁରାତନ ସଂସ୍କୃତି, ଐତିହ୍ୟକୁ ମନେପକାଇ ଜଣେ ସାଙ୍ଗଙ୍କ ଅନୁରୋଧକ୍ରମେ ସ୍ଥାନୀୟ ଦକ୍ଷିଣକାଳୀଙ୍କ କାଳୀପୂଜା ଅବସରରେ ଯୋଗ ଦେଇଥିବା କହିଥିଲେ। କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଆଇଟିଡିସିର ଅଧ୍ୟକ୍ଷ ଡ. ସମ୍ବିତ ପାତ୍ର, ପୁରୀ ବିଧାୟକ ଜୟନ୍ତୀ କୁମାର ଷଡ଼ଙ୍ଗୀ, ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ଶ୍ରୀଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟର ପୂର୍ବତନ କୁଳପତି ଅଲେଖ ଚନ୍ଦ୍ର ଷଡ଼ଙ୍ଗୀ, ପୂର୍ବତନ ପୋଲିସ ମହାନିର୍ଦ୍ଦେଶକ ଗୋପାଳ ଚନ୍ଦ୍ର ନନ୍ଦ, ସତ୍ୟବାଦୀ ପୂର୍ବତନ ବିଧାୟକ ରମାରଞ୍ଜନ ବଳିୟାରସିଂ, ସ୍ଥାନୀୟ ନେତା ଓମପ୍ରକାଶ ମିଶ୍ର, ପୂର୍ବତନ ବିଧାୟକ ରବି ମଲ୍ଲିକ ପ୍ରମୁଖ ଯୋଗଦେଇଥିଲେ। ଆଇଓସିଏଲର ସାଧାରଣ ପରିଚାଳକ ଧନ୍ୟବାଦ ଦେଇଥିଲେ। ଗ୍ରାମର ଗୋପାଳକୃଷ୍ଣ ଯୁବକ ସଂଘର କର୍ମକର୍ତ୍ତା, ସଦସ୍ୟ ଓ ଗ୍ରାମ୍ୟ କମିଟି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
