ବ୍ରହ୍ମପୁର ଅଫିସ,୧୯।୮: ଏଟିଏମ୍ରେ ଟଙ୍କା ଭର୍ତ୍ତି କରିବାକୁ ଯାଇଥିବା ଏକ ଗାଡ଼ି ସହ ଡ୍ରାଇଭରଙ୍କୁ ବନ୍ଧୁକ ଦେଖାଇ ବୁଧବାର ଦିନ ଦ୍ୱିପ୍ରହରରେ ଅପହରଣ କରାଯାଇଛି। ଗାଡ଼ିରୁ ୨୪ ଲକ୍ଷ ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି। ଗଞ୍ଜାମ ଜିଲା ବ୍ରହ୍ମପୁର ସହରରେ ଏହି ଘଟଣା ଚାଞ୍ଚଲ୍ୟ ଖେଳାଇ ଦେଇଛି। ବଡ଼ବଜାର ଓ ଗୋଳନ୍ଥରା ଥାନା ପୋଲିସ ଗାଡ଼ି ଓ ଚାଳକଙ୍କୁ ଗିରିସୋଲାରୁ ଉଦ୍ଧାର କରିଛି। ଚାଳକ ଅସୁସ୍ଥ ଥିବାରୁ ତାଙ୍କୁ ବଡ଼ ମେଡିକାଲରେ ଭର୍ତ୍ତିି କରାଯାଇଛି।
ଏଜିଏସ୍ କମ୍ପାନୀର ଗାଡ଼ି (ନଂ ଓଡି୦୨ବିଡି-୮୮୧୬) ବୁଧବାର ସକାଳେ ୨୬ ଲକ୍ଷ ଟଙ୍କା ନେଇ ବ୍ରହ୍ମପୁର ସହରର ବିଭିନ୍ନ ଏଟିଏମ୍ରେ ଭର୍ତ୍ତି କରିବାକୁ ଯାଇଥିଲା। ସେହି ଗାଡ଼ିରେ ଚାଳକ ଆଶିଷ ଦିଗାଲଙ୍କ ସହ ସୁରକ୍ଷା କର୍ମୀଙ୍କୁ ମିଶାଇ ମୋଟ ୪ ଜଣ ଥିଲେ। ଗାଡ଼ିଟି ଏକ ଏଟିଏମ୍ କାଉଣ୍ଟରରେ ଟଙ୍କା ଭର୍ତ୍ତିି କରି ସାରିବା ପରେ ଆସିକା ରୋଡ୍ରେ ଥିବା ଆକ୍ସିସ୍ ବ୍ୟାଙ୍କ ଏଟିଏମ୍କୁ ଯାଇଥିଲା। ସେଠାରେ ପହଞ୍ଚତ୍ବା ପରେ ଗାଡ଼ି ଚାଳକ ବାହାରେ ଅପେକ୍ଷା କରିଥିବା ବେଳେ ୨ କର୍ମଚାରୀ ଓ ସୁରକ୍ଷା କର୍ମୀ ଏଟିଏମ୍ ଭିତରକୁ ଯାଇଥିଲେ। ଏହି ସମୟରେ ୨ ଜଣ ଦୁର୍ବୃତ୍ତ ଡ୍ରାଇଭର ଆଶିଷଙ୍କ ପାଖରେ ପହଞ୍ଚତ୍ ତାଙ୍କ ମୁଣ୍ଡରେ ବନ୍ଧୁକ ରଖି ଭୟଭୀତ କରିଥିଲେ। ପରେ ସେମାନେ ଗାଡ଼ିଟିକୁ ଅପହରଣ କରି ଗିରିସୋଲାକୁ ନେଇ ଯାଇଥିଲେ। ସେଠାରେ ଚାଳକଙ୍କ ମୁହଁରେ କୌଣସି ନିଶାଦ୍ରବ୍ୟ ସ୍ପ୍ରେ କରି ୨୪ଲକ୍ଷ ଟଙ୍କା ନେଇ ଫେରାର ହୋଇଯାଇଥିଲେ। ଅନ୍ୟମାନେ ବ୍ୟାଙ୍କରୁ ଫେରି ଗାଡ଼ି ଓ ଡ୍ରାଇଭରଙ୍କୁ ନ ପାଇ ବଡ଼ବଜାର ଥାନାକୁ ଜଣାଇଥିଲେ। ଗାଡ଼ି ଓ ଡ୍ରାଇଭରଙ୍କୁ ଧରିବାକୁ ପୋଲିସ ଲୋକେଶନ ଟ୍ରାକିଂ କରିଥିଲା। ପରେ ଗୋଳନ୍ଥରା ଥାନା ପୋଲିସ ଗିରିସୋଲା ନିକଟରୁ ଗାଡ଼ିକୁ ଠାବ କରିଥିଲା। ଗାଡିରେ ଥିବା ଚାଳକ ଅଚେତ ଅବସ୍ଥାରେ ପଡ଼ିରହିଥିବା ବେଳେ ୨୪ ଲକ୍ଷ ଟଙ୍କା ନ ଥିବା ଜଣାପଡ଼ିଥିଲା। ଚାଳକ ଆଶିଷଙ୍କ ଚେତା ଫେରିବା ପରେ ସେ ଘଟଣା ସମ୍ପର୍କରେ ସମସ୍ତ ସୂଚନା ଦେଇଥିଲେ। ଗାଡ଼ି ଭିତରେ ଥିବା କମ୍ପାନୀର ୩ କର୍ମଚାରୀଙ୍କୁ ବଡ଼ବଜାର ଥାନାରେ ଅଟକ ରଖି ପଚରାଉଚରା କରାଯାଉଛି। ଏପଟେ ଘଟଣାରେ ସମ୍ପୃକ୍ତ ଦୁର୍ବୃତ୍ତଙ୍କୁ ଧରିବାକୁ ପୋଲିସର ସ୍ବତନ୍ତ୍ର ଟିମ୍ ତନାଘନା ଚଳାଇଛି।
ଏନେଇ ବ୍ରହ୍ମପୁର ଏସ୍ଡିପିଓଙ୍କୁ ପଚାରିବାରୁ ଅଭିଯୋଗ ପରେ ଅପହରଣ ହୋଇଥିବା ଗାଡ଼ି ଜବତ କରିବା ସହ ଡ୍ରାଇଭରଙ୍କୁ ଉଦ୍ଧାର କରିଛୁ। ଥାନାରେ ଏବେ ୩ଜଣଙ୍କୁ ଅଟକ ରଖାଯାଇଛି। ଡ୍ରାଇଭର ସାମାନ୍ୟ ଅସୁସ୍ଥ ଥିବାରୁ ସେ ଏବେ ବଡ଼ ମେଡିକାଲରେ ଚିକିତ୍ସାଧୀନ ଅଛନ୍ତି। ସେ ସୁସ୍ଥ ହେବା ପରେ ତାଙ୍କ ବୟାନକୁ ଆଧାର କରି ସମ୍ପୃକ୍ତ ଅଭିଯୁକ୍ତଙ୍କୁ ଧରାଯିବ ବୋଲି ସେ କହିଛନ୍ତି।
