ଡେରାଡୁନ୍,୧୬।୧: ଜୋଷୀମଠର କେତେକ ଅଞ୍ଚଳ ପାଖାପାଖି ୨.୨ ଫୁଟ୍ ଦବିପାରେ ବୋଲି ଏକ ଗ୍ରାଉଣ୍ଡ ସର୍ଭେରୁ ଜଣାପଡ଼ିଛି। ଜାନୁୟାରୀ ଆରମ୍ଭରୁ ଜୋଷୀମଠ ସହରର ଭୂମି ଦବିବା ଆରମ୍ଭ ହୋଇଥିଲା। ୧୨ ଦିନରେ ଜୋଷୀମଠ ୫.୪ ସେଣ୍ଟିମିଟର ଦବିଥିବା ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ସାଟେଲାଇଟ୍ ଡେଟା ସର୍ଭେରୁ ଜଣାପଡ଼ିଥିଲା। ବିଶେଷଜ୍ଞମାନଙ୍କର ଏକ ଟିମ୍ ଉକ୍ତ ପ୍ରଭାବିତ ଅଞ୍ଚଳକୁ ଯାଇ ସ୍ଥିତି ଅନୁଧ୍ୟାନ କରିଥିଲେ। ଏହି ଅନୁଧ୍ୟାନ ବେଳେ ଜେପି କଲୋନି ମଧ୍ୟରେ ରହିଥିବା ବ୍ୟାଡମିଣ୍ଟନ କୋର୍ଟ ଓ ଏହାର ଚତୁଃପାର୍ଶ୍ୱ ୭୦ ସେଣ୍ଟିମିଟର ଦବିଥିବା ଦେଖିବାକୁ ମିଳିଥିଲା। ସେହିପରି ମନୋହର ବାଗ୍ର କିଛି ଅଞ୍ଚଳ ୭ରୁ ୧୦ ସେଣ୍ଟିମିଟର ଦବିଥିବା ବିଶେଷଜ୍ଞମାନେ ଜାଣିବାକୁ ପାଇଥିଲେ। ସ୍ଥାନୀୟ ବାସିନ୍ଦା ଦୁର୍ଗାପ୍ରସାଦଙ୍କ ଘର ୧ଫୁଟ୍ ଏବଂ ବାରଣ୍ଡା ୨ ଫୁଟ୍ ଦବିଥିବା ସେ କହିଛନ୍ତି। ୧୫ ଦିନରେ ଏକ ହୋଟେଲ ୬ ଇଞ୍ଚ୍ ଦବିଥିବାବେଳେ ଏହା ପଛପଟେ ଥିବା ଅନ୍ୟ ଏକ ବିଲ୍ଡିଂ ହୋଟେଲ ଉପରକୁ ଢଳିପଡ଼ିଲାଣି ବୋଲି ଏହାର କେୟାର ଟେକର କହିଛନ୍ତି। ଜୋଷୀମଠର କେତେକ ଅଞ୍ଚଳ ୨.୨ ଫୁଟ୍ ପର୍ଯ୍ୟନ୍ତ ଦବିପାରେ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
ସୁପ୍ରିମକୋର୍ଟରେ ଶୁଣାଣି ଆଜି
ଜୋଷୀମଠ ଦବିବା ଫଳରେ ବହୁ ଘରଦ୍ୱାର ଓ ରାସ୍ତାରେ ବିପଜ୍ଜନକ ଫାଟ ସୃଷ୍ଟି ହୋଇଛି। ହଜାର ହଜାର ଲୋକ ବିପଦସଙ୍କୁଳ ଘରେ ବାସ କରୁଥିବାବେଳେ ଏହାକୁ ଜାତୀୟ ବିପତ୍ତି ଘୋଷଣା କରିବା ଲାଗି ସ୍ବାମୀ ଅଭିମୁକ୍ତେଶ୍ୱରାନନ୍ଦ ସରସ୍ବତୀ ସୁପ୍ରିମକୋର୍ଟରେ ଆବେଦନ କରିଥିଲେ। ସୋମବାର ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼, ଜଷ୍ଟିସ୍ ପି.ଏସ୍. ନରସିଂହା ଏବଂ ଜେ.ବି. ପର୍ଡିଓ୍ବାଲାଙ୍କ ଖଣ୍ଡପୀଠ ଏହାର ଶୁଣାଣି କରିବେ।
ମାଟି ଦବୁଥିବାରୁ ପ୍ରସିଦ୍ଧ ତୀର୍ଥକ୍ଷେତ୍ର ବଦ୍ରିନାଥ, ହେମକୁଣ୍ଡ ସାହିବ ଏବଂ ଔଲିର ଦ୍ୱାର କୁହାଯାଉଥିବା ଜୋଷୀମଠ ସହର ବଡ଼ ଧରଣର ସଙ୍କଟର ସମ୍ମୁଖୀନ ହୋଇଛି। ଫାଟ ସୃଷ୍ଟି ହୋଇ ଅନେକ ଘର ଢଳିବା ସହ ଦବିଗଲାଣି।
