ନୂଆଦିଲ୍ଲୀ, ୮।୮: କରୋନା ମହାମାରୀ ଏପର୍ଯ୍ୟନ୍ତ ଭାରତରେ ୧୯୬ ଜଣ ଡାକ୍ତରଙ୍କ ଜୀବନ ନେଇସାରିଲାଣି। ସେମାନଙ୍କ ମଧ୍ୟରୁ ଅଧିକାଂଶ ସାଧାରଣ ଚିକିତ୍ସକ। ଇଣ୍ଡିଆନ ମେଡିକାଲ ଆସୋସିଏଶନ (ଆଇଏମ୍ଏସ୍) ପକ୍ଷରୁ ଶନିବାର ଏହି ସୂଚନା ଦିଆଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଥିପ୍ରତି ବିଶେଷ ଧ୍ୟାନ ଦେବାକୁ ଆଇଏମ୍ଏସ୍ ପକ୍ଷରୁ ଏହି ଅବସରରେ ନିବେଦନ କରାଯାଇଛି।
ସଂକ୍ରମିତ ଡାକ୍ତରଙ୍କ ସଂଖ୍ୟା ବୃଦ୍ଧି ପାଇଛି। ଅନେକ ଡାକ୍ତର ପ୍ରତିଦିନ ପ୍ରାଣ ହରାଉଛନ୍ତି। କରୋନା ବିରୋଧୀ ଯୁଦ୍ଧରେ ଜୀବନକୁ ବିପଦରେ ପକାଇ ସେବା ଯୋଗାଇ ଆସୁଥିବା ଡାକ୍ତରଙ୍କ ସୁରକ୍ଷାକୁ ନେଇ ଆଇଏମ୍ଏସ୍ ଉଦ୍ବେଗ ପ୍ରକାଶ କରିଛି। ଆଇଏମ୍ଏସ୍ ପକ୍ଷରୁ ସଂଗୃହୀତ ତଥ୍ୟ ଅନୁଯାୟୀ ୭ ଅଗଷ୍ଟ ସୁଦ୍ଧା କରୋନା ଲାଗି ଦେଶ ୧୯୬ ଜଣ ଡାକ୍ତରଙ୍କୁ ହରାଇଛି। ସେମାନଙ୍କ ମଧ୍ୟରୁ ୧୭୦ ଜଣଙ୍କ ବୟସ ୫୦ ବର୍ଷରୁ ଊର୍ଦ୍ଧ୍ୱ ଥିବା ଜଣାପଡ଼ିଛି। ସେହିଭଳି ପ୍ରାଣ ହରାଇଥିବା ଡାକ୍ତରଙ୍କ ମଧ୍ୟରୁ ୪୦ ପ୍ରତିଶତ ସାଧାରଣ ଚିକିତ୍ସକ ଥିଲେ। ଯେହେତୁ ଅଧିକାଂଶ ଲୋକ ଜ୍ୱର କିମ୍ବା ଥଣ୍ଡା ହେଲାପରେ ସାଧାରଣ ଚିକିତ୍ସକଙ୍କ ନିକଟକୁ ଯାଇଥାନ୍ତି ତେଣୁ ସେମାନେ ହିଁ ସର୍ବପ୍ରଥମେ ସଂକ୍ରମଣର ଶିକାର ହୋଇଥାନ୍ତି।
