ଭୁବନେଶ୍ୱର,୨୧।୭(ଅନୁରାଧା ମହାରଣା): କର୍ମଚାରୀ ଭବିଷ୍ୟନିଧି ସଙ୍ଗଠନ (ଇପିଏଫ୍ଓ) ୨୦୨୪ ମେ’ ମାସର ତଥ୍ୟ ପ୍ରକାଶ କରିଛି। ତଥ୍ୟ ଅନୁଯାୟୀ, ମେ’ ମାସରେ ୧୯.୫୦ ଲକ୍ଷ ସଦସ୍ୟ ଇପିଏଫ୍ଓରେ ଯୋଗଦେଇଛନ୍ତି। ତେବେ ୨୦୧୮ ଏପ୍ରିଲଠାରୁ ବର୍ତ୍ତମାନ ସୁଦ୍ଧା ମେ’ ମାସରେ ସର୍ବାଧିକ ସଦସ୍ୟ ଯୋଡ଼ିହୋଇଥିବା ଜଣାପଡ଼ିଛି। ଶ୍ରମ ମନ୍ତ୍ରଣାଳୟ ପକ୍ଷରୁ ପ୍ରକାଶିତ ତଥ୍ୟ ଅନୁଯାୟୀ, ୨୦୨୩ ମେ’ ତୁଳନାରେ ଚଳିତ ବର୍ଷ ମେ’ରେ ଇପିଏଫ୍ଓ ସଦସ୍ୟଙ୍କ ସଂଖ୍ୟାରେ ୧୯.୬୨ ପ୍ରତିଶତ ବୃଦ୍ଧି ପାଇଛି। ମେ ୨୦୨୪ରେ ମୋଟ ୯.୮୫ ଲକ୍ଷ ନୂତନ ସଦସ୍ୟ ଇପିଏଫ୍ଓରେ ଯୋଗଦେଇଛନ୍ତି। ଏପ୍ରିଲ ତୁଳନାରେ ନୂତନ ସଦସ୍ୟଙ୍କ ସଂଖ୍ୟା ୧୦.୯୬ ପ୍ରତିଶତ ବୃଦ୍ଧି ପାଇଛି। ଏଥିସହ ବାର୍ଷିକ ଭିତ୍ତିରେ ୧୧.୫ ପ୍ରତିଶତ ବୃଦ୍ଧି ରେକର୍ଡ କରାଯାଇଛି। ଏହି ସମୟ ମଧ୍ୟରେ ମୋଟ ନୂତନ ସଦସ୍ୟଙ୍କ ମଧ୍ୟରେ ୧୮ରୁ ୨୫ ବର୍ଷ ବୟସର ଯୁବକମାନଙ୍କ ଅଂଶ ୫୮.୩୭ ପ୍ରତିଶତ ରହିଛି। ଏମାନଙ୍କ ମଧ୍ୟରୁ ଅଧିକାଂଶ ହେଉଛନ୍ତି ଯେଉଁମାନେ ପ୍ରଥମ ଥର ପାଇଁ ଚାକିରି ପାଇଛନ୍ତି। ମେ’ ରେ ସର୍ବାଧିକ ସଂଖ୍ୟକ ଯୁବକ ଚାକିରି ପାଇଥିବାବେଳେ ସମୁଦାୟ ୧୪.୦୯ ଲକ୍ଷ ଲୋକ ଚାକିରି ଛାଡ଼ି ଅନ୍ୟତ୍ର ଯୋଗ ଦେଇଛନ୍ତି। ମେ’ରେ ମୋଟ ୩.୬୯ ଲକ୍ଷ ମହିଳା ସଦସ୍ୟ ଯୋଗ ଦେଇଥିବାବେଳେ ନୂତନ ସଦସ୍ୟଙ୍କ ମଧ୍ୟରୁ ୨.୪୮ ଲକ୍ଷ ମହିଳା ଅଛନ୍ତି। ଏହି ପରିସ୍ଥିତିରେ, ମେ ୨୦୨୩ ତୁଳନାରେ ୧୭.୨୪ ପ୍ରତିଶତ ବୃଦ୍ଧି ଘଟିଛି। ତଥ୍ୟ ଅନୁଯାୟୀ, ସର୍ବାଧିକ ୫୮.୨୪ ପ୍ରତିଶତ ସଦସ୍ୟ ମହାରାଷ୍ଟ୍ର, ତାମିଲନାଡୁ, ଗୁଜରାଟ, କର୍ନାଟକ ଏବଂ ହରିୟାଣାରୁ ଅଛନ୍ତି। ଏହି ରାଜ୍ୟଗୁଡିକରୁ ସର୍ବାଧିକ ୧୧.୩୬ ଲକ୍ଷ ନୂତନ ସଦସ୍ୟ ଯୋଗ ଦେଇଛନ୍ତି। ଏଥିରେ ସର୍ବାଧିକ ୧୮.୮୭ ପ୍ରତିଶତ ମହାରାଷ୍ଟ୍ରର ସଦସ୍ୟ ରହିଛନ୍ତି। ଅଧିକାଂଶ ଇପିଏଫ୍ଓ ସଦସ୍ୟ ଇଞ୍ଜିନିୟରିଂ କ୍ଷେତ୍ର ସାଙ୍ଗକୁ ନିର୍ମାଣ, ମାନବ ସମ୍ବଳ ଏବଂ ଇଲେକ୍ଟ୍ରୋନିକ୍ ମିଡିଆ କମ୍ପାନୀ ସହ ଜଡ଼ିତ ବୋଲି ସୂଚନା ରହିଛି।
