କୃଷ୍ଣପ୍ରସାଦ,୨୪।୭(ଡି.ଏନ୍.ଏ.): ଫାଇଲିନ୍ ବାତ୍ୟାରେ କ୍ଷତିଗ୍ରସ୍ତଙ୍କୁ ବାସଗୃହ ଯୋଗାଣ ଦାବିରେ ଶୁକ୍ରବାର ଠାରୁ ପୁରୀ ଜିଲା କୃଷ୍ଣପ୍ରସାଦ ଓ ବ୍ରହ୍ମଗିରି ଅଞ୍ଚଳର ବାତ୍ୟା ନିରୋଧକ ମଞ୍ଚ ପକ୍ଷରୁ କୃଷ୍ଣପ୍ରସାଦ ବ୍ଲକ ଆଗରେ ଧାରଣା ଦିଆଯାଇଛି। ମଞ୍ଚ ଆବାହକ ସୁବାସ ଚନ୍ଦ୍ର ଜେନାଙ୍କ ନେତୃତ୍ୱରେ ଅଞ୍ଚଳର ଶତାଧିକ ମହିଳା ପୁରୁଷ ହିତାଧିକାରୀ ଏଥିରେ ସାମିଲ ହୋଇଛନ୍ତି। ବ୍ଲକ ଛକରୁ ଶୋଭାଯାତ୍ରାରେ ଫାଇଲିନ କ୍ଷତିଗ୍ରସ୍ତମାନେ ଗୃହ ଯୋଗାଣର ନାରା ଦେଇ ବ୍ଲକ ଫାଟକ ସମ୍ମୁଖରେ ପହଞ୍ଚିଥିଲେ। ସେଠାରେ ଏକ ପ୍ରତିବାଦ ସଭା ଆୟୋଜିତ ହୋଇଥିଲା। ୨୦୧୩ ମସିହାରେ ହୋଇଥିବା ଫାଇଲିନ ବାତ୍ୟାର କ୍ଷତିଗ୍ରସ୍ତଙ୍କୁ ଓଡିଆର୍ପି ଯୋଜନାରେ ଗୃହ ଯୋଗାଇଦେବା ପାଇଁ ୪୮୩୨ ହିତାଧିକାରୀଙ୍କୁ ସରକାର ତାଲିକାଭୁକ୍ତ କରିଥିଲେ। ୩୦୪୬ ଜଣଙ୍କୁ ଏହି ସୁବିଧା ମିଳିଥିବା ବେଳେ ୧୭୮୬ ଜଣ ଏଥିରୁ ଏବେ ବି ବଞ୍ଚିତ ଅଛନ୍ତି। ତନ୍ମଧ୍ୟରୁ ଫାଇଲିନ କ୍ଷତିଗ୍ରସ୍ତ କାର୍ତ୍ତିକ ଦଳେଇ ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହେବାରୁ ବାତ୍ୟା ନିରୋଧକ ବାସଗୃହ ପାଇପାରିଥିଲେ। ସେହିଭଳି ୫୬ଟି ମାମଲା ଉଚ୍ଚ ନ୍ୟାୟାଳୟ କାର୍ଯ୍ୟକାରୀ କରିବାକୁ ଅନୁମତି ଦେଇଥିଲେ ମଧ୍ୟ ତାହା କାର୍ଯ୍ୟକାରୀ ହୋଇପାରୁନାହିଁ। ଏହାର ପ୍ରତିବାଦରେ ବ୍ଲକ ସମ୍ମୁଖରେ ଅହୋରାତ୍ର ଧାରଣା ଆରମ୍ଭ ହୋଇଛି। ଉଚ୍ଚ ନ୍ୟାୟାଳୟଙ୍କ ଡବ୍ଲୁପିସି ନିର୍ଦ୍ଦେଶ ଏବଂ ରାଜ୍ୟ ସରକାରଙ୍କ ଓଡିଆର୍ପି ତାଲିକାକୁ କାର୍ଯ୍ୟକାରୀ କରିବା ଦାବିରେ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ଜିଲାପାଳ, କୃଷ୍ଣପ୍ରସାଦ ମଣ୍ଡଳ ଉନ୍ନୟନ ଅଧିକାରୀଙ୍କୁ ଦାବିପତ୍ର ପ୍ରଦାନ କରାଯାଇଛି। ତେବେ କୌଣସି ଅଧିକାରୀ ଆନ୍ଦୋଳନସ୍ଥଳରେ ନ ପହଞ୍ଚିବାରୁ ଶନିବାର ଧାରଣା ଦ୍ୱିତୀୟ ଦିନରେ ପହଞ୍ଚିଛି। ମଞ୍ଚ ସମ୍ପାଦକ ପ୍ରକାଶ ଚନ୍ଦ୍ର ବିଶ୍ୱାଳ, ଉପେନ୍ଦ୍ର ଜେନା, ତ୍ରିନାଥ ଜେନା, ଖଗେଶ୍ବର ପ୍ରଧାନ, ଅଭିମନ୍ୟୁ ଜଗଦ୍ଦେବ, ହଜାରୀ ପାହାନ, ସୁଲୋଚନା ନାୟକ, ମାଟିଆଣି ଘଡେଇ, ଚିତ୍ରସେନ ପାହାନଙ୍କ ସମେତ ଶତାଧିକ ହିତାଧିକାରୀ ଧାରଣାରେ ସାମିଲ ହୋଇଛନ୍ତି। ଦାବି ପୂରଣ ନ ହେବା ଯାଏ ଆନ୍ଦୋଳନ ଜାରି ରହିବ ବୋଲି ମଞ୍ଚର ଆବାହକ ସୁବାସ ଚନ୍ଦ୍ର ଜେନା କହିଛନ୍ତି।
