ନୂଆଦିଲ୍ଲୀ, ୨୭ା୭: କର୍ନାଟକର ମାଣ୍ଡ୍ୟା ଏବଂ ୟାଦଗିରି ଜିଲାରେ ଲିଥିୟମ୍ ଖଣିର ସନ୍ଧାନ ମିଳିଥିବା କେନ୍ଦ୍ର ଭୂବିଜ୍ଞାନ ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂ ରାଜ୍ୟ ସଭାକୁ ସୂଚନା ଦେଇଛନ୍ତି। ଉପରୋକ୍ତ ୨ ଜିଲାର ଖଣିରେ ୧,୬୦୦ ଟନ୍ ଓଜନର ଲିଥିୟମ୍ ମହଜୁଦ ଥିବା ଆଟୋମିକ୍ ମିନେରାଲ୍ସ ଡାଇରେକ୍ଟୋରେଟ୍ ଫର୍ ଏକ୍ସପ୍ଲୋରେଶନ ଆଣ୍ଡ ରିସର୍ଚ୍ଚ (ଏଏମ୍ଡି) ଆକଳନ କରିଛି। ଉଭୟ ଖଣିର ପ୍ରାରମ୍ଭିକ ସର୍ଭେ ଓ ସୀମିତ ଅନ୍ବେଷଣ କରାଯାଇଥିବା ମନ୍ତ୍ରୀ ଗୃହକୁ କହିଛନ୍ତି। ଛତିଶଗଡ଼ର କୋର୍ବା ଜିଲାରେ ମଧ୍ୟ ଲିଥିୟମ୍ ଥିବା ନେଇ ଅନୁସନ୍ଧାନ ଚାଲିଛି। ସେହିପରି ରାଜସ୍ଥାନ, ବିହାର, ଆନ୍ଧ୍ରପ୍ରଦେଶରେ ରହିଥିବା ମାଇକା ବେଲ୍ଟ ଏବଂ ଓଡ଼ିଶା, ଛତିଶଗଡ଼ ଓ କର୍ନାଟକରେ ରହିଥିବା ପେଗ୍ମାଟାଇଟ୍ ବେଲ୍ଟରେ ସମ୍ଭାବ୍ୟ ଲିଥିୟମ ସମ୍ପଦ ଥିବା ନେଇ ଭୂତତ୍ତ୍ୱ ବିଭାଗ ଅନ୍ବେଷଣ ଚଳାଇଥିବା ମନ୍ତ୍ରୀ କହିଛନ୍ତି।
