ଚମ୍ପୁଆ,୬।୧୨(ମହେଶ୍ୱର ଦାସ): କେନ୍ଦୁଝର ଜିଲା ଚମ୍ପୁଆ ଉପଖଣ୍ଡ କାଳିକାପ୍ରସାଦ ରିଜର୍ଭ ଫରେଷ୍ଟରେ ୩୦ ବର୍ଷୀୟ ମାଈ ହାତୀର ଗଳିତ ମୃତଦେହ ଜବତ ଘଟଣାରେ ମଙ୍ଗଳବାର ଜଏଣ୍ଟ୍ ଟାସ୍କ ଫୋର୍ସ(ଜେଟିଏଫ୍) ଟିମ୍ ତଦନ୍ତ କରିଛି। ଟିମ୍ ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଇଛି। ଘଟଣାରେ ବିଦ୍ୟୁତ୍ ବିଭାଗୀୟ ଅଧିକାରୀମାନେ ମଧ୍ୟ ନିରୀକ୍ଷଣ କରିଛନ୍ତି।
ଯେ, ରିଜର୍ଭ ଫରେଷ୍ଟ ଚେଙ୍ଗଯୋଡ଼ାଠାରେ ହାତୀ ମୃତ୍ୟୁର କାରଣ ବିଦ୍ୟୁତ୍ ଜନିତ ହୋଇଥିବା ବନ ବିଭାଗ ସନ୍ଦେହ କରୁଛି। ମାତ୍ର ବିଦ୍ୟୁତ୍ ବିଭାଗ ଏହାକୁ ଖଣ୍ଡନ କରୁଛି। ଏହାକୁ ନେଇ ବନ ବିଭାଗ ତଦନ୍ତକାରୀ ଟିମ୍ ନମୁନା ସଂଗ୍ରହ କରିବା ସହ ବିଭିନ୍ନ ଦିଗ ପ୍ରତି ଦୃଷ୍ଟି ରଖିଛି। ବିଦ୍ୟୁତ୍ ବିଭାଗ ପକ୍ଷରୁ ମଧ୍ୟ ହାତୀ ମରିପଡ଼ିଥିବା ସ୍ଥାନରୁ ୩୩ କେଭି ଖୁଣ୍ଟ୍କୁ ମାପଚୁପ କରାଯାଇଥିଲା। ପରେ ବନ ବିଭାଗ ପକ୍ଷରୁ ନମୁନା ସଂଗ୍ରହ କରାଯାଇ ଉକ୍ତ ଜଙ୍ଗଲରେ ଗାତ ଖୋଳାଯାଇ ଗଳିତ ହାତୀ ମୃତଦେହକୁ ପୋତାଯାଇଥିଲା। ତଦନ୍ତ ବେଳେ ଜେଟିଏଫ୍ ସଦସ୍ୟ ଶ୍ରୀରାମପଦ ଅରୋବିନ୍ଦ ମିଶ୍ର, ଆର୍ସିସିଏଫ୍ ଅରୁଣ ମିଶ୍ର, ସହକାରୀ ବନ ସଂରକ୍ଷକ ଅଶୋକ ଦାସ, କେନ୍ଦୁଝର ବନଖଣ୍ଡ ଅଧିକାରୀ ଡିଡି ହନୁମନ୍ତ, ଚମ୍ପୁଆ ବନାଞ୍ଚଳ ଅଧିକାରୀ ଅକ୍ଷୟ ଛତ୍ରିଆ ପ୍ରମୁଖ ଉପସ୍ଥିତ ଥିଲେ। ବିଦ୍ୟୁତ୍ ବିଭାଗର ଅଧୀକ୍ଷଣ ଯନ୍ତ୍ରୀ ରଶ୍ମିରଞ୍ଜନ ବେହେରା, ନିର୍ବାହୀଯନ୍ତ୍ରୀ ମନୋରଞ୍ଜନ ଜେନା, ଚମ୍ପୁଆ ବିଦ୍ୟୁତ୍ ବିଭାଗ ଅଧିକାରୀ ନାରାୟଣ ବେହେରା ପ୍ରମୁଖ ଉପସ୍ଥିତ ଥିଲେ। ମୃତ ହାତୀଟିର ନମୁନା ଓୟୁଏଟି ପଠାଯିବା ସହ ରିପୋର୍ଟ ଆସିଲେ ମୃତ୍ୟୁର କାରଣ ଜଣାପଡ଼ିବ ବୋଲି ବନବିଭାଗ ସୂଚନା ଦେଇଛି। ଏ ନେଇ ବନଖଣ୍ଡ ଅଧିକାରୀ ହନୁମନ୍ତ କହିଛନ୍ତି, ଏହା ଏକ ଦୁଃଖଦ ଘଟଣା। ତଦନ୍ତ ଚାଲିଛି, ପରେ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
