ଟୋକିଓ,୨୪ା୫: ଚାଇନାର ଦାଦାଗିରିକୁ ଦୃଷ୍ଟିରେ ରଖି ଆମେରିକା ଅଣପାରମ୍ପରିକ ବାଣିଜ୍ୟ ଚୁକ୍ତିନାମା ଆରମ୍ଭ କରିଛି। ଇଣ୍ଡୋ-ପାସିଫିକ୍ ଇକୋନୋମିକ୍ ଫ୍ରେମ୍ଓ୍ବାର୍କ (ଆଇପିଇଏଫ୍)ରେ ଭାରତ ସମେତ ୧୨ଟି ରାଷ୍ଟ୍ରକୁ ସାମିଲ କରାଯାଇଛି। ଆଇପିଇଏଫ୍ ଏକ ପାରମ୍ପରିକ ବାଣିଜ୍ୟ ଡିଲ୍ ନୁହେଁ, ବରଂ ଅର୍ଥନୈତିକ ବ୍ୟବସ୍ଥାର ଏକ ନୂଆ ନମୁନା। ଏହି ଡିଲ୍ ଏକବିଂଶ ଶତାବ୍ଦୀରେ ବାଣିଜ୍ୟ, କାରିଗରି ଏବଂ ଯୋଗାଣ ଶୃଙ୍ଖଳ ପାଇଁ ସର୍ତ୍ତ ଓ ନିୟମ ଧାର୍ଯ୍ୟ କରିବ ବୋଲି ଆମେରିକାର ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଜେକ୍ ସୁଲ୍ଲିଭିଆନ୍ ସୂଚନା ଦେଇଛନ୍ତି। ଆମେରିକା ରାଷ୍ଟ୍ରପତି ଜୋ ବାଇଡେନ୍, ଜାପାନ ପ୍ରଧାନମନ୍ତ୍ରୀ ଫୁମିଓ କିଶିଡା, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଅନ୍ୟ ସହଯୋଗୀ ରାଷ୍ଟ୍ରର ପ୍ରତିନିଧିମାନଙ୍କ ଉପସ୍ଥିତିରେ ଏହି ଫୋରମ୍ ଗଠନ କରାଯାଇଛି। ଆଇପିଇଏଫ୍ର ଅନ୍ୟ ସଦସ୍ୟ ରାଷ୍ଟ୍ର ହେଲେ ଅଷ୍ଟ୍ରେଲିଆ, ବ୍ରୁନେଇ, ଇଣ୍ଡୋନେସିଆ, ଜାପାନ, ଦକ୍ଷିଣ କୋରିଆ, ମାଲେସିଆ, ନ୍ୟୁଜିଲାଣ୍ଡ, ଫିଲିପାଇନ୍ସ, ସିଙ୍ଗାପୁର, ଥାଇଲାଣ୍ଡ ଓ ଭିଏତ୍ନାମ। ବିଶ୍ୱର ମୋଟ ଘରୋଇ ଉତ୍ପାଦ (ଜିଡିପି)ର ୪୦% ଅବଦାନ ହେଉଛି ଏହି ୧୨ ସହଯୋଗୀ ରାଷ୍ଟ୍ରର। ଏହି ଅବସରରେ ଶକ୍ତି, ଯୋଗାଣ ଶୃଙ୍ଖଳ ଓ ଡିଜିଟାଲ ଟ୍ରେଡ୍ କ୍ଷେତ୍ରରେ ସମଭାବାପନ୍ନ ରାଷ୍ଟ୍ରଗୁଡ଼ିକ ମିଳିତ ଭାବେ କାର୍ଯ୍ୟ କରିବେ ବୋଲି ବାଇଡେନ୍ କହିଛନ୍ତି। ଉଦ୍ଘାଟନୀ ସମାରୋହରେ ମୋଦି କହିଥିଲେ, ଆଇପିଇଏଫ୍ ହେଉଛି ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରକୁ ବିଶ୍ୱ ଆର୍ଥତ୍କ ଅଭିବୃଦ୍ଧିର ଇଞ୍ଜିନରେ ପରିଣତ କରିବା ପାଇଁ ଏକ ସାମଗ୍ରିକ ଆଗ୍ରହକୁ ନେଇ ଘୋଷଣାନାମା। ସହଯୋଗୀ ରାଷ୍ଟ୍ରଗୁଡ଼ିକ ସମ୍ମୁଖୀନ ହେଉଥିବା ଆର୍ଥିକ ଆହ୍ବାନଗୁଡ଼ିକର ମୁକାବିଲା ପାଇଁ ଗଠନମୂଳକ ପନ୍ଥା ବାହାର କରିବା ଆବଶ୍ୟକ। ସମସ୍ତ ଇଣ୍ଡୋ-ପାସିଫିକ୍ ଦେଶକୁ ନେଇ ଭାରତ କାର୍ଯ୍ୟ କରିବାକୁ ପ୍ରତିଶ୍ରୁତିବଦ୍ଧ।
