ବେଜିଂ,୧୨।୪: ଚାଇନାର ଜଣେ ବାଳକର କାହାଣୀ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି। ଚାଇନାର ଗଣମାଧ୍ୟମ ଅନୁଯାୟୀ, ୧୧ ବର୍ଷର ବାଳକ ତାଙ୍କ ଜେଜେ ମା’ଙ୍କୁ ଭେଟିବାକୁ ଚବିଶ ଘଣ୍ଟା ମଧ୍ୟରେ ସାଇକେଲରେ ୧୩୦ କିଲୋମିଟର ଯାତ୍ରା କରିଛନ୍ତି। ସାଉଥ ଚାଇନା ମର୍ନିଂ ପୋଷ୍ଟ ଅନୁଯାୟୀ, ମାଆଙ୍କ ସହ ଝଗଡା ପରେ ବାଳକଜଣଙ୍କ ଅସନ୍ତୋଷ ପ୍ରକାଶ କରିଥିଲେ। ଏହା ପରେ ସେ ତାଙ୍କ ଜେଜେ ମା’ଙ୍କ ନିକଟରେ ଅଭିଯୋଗ କରିବାକୁ ଯୋଜନା କରିଥିଲେ। ହେଲେ ବାଳକଟିର ଜେଜେ ମା’ ତାଙ୍କଠାରୁ ୧୩୦ କିଲୋମିଟର ଦୂରରେ ରହୁଥିଲେ। ଏତେ ଦୂରତା ପରେ ମଧ୍ୟ ସେ ସାଇକେଲରେ ଘରୁ ବାହାରି ଆସିଥିଲେ।
ଗଣମାଧ୍ୟମର ରିପୋର୍ଟ ଅନୁଯାୟୀ, ୨୪ ଘଣ୍ଟା ଧରି ଲଗାତାର ସାଇକେଲ ଯୋଗେ ଯାତ୍ରା କରି ସେହି ବାଳକଜଣଙ୍କ ଥକି ଯାଇଥିଲେ, ଯାହା ପରେ ସେ ବାଟରେ ବିଶ୍ରାମ ନେଇଥିଲେ। ବାଟ ଦେଇ ଯାଉଥିବା ଲୋକମାନେ ପିଲାଟିକୁ ପଚାରିଥିଲେ। ତା’ପରେ କେହି ଜଣେ ବାଳକ ବିଷୟରେ ପୋଲିସକୁ ସୂଚନା ଦେଇଥିଲେ। ପୋଲିସ ସେଠାରେ ପହଞ୍ଚି ପିଲାଟିକୁ ସାଙ୍ଗରେ ନେଇଥିଲା। ନିଜର ଯାତ୍ରା ବିଷୟରେ, ବାଳକଜଣଙ୍କ କହିଥିଲେ ଯେ, ସେ ଅନେକ ସ୍ଥାନରେ ରାସ୍ତା ଭୁଲିଯାଇଥିଲେ, ଯେଉଁଥିପାଇଁ ପହଞ୍ଚିବାକୁ ତାଙ୍କୁ ଅଧିକ ସମୟ ଲାଗିଥିଲା। େିବେ ସେ ତାଙ୍କ ଜେଜେ ମା’ଙ୍କ ଘରୁ ମାତ୍ର ଏକ ଘଣ୍ଟା ଦୂରରେ ଥିଲେ।
ଏହି ଘଟଣା ସମ୍ପର୍କରେ ସୂଚନା ପାଇବା ପରେ ବାଳକଙ୍କ ମାଆ ଭୟଭୀତ ହୋଇପଡିଥିଲେ। ପୁଅ ସହିତ ଝଗଡା ସମ୍ପର୍କରେ ମା କହିଥିଲେ ଯେ, ସେ ଜେଜେମା’ଙ୍କ ପାଖକୁ ଯିବାକୁ ଧମକ ଦେଇଥିଲେ କିନ୍ତୁ ମୁଁ ଭାବିଲି ସେ କ୍ରୋଧରେ ଏହା କହୁଛନ୍ତି। ଜେଜେ ମା’ ଏଠାରୁ ପ୍ରାୟ ୧୫୦ କିଲୋମିଟର ଦୂରରେ ଥିବା ଜେଜିଆଙ୍ଗରେ ରୁହନ୍ତି।
