ନୂଆଦିଲ୍ଲୀ : ଚାଇନାର ଅନ୍ଲାଇନ ବେଟିଂ ବା ଜୁଆ ଆପ୍ ଦ୍ୱାରା ୧୦୦୦ କୋଟିର ଟ୍ରାଞ୍ଜାକଶନ ହୋଇଛି। ଏହି ମାମଲା ଉପରେ ପ୍ରବର୍ତ୍ତନ ନିର୍ଦ୍ଦେଶାଳୟ ତଦନ୍ତ କରୁଥିବା ଜଣାପଡିଛି। ପେଟିଏମ୍ ଏବଂ ଏଚ୍ଏସ୍ବିସି ବ୍ୟାଙ୍କ ଦ୍ୱାରା ଏହି ନେଣଦେଣ ହୋଇଛି। କେଉଁମାନଙ୍କ ନିକଟକୁ ଏହି ଅର୍ଥ ଆସିଛି ତା’ର ତଦନ୍ତ ଏହି ଏଜେନ୍ସି କରୁଥିବା ସୂଚନା ରହିଛି। ପେମେଣ୍ଟ ଗେଟ୍ଓ୍ବେର ବ୍ୟବହାର ବିଦେଶୀ ନେଣଦେଣ ଲାଗି କରାଯାଇଥିବା ଇଡି ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ହାଇଦ୍ରାବାଦର ବେଆଇନ ଅର୍ଥ କାରବାର ନିରୋଧ ଆଇନ ଅଦାଲତ ଏହି ମାମଲାରେ ଜଡିତ ଥିବା ଚାଇନା ନାଗରିକ ୟାନ୍ ହୋ ଏବଂ ତାଙ୍କର ଦୁଇ ସହଯୋଗୀ ଧୀରଜ ସରକାର ଓ ଅଙ୍କିତ କପୁରଙ୍କୁ ଆଠଦିନ ଲାଗି ଇଡି ହେପାଜତରେ ନେବା ଲାଗି ଅନୁମତି ଦେଇଛନ୍ତି। ଅନ୍ଲାଇନ ବେଟିଂ ଏବଂ ବେଆଇନ ଅର୍ଥ କାରବାର ମାମଲାରେ ଚଳିତ ମାସ ୧୫ ତାରିଖରେ ଏମାନଙ୍କୁ ଗିରଫ କରାଯାଇଥିଲା। ମାମଲାରେ ସମ୍ପୃକ୍ତ ଥିବା ବ୍ୟକ୍ତିବିଶେଷଙ୍କୁ ବର୍ତ୍ତମାନ ଚିହ୍ନଟ କରାଯାଉଛି। ସେହିଭଳି ପେଟିଏମ୍ରେ କାହାକୁ ଫାଇଦା ମିଳିଛି ସେ ନେଇ ମଧ୍ୟ ଖୋଳତାଡ଼ କରାଯାଉଛି। କମ୍ପାନୀର ନିର୍ଦ୍ଦେଶକଙ୍କୁ ମଧ୍ୟ ସମନ ଜାରି କରାଯାଇଛି।
