ନୂଆଦିଲ୍ଲୀ, ୧୧।୮(ପି.ଟି.): ହାତୀ ଓ ମଣିଷ ମଧ୍ୟରେ ସଂଘର୍ଷ ଲାଗି ରହିଛି। ଏହି ଲଢ଼େଇରେ ବର୍ଷକୁ ୫୦୦ରୁ ଊର୍ଦ୍ଧ୍ୱ ଲୋକ ଏବଂ ୧୦୦ ହାତୀ ପ୍ରାଣ ହରାଉଥିବା ପରିବେଶ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ୧୨ ତାରିଖ ବିଶ୍ୱ ହସ୍ତୀ ଦିବସ ପୂର୍ବରୁ ମନ୍ତ୍ରଣାଳୟ ଏହି ସୂଚନା ଦେଇଛି। ୨୦୧୭ରେ ହୋଇଥିବା ଗଣନା ଅନୁଯାୟୀ ଭାରତରେ ୩୦ ହଜାର ହାତୀ ରହିଥିଲେ। ପରିବେଶ ସନ୍ତୁଳନରେ ହାତୀମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିବାରୁ ସେମାନଙ୍କର ସଂରକ୍ଷଣ ଅତି ଜରୁରୀ ବୋଲି କେନ୍ଦ୍ର ପରିବେଶ ମନ୍ତ୍ରୀ ପ୍ରକାଶ ଜାଭଡେକର ଏକ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି। ହାତୀ ଜନବସତିମୁହାଁ ନ ହୋଇ ଜଙ୍ଗଲ ମଧ୍ୟରେ ଯେପରି ରହିବେ ସେଥିପାଇଁ ପର୍ଯ୍ୟାପ୍ତ ଖାଦ୍ୟ ଓ ଜଳ ଉପଲବ୍ଧ କରାଇବା ଲାଗି କାର୍ଯ୍ୟକ୍ରମ ଗ୍ରହଣ କରାଯାଇଛି। ଆସନ୍ତାବର୍ଷ ସୁଦ୍ଧା ଏହାର ଫଳାଫଳ ମିଳିଯିବ ବୋଲି ମନ୍ତ୍ରୀ କହିଛନ୍ତି।
ଗତ ମେ’ ୨୭ରେ କେରଳରେ ସପୁରି ଭିତରେ ବାଣ ପୂରାଇ ଗର୍ଭିଣୀ ହାତୀକୁ ଖାଇବାକୁ ଦେଇ ମାରିବା ଘଟଣାକୁ କେନ୍ଦ୍ର ପରିବେଶ ରାଷ୍ଟ୍ରମନ୍ତ୍ରୀ ବାବୁଲ ସୁପ୍ରିୟୋ ନିନ୍ଦା କରିଛନ୍ତି। ହାତୀମାନଙ୍କୁ ସୁରକ୍ଷା ଦେବାକୁ ହେବ। କେରଳ ଘଟଣା ଅମାନବିକତାର ପରିଚୟ। ଏଭଳି ଅପରାଧ ବିରୋଧରେ କଠୋର ଓ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୁପ୍ରିୟୋ କହିଥିଲେ। ଦେଶରେ ପ୍ରତିବର୍ଷ ଘଟୁଥିବା ହାତୀ-ମଣିଷ ସଂଘର୍ଷ ସମ୍ପର୍କରେ ଜଙ୍ଗଲ ବିଭାଗ ଅତିରିକ୍ତ ମହାନିର୍ଦ୍ଦେଶକ ସୌମିତ୍ର ଦାସଗୁପ୍ତା ସୂଚନା ଦେଇଥିଲେ। ସେ କହିଥିଲେ ଶହ ଶହ ହାତୀ ବାସସ୍ଥାନ ଛାଡ଼ି ଜନବସତିମୁହାଁ ହେଉଥିବାରୁ ଏଭଳି ସଂଘର୍ଷ ଘଟୁଛି। ଏଥିରେ ବର୍ଷକୁ ୫୦୦ରୁ ଅଧିକ ଲୋକଙ୍କ ଜୀବନ ଯିବା ସହ ୧୦୦ ହାତୀଙ୍କ ମୃତ୍ୟୁ ଘଟୁଛି। ହାତୀ ସଂରକ୍ଷଣ ଲାଗି ଗତ ୫ ବର୍ଷ ମଧ୍ୟରେ ଅନେକ ପଦକ୍ଷେପ ନିଆଯାଇଛି। ଅଧିକ ହାତୀ କରିଡର ଚିହ୍ନଟ ହେବା ସହ ଏଥିପାଇଁ ୩୦ ପ୍ରତିଶତ ଅଧିକ ବ୍ୟୟବରାଦ କରାଯାଇଛି ବୋଲି ଦାସଗୁପ୍ତା କହିଥିଲେ। ଏହି ଅବସରରେ ମନ୍ତ୍ରୀ ଜାଭଡେକର ହାତୀ-ମଣିଷ ବିବାଦ ପରିଚାଳନା ଉପରେ ଏକ ପୁସ୍ତିକା ଉନ୍ମୋଚନ କରିବା ସହ ପ୍ରୋଜେକ୍ଟ ଏଲିଫ୍ୟାଣ୍ଟ ଉପରେ ଏକ ଜାତୀୟ ପୋର୍ଟାଲର ଶୁଭାରମ୍ଭ କରିଥିଲେ।
