ପରଜଙ୍ଗ,୨୧।୪(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ବ୍ଲକ ଭାଲୁମୁଣ୍ଡାଠାରୁ ସରାଙ୍ଗ ଗ୍ରାମ ନିକଟ ୫୩ନଂ. ଜାତୀୟ ରାଜପଥକୁ ସଂଯୋଗ କରୁଥିବା ପୂର୍ତ୍ତ ବିଭାଗ ରାସ୍ତା ପ୍ରଶସ୍ତ ହେବ। ଗୁରୁବାର ଏହାର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ମୁଖ୍ୟ ଅତିଥି ଭାବେ ବିଧାୟକ ତଥା ପୂର୍ବତନ ମନ୍ତ୍ରୀ ଡ. ନୃସିଂହ ଚରଣ ସାହୁ ଯୋଗଦେଇ ଏହାର ଶିଳାନ୍ୟାସ କରିଥିଲେ। ୧୦ କି.ମି. ଦୀର୍ଘ ଏହି ରାସ୍ତା ନିର୍ମାଣରେ ୯ କୋଟି ୫୦ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ବ୍ୟୟ ଅଟକଳ ରହିଛି। ଏହି ସଡ଼କ ଦ୍ୱାରା ବ୍ଲକ ଅନ୍ତର୍ଗତ ୩ ଜିଲା ପରିଷଦ ଜୋନ୍ର ଜନସାଧାରଣ ଉପକୃତ ହେବ। ଏହାର ନିର୍ମାଣରେ ସହଯୋଗ କରିବାକୁ ବିଧାୟକ ନିବେଦନ କରିଛନ୍ତି।
ଦୀର୍ଘବର୍ଷ ଧରି ଅବହେଳିତ ଅବସ୍ଥାରେ ଥିବା ଉକ୍ତ ସଡ଼କ ସମ୍ପ୍ରସାରଣ କରିବା ଲାଗି ଦାବି ହୋଇ ଆସୁଥିବାବେଳେ ପୂର୍ତ୍ତ ବିଭାଗ ଏଥିଲାଗି ଅଣ୍ଟା ଭିଡ଼ିଛି। ରାସ୍ତା ନିର୍ମାଣ ସମ୍ପର୍କରେ ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ପ୍ରଶାନ୍ତ କୁମାର କାନୁନ୍ଗୋ ସୂଚନା ଦେଇ କହିଛନ୍ତି, ୧୦ କି.ମି. ଦୀର୍ଘ ରାସ୍ତା ମଧ୍ୟରୁ ସାଢ଼େ ୩ କିଲୋମିଟର କଂକ୍ରିଟ ହେବ। ଅବଶିଷ୍ଟ ୫.୫ କିଲୋମିଟର ରାସ୍ତା ପିଚୁ ଢଳେଇ କରାଯିବ। ରାସ୍ତା ୨୦ ଫୁଟରୁ ଊର୍ଦ୍ଧ୍ୱ ଓସାର ହେବ। ଆସନ୍ତା ଡିସେମ୍ବର ସୁଦ୍ଧା କାର୍ଯ୍ୟ ସମ୍ପନ୍ନ କରାଯିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି ବୋଲି ଯନ୍ତ୍ରୀ କାନୁନ୍ଗୋ ସୂଚନା ଦେଇଛନ୍ତି। ଏହି ଅବସରରେ ବ୍ଲକ ବିଜେଡି ସଭାପତି କୃଷ୍ଣଚନ୍ଦ୍ର ମହାନ୍ତିଙ୍କ ସଭାପତିତ୍ୱରେ ଏକ ସଭା ଆୟୋଜିତ ହୋଇଥିଲା। ସମ୍ମାନିତ ଅତିଥି ଭାବେ ଜିଲା ପରିଷଦ ଉପାଧ୍ୟକ୍ଷା ବିଳାସିନୀ ସେଠୀ, ଜିଲା ପରିଷଦ ସଭ୍ୟ ନିରାକାର ପ୍ରଧାନ, ରୁନୁ ବର୍ମା, ଆତ୍ମା ଅଧ୍ୟକ୍ଷ ତଥା ପୂର୍ବତନ ବ୍ଲକ ଅଧ୍ୟକ୍ଷ ଅକ୍ଷୟ କୁମାର ବେହେରା, ବ୍ଲକ ଯୁବ ବିଜେଡି ସଭାପତି ସୁବ୍ରତ କୁମାର ଦାସ, କନ୍ଦରସିଂହା ଗ୍ରାମ ସଭାପତି ସଚ୍ଚିଦାନନ୍ଦ ବିଶ୍ୱାଳ, ଠିକାଦାର ପ୍ରଦୀପ ପ୍ରଧାନ, ଦିଲୀପ ପ୍ରଧାନ ପ୍ରମୁଖ ଉପସ୍ଥିତ ଥିଲେ।
