ବାଲେଶ୍ୱର ଅଫିସ, ୬।୮-ବାଲେଶ୍ୱର ସହଦେବଖୁଣ୍ଟା ମଡ଼େଲ ଥାନା ଅନ୍ତର୍ଗତ ୧୬ନଂ. ଜାତୀୟ ରାଜପଥର ନହରପାଟଣା ଛକରେ ଗୋଟିଏ ଟ୍ରକ୍ ଅଟକାଇ ୬ ଆନ୍ତଃରାଜ୍ୟ ଲୁଟେରାମାନେ ଟ୍ରକ୍ରେ ଥିବା କମ୍ବଳକୁ ଲୁଟିନେବାକୁ ଉଦ୍ୟମ କରିଥିଲେ। ପୋଲିସ ପହଞ୍ଚତ୍ ସମସ୍ତଙ୍କୁ କାବୁ କରିଛି। ପୋଲିସ ଲୁଟ୍ ସାମଗ୍ରୀ ଜବତ କରିବା ସହ ଲୁଟେରାମାନଙ୍କୁ ଗିରଫ କରି କୋର୍ଟଚାଲାଣ କରିଛି।
ଶନିବାର ବିଳମ୍ବିତ ରାତିରେ ଝାଡ଼ଖଣ୍ଡ ରାଜ୍ୟରୁ ବାଲେଶ୍ୱର ଅଭିମୁଖେ ଆସୁଥିବା ଏକ କମ୍ବଳ ଭର୍ତ୍ତି ଟ୍ରକ୍କୁ ନହରପାଟଣା ଛକରେ କେତେକ ଦୁର୍ବୃତ୍ତ ଅଟକାଇଥିଲେ। ଡ୍ରାଇଭରଙ୍କୁ ସେମାନେ ମାଡ଼ ମାରିବା ସହ ହେଲପରଙ୍କୁ ଧମକଚମକ ଦେଇ ଟ୍ରକ୍ରେ ଥିବା କମ୍ବଳକୁ କାଢ଼ି ନେଇ ଅନ୍ୟ ଏକ ଗାଡ଼ିରେ ଭର୍ତ୍ତି କରି ପଳାଇଯିବାକୁ ଉଦ୍ୟମ କରୁଥିଲେ। ଖବରପାଇ ସହଦେବଖୁଣ୍ଟା ପୋଲିସ ପହଞ୍ଚିଥିଲା। ପୋଲିସକୁ ଦେଖି ଲୁଟେରାମାନେ ଏଣେତେଣେ ଦୌଡ଼ିଥିଲେ। ଗିରଫ ଲୁଟେରାମାନେ ହେଲେ ମୟୂରଭଞ୍ଜ ଜିଲା ମୋରଡା ଥାନା ହଳଦୀପାଳ ଅଞ୍ଚଳର କ୍ଷୀରୋଦ ଚନ୍ଦ୍ର ବେହେରା (୩୭), ଝାଡଖଣ୍ଡ ରାଜ୍ୟ ସଦେଇକଳା ଥାନା ନୂଆଡ଼ି ଗ୍ରାମର ନିର୍ମଳ କୁମାର ମହାତୋ (୪୨), ଆଦିତ୍ୟପୁର ଥାନା ମୁସଲିମ ବସ୍ତି ଅଞ୍ଚଳର ଇମତିଆଜ ଖାନ, ସଲଦି ବସ୍ତି ଅଞ୍ଚଳର ରାଜେଶ ଗୋରାଇ (୩୦), ଜାମସେଦପୁର ଅଞ୍ଚଳର ଅଫସର ଅଲ୍ଲୀ (୩୨) ଓ ପୂର୍ବି ସିଂହଭୂମ ଜିଲା କଡ଼ମି ଅଞ୍ଚଳର ଏମ୍ଡ଼ି ସାକିଲ (୨୭)। ରବିବାର ଗିରଫ ଲୁଟେରାଙ୍କୁ କୋର୍ଟ ଚାଲାଣ କରାଯାଇଛି।
