ଥିରୁଭାନନ୍ତପୁରମ, ୨୨।୬- ଗୋଟିଏ ମହୁମାଛିର ଦଂଶନ ଜଣେ ବ୍ୟକ୍ତିଙ୍କ ଶରୀରରେ କଷ୍ଟ ପହଞ୍ଚାଇବା ପାଇଁ ଯଥେଷ୍ଟ। କିନ୍ତୁ ଚିନ୍ତା କରନ୍ତୁ, ଜଣେ ବ୍ୟକ୍ତି ନିଜ ମୁହଁରେ ୬୦ ହଜାର ମହୁମାଛିଙ୍କୁ ଦୀର୍ଘ ୪ ଘଣ୍ଟା ପର୍ଯ୍ୟନ୍ତ ବସାଇ ରଖି ଗିନିଜ ବୁକ୍ ଅଫ୍ ବିଶ୍ୱ ରେକର୍ଡ କରିଛନ୍ତି। ଶୁଣିଲେ ବିଶ୍ୱାସ ଲାଗୁ ନ ଥିଲେ ମଧ୍ୟ ଏହା ସତ। କେରଳର ଜଣେ ୨୪ ବର୍ଷୀୟ ବ୍ୟକ୍ତି ଓ ମହୁମାଛିଙ୍କ ମଧ୍ୟରେ ଏମିତି ବନ୍ଧୁତା ଦେଖିବାକୁ ମିଳିଛି। ବ୍ୟକ୍ତି ଜଣଙ୍କ ନିଜ ମୁହଁକୁ ମହୁମାଛିଙ୍କ ଦ୍ୱାରା ଆଚ୍ଛାଦିତ କରି ୪ ଘଣ୍ଟାକାଳ ରହିବାରେ ସଫଳ ହୋଇଛନ୍ତି। ଏହି ବ୍ୟକ୍ତିଙ୍କ ନାମ ହେଉଛି ଏମ୍.ଏସ୍. ନେଚର। ପେଶାରେ ସେ ଜଣେ ମହୁମାଛି ପାଳକ। ତାଙ୍କ ବାପା ମଧ୍ୟ ମହୁଚାଷ କରୁଥିଲେ। ତେଣୁ ମହୁଚାଷ କରୁଥିବାହେତୁ ପିଲାଦିନରୁ ନେଚର ମହୁମାଛିଙ୍କ ସହ ରହି ଆସିଛନ୍ତି। ତାଙ୍କୁ ଯେତେବେଳେ ୭ ବର୍ଷ ହୋଇଥିଲା ସେହି ସମୟରୁ ସେ ମହୁମାଛିଙ୍କୁ ନିଜ ମୁଣ୍ଡରେ ବସାଇ ଆସୁଛନ୍ତି। ଗିନିଜ୍ ଓ୍ବାଲର୍ଡ ରେକଡର୍ସ ପକ୍ଷରୁ କୁହାଯାଇଛି, ଏହି ଯୁବକ ଜଣଙ୍କ ମହୁମାଛିଙ୍କର ଏକ ଦଳକୁ ନିଜ ମୁହଁ ଓ ବେକରେ ୪ ଘଣ୍ଟା ୧୦ ମିନିଟ୍ ୫ ସେକେଣ୍ଡ ପର୍ଯ୍ୟନ୍ତ ବସାଇ ରଖିବାରେ ସଫଳ ହୋଇଛନ୍ତି। ଯାହାକି ଏକ ବିଶ୍ୱରେକର୍ଡ। ବିଶ୍ୱରେକର୍ଡକୁ ନିଜ ନାମରେ ଲିପିବଦ୍ଧ କରିବା ପରେ ନେଚର କହିଛନ୍ତି, ମହୁମାଛିମାନେ ମୋର ଶ୍ରେଷ୍ଠ ବନ୍ଧୁ। ମୁଁ ଚାହୁଁଛି ମୋ ଭଳି ଆହୁରି ଅଧିକ ଲୋକ ମହୁମାଛିଙ୍କ ସହିତ ବନ୍ଧୁତା କରନ୍ତୁ।
