ମନମୁଣ୍ଡା,୨୯।୫ (ଡି.ଏନ.ଏ.)- ଚଳିତବର୍ଷ କରୋନା କଟକଣା ଯୋଗୁ ବୌଦ୍ଧ ଜିଲା କଣ୍ଟାମାଳ ବ୍ଲକ ମନମୁଣ୍ଡାଠାରେ ଥିବା ଶ୍ରୀଦଧିବାମନଜୀଉଙ୍କ ସ୍ନାନଯାତ୍ରା ରୀତିନୀତି ପୂଜକଙ୍କ ସମେତ ୫ ଜଣଙ୍କୁ ନେଇ କରାଯିବ ା ମନମୁଣ୍ଡା ରଥ କମିଟି ପକ୍ଷରୁ ଅନୁଷ୍ଠିତ ପ୍ରସ୍ତୁତି ବୈଠକରେ ଏହି ନିଷ୍ପତ୍ତି ନିଆଯାଇଛି ା ୧୫୦ ବର୍ଷ ତଳର ଶ୍ରୀଦଧିବାମନଜୀଉ ମନ୍ଦିର ଦେବୋତ୍ତର ବିଭାଗ ଅଧୀନରେ ରହିଛି ା ପ୍ରତିବର୍ଷ ଏଠାରେ ଶ୍ରୀଜୀଉଙ୍କ ରଥଯାତ୍ରା ଅନୁଷ୍ଠିତ ହୋଇଥାଏ ା ଆସନ୍ତା ୫ ତାରିଖରେ ସ୍ନାନ ପୂର୍ଣ୍ଣିମା ପଡୁଥିବାରୁ ରଥ କମିଟି ତରଫରୁ ଏହି ବୈଠକ ଅନୁଷ୍ଠିତ ହୋଇଥିଲା । ରାଧେଶ୍ୟାମ ସାହୁଙ୍କ ଆବାହକତ୍ୱରେ ମନମୁଣ୍ଡା ଗ୍ରାମ ପଞ୍ଚାୟତ କାର୍ଯ୍ୟାଳୟ ପ୍ରାଙ୍ଗଣରେ ଅନୁଷ୍ଠିତ ଏହି ବୈଠକରେ ରଥ କମିଟି ସଭାପତି ବିପ୍ରଚରଣ ବେହେରା ସଭାପତିତ୍ୱ କରିଥିଲେ । ଏଥିରେ କମିଟିର ସମ୍ପାଦକ ଗଣେଶ ଲୋଇ, କୋଷାଧ୍ୟକ୍ଷ ନରେନ୍ଦ୍ର ମେହେର, ସଭ୍ୟ ରାଜା ଅଗ୍ରୱାଲ, ଚନ୍ଦ୍ରଶେଖର ମେହେର, ଦଶରଥ ମେହେର, ନିରଞ୍ଜନ ହୋତା ପ୍ରମୁଖ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ । ବର୍ତ୍ତମାନ କରୋନା କଟକଣା ନେଇ ଧାର୍ମିକ ଉତ୍ସବକୁ ସରକାର ବନ୍ଦ କରିଥିବାରୁ କମିଟି ତରଫରୁ ବୌଦ୍ଧ ଉପଜିଲାପାଳଙ୍କ ସହ ଆଲୋଚନା ହୋଇଥିଲା ା ଏହି ଆଲୋଚନା ପରେ ମନ୍ଦିର ପୂଜକ ଗୋପୀନାଥ ହୋତା ଓ ୨ଜଣ ବ୍ରାହ୍ମଣ ସମେତ ମୋଟ ୫ଜଣଙ୍କ ଉପସ୍ଥିତିରେ ମାକ୍ସ ଲଗାଇ ସାମାଜିକ ଦୂରତା ଅବଳମ୍ବନ ପୂର୍ବକ କେବଳ ପୂଜା ଓ ରୀତିନୀତି କରାଯିବାକୁ ନିଷ୍ପତ୍ତି ଗ୍ରହଣ କରାଯାଇଥିଲା । ବାଦ୍ୟ, ଘଣ୍ଟ, ମାଇକ ବଜାକୁ ବନ୍ଦ କରାଯିବା ସହ ଭକ୍ତମାନେ ଗହଳି ନ କରିବା ପାଇଁ ସ୍ଥିର ହୋଇଛି । ସେହିପରି ରଥଯାତ୍ରା ଉପଲକ୍ଷେ ଠାକୁରଙ୍କ ସବୁ ରୀତିନୀତି ଚାଲୁ ରହିଥିବ ା
ସରକାର ପୁରୀରେ ରଥଯାତ୍ରା ପାଇଁ ଅନୁମତି ଦେଲେ ତଥା ଏପଟେ ବୌଦ୍ଧ ଜିଲାପାଳ ବୌଦ୍ଧରେ ଅନୁମତି ଦେଲେ ରଥ ଟଣାଯିବ । ନଚେତ୍ ରଥଯାତ୍ରା ହେବ ନାହିଁ ବୋଲି ବୈଠକରେ ସର୍ବସମ୍ମତିକ୍ରମେ ନିଷ୍ପତ୍ତି ଗ୍ରହଣ କରାଯାଇଛି ।
