ବାଲେଶ୍ୱର ଅଫିସ,୧୬।୧- ବାଲେଶ୍ୱର ଜିଲା ଖଇରା ବ୍ଲକ ନନ୍ଦୁର ପଞ୍ଚାୟତ ରୁଡ଼ିଙ୍ଗିଆ ଗ୍ରାମର ହରେକୃଷ୍ଣ ନାୟକ(୮୭)। ୪ ପୁଅ ଥିବା ସତ୍ତ୍ୱେ ଭରଣପୋଷଣ ପାଇବା ତ ଦୂରର କଥା ପୈତୃକ ସମ୍ପତ୍ତି ବିକ୍ରି କରିବା ଆଶାରେ ବରିଷ୍ଠ ନାଗରିକ ତଥା ପିତାଙ୍କୁ ଦୁର୍ଦ୍ଦଶା ଭିତରକୁ ଠେଲିବାକୁ ପଛାଉ ନାହାନ୍ତି। ପୁଅମାନେ ଥାଇ ବି ସେ ଏବେ ବେସାହାରା ହୋଇଯାଇଛନ୍ତି। ଏ ନେଇ ବୃଦ୍ଧ ପିତା ହରେକୃଷ୍ଣ ବାଲେଶ୍ୱର ଉପଜିଲାପାଳ ନିଲୁ ମହାପାତ୍ରଙ୍କ ଦ୍ୱାରସ୍ଥ ହୋଇଛନ୍ତି।
ହରେକୃଷ୍ଣଙ୍କ ଅଭିଯୋଗ କରିଛନ୍ତି ଯେ, ପ୍ରଥମ ପୁଅ ସରକାରୀ ଚାକିରିରୁ ଅବସର ନେଇ କଟକ ସହରରେ ପରିବାର ସହ ରହୁଛନ୍ତି। ଦ୍ୱିତୀୟ ପୁଅ ଗଁ। ରେ ରହି ଜମିରେ ଚାଷ କରି ପରିବାର ଚଳାଇବା ସହ ତାଙ୍କ ଦେଖାଶୁଣା କରୁଥିଲେ। ତୃତୀୟ ପୁଅ ସୋର ଅଦାଲତରେ ଚାକିରି କରି ପରିବାର ସହ ରହୁଛନ୍ତି। ଚତୁର୍ଥ ପୁଅ ଭଦ୍ରକରେ ପରିବାର ସହ ରହିଆସୁଛନ୍ତି। କିଛିଦିନ ପୂର୍ବରୁ ପ୍ରଥମ ଓ ତୃତୀୟ ପୁଅ ଜମିବାଡ଼ି ଭାଗ କରିବା ପାଇଁ ତାଙ୍କୁ ଚାପ ପକାଇ ମାନସିକ ଯନ୍ତ୍ରଣା ଦେବା ସହ ବିଭିନ୍ନ ପ୍ରକାର ଗଣ୍ଡଗୋଳ ସୃଷ୍ଟି କରିଥିଲେ। ଅନ୍ୟପକ୍ଷେ ଦ୍ୱିତୀୟ ପୁତ୍ର ସହ ବାରମ୍ବାର ଝଗଡ଼ା କରି ବିଭିନ୍ନ ମାମଲାରେ ଅନ୍ତର୍ଭୁକ୍ତ କରିଥିବାରୁ ଉକ୍ତ ଜମିରେ ଚାଷ କରାଯାଇପାରୁ ନାହିଁ। ଫଳରେ ଦ୍ୱିତୀୟ ପୁଅର ଆର୍ଥିକ ଅବସ୍ଥା ଭଲ ନ ଥିବାରୁ ସେ ତାଙ୍କୁ ପୋଷିବା ପାଇଁ ସକ୍ଷମ ନ ଥିବା କହିଥିଲେ। ଏହାପରେ ସେ ଗତ ନଭେମ୍ବର ୧୦ରେ ଉପଜିଲାପାଳଙ୍କ ଦ୍ୱାରସ୍ଥ ହୋଇଥିଲେ। ଉପଜିଲାପାଳ ଏହାକୁ ଗୁରୁତ୍ୱ ଦେଇ ପଦକ୍ଷେପ ନେବାକୁ ଲିଖିତ ଭାବେ ଖଇରା ତହସିଲଦାର ପ୍ରଦୀପ କୁମାର ସାହୁଙ୍କୁ ନିର୍ଦ୍ଦେଶ ଦେଇଥିଲେ। କିନ୍ତୁ ଏହାମଧ୍ୟରେ କୌଣସି ସମାଧାନ ନ ହେବାରୁ ସେ ପୁନର୍ବାର ଉପଜିଲାପାଳଙ୍କ ଦ୍ୱାରସ୍ଥ ହୋଇଥିବା ହରେକୃଷ୍ଣ କହିଛନ୍ତି।
