ବାଲେଶ୍ୱର ଅଫିସ,୨୭।୫-ମହାବାତ୍ୟା ଅମ୍ଫନ ଉତ୍ତରଓଡ଼ିଶାରେ ତାଣ୍ଡବ ରଚିଥିଲା। ଏଥିରେ ବିଦ୍ୟୁତ୍ ବିଭାଗର ବ୍ୟାପକ କ୍ଷୟକ୍ଷତି ହୋଇଛି। ଗାଁଠାରୁ ସହର ପର୍ଯ୍ୟନ୍ତ ୩୩କେଭି, ୧୧କେଭି ଏବଂ ଏଲ୍ଟି ଲାଇନ୍ ଖୁଣ୍ଟି ଭାଙ୍ଗି ଯାଇଥିବା ବେଳେ ତାର ଛିଣ୍ଡି ତଳେ ପଡ଼ିଥିଲା। ଏଥିରେ ବାଲେଶ୍ୱର, ଭଦ୍ରକ, ମୟୂରଭଞ୍ଜ ଓ ଯାଜପୁର ଜିଲାର ୧୬, ୧୦, ୬୨୬ ଉପଭୋକ୍ତା ପ୍ରଭାବିତ ହେବା ସହ ୬୨କୋଟି ୨୪ଲକ୍ଷ ଟଙ୍କାର ସାମଗ୍ରୀ କ୍ଷୟକ୍ଷତି ହୋଇଥିବା ନେସ୍କୋ ତରଫରୁ ଆକଳନ କରାଯାଇ ରାଜ୍ୟସରକାରଙ୍କୁ ରିପୋର୍ଟ ପ୍ରଦାନ କରାଯାଇଛି।
ଅମ୍ଫନ୍ ପ୍ରଭାବରେ ବାଲେଶ୍ୱର ଜିଲାର ୩୬୦ ପଞ୍ଚାୟତର ୩୯୧୨ଗାଁରୁ ୨୩୧ ପଞ୍ଚାୟତର ୨୮୯୮ ଗାଁ କ୍ଷୟକ୍ଷତିର ଶିକାର ହୋଇଥିଲେ। ମୁଖ୍ୟତଃ ଉତ୍ତର ବାଲେଶ୍ୱରର ଚନ୍ଦନେଶ୍ୱର, ଭୋଗରାଇ, ବାଲିଆପାଳ ବିଶେଷ ଭାବେ କ୍ଷତିଗ୍ରସ୍ତ ହୋଇଥିବା ବେଳେ ବସ୍ତା, ଜାମଶୂଳ, ଗାନ୍ଧୀଛକ, ଚାନ୍ଦିପୁର ଅଞ୍ଚଳରେ ମଧ୍ୟ ଅଧିକ ପରିମାଣର କ୍ଷୟକ୍ଷତି ହୋଇଥିଲା। ନେସ୍କୋ ପକ୍ଷରୁ ୧୯୬୫ ଜଣ ବିଦ୍ୟୁତ୍ କର୍ମଚାରୀ ନିୟୋଜିତ କରାଯାଇ ସହରାଞ୍ଚଳଗୁଡ଼ିକୁ ୮ଘଣ୍ଟାରୁ ୧୬ଘଣ୍ଟା ମଧ୍ୟରେ ବିଦ୍ୟୁତ୍ ଯୋଗାଇ ଦିଆଯାଇଥିବା ବେଳେ ୨୬ ତାରିଖ ସୁଦ୍ଧା ବାଲେଶ୍ୱର, ଭଦ୍ରକ, ମୟୂରଭଞ୍ଜ ଓ ଯାଜପୁର ଜିଲାର ବିଦ୍ୟୁତ୍ ସରବରାହ ପରିସ୍ଥିତିକୁ ସ୍ବାଭାବିକ କରାଯାଇପାରିଛି। ମାତ୍ର ମୟୂରଭଞ୍ଜର କେତେକ ଅପହଞ୍ଚ ଅଞ୍ଚଳରେ ବିଦ୍ୟୁତ୍ ସରବରାହ ଆସନ୍ତା ୨/୩ ଦିନ ମଧ୍ୟରେ ସ୍ବାଭାବିକ କରାଯିବ ବୋଲି ନେସ୍କୋ ପକ୍ଷରୁ ଏକ ପ୍ରେସ୍ ବିଜ୍ଞପ୍ତିରେ ପ୍ରକାଶ କରାଯାଇଛି।
