ଶ୍ରୀନଗର,୧୧।୫: ଗତ ୩ ବର୍ଷ ମଧ୍ୟରେ ଆତଙ୍କବାଦୀ ସଂଗଠନରେ ୩୭୩ ଯୁବକ ଯୋଗ ଦେଇଛନ୍ତି। ୨୦୧୮ଠାରୁ ୨୦୨୦ ମେ ୩ ମଧ୍ୟରେ ଏହି ଯୁବକମାନେ ବିଭିନ୍ନ ଆତଙ୍କବାଦୀ ସଂଗଠନରେ ସାମିଲ୍ ହୋଇଛନ୍ତି। ୨୦୧୮ରେ ୨୧୯ ଜଣ ଆତଙ୍କବାଦୀ ସଂଗଠନରେ ଯୋଗଦେଇଥିଲେ। ୨୦୧୯ରେ ଯୁବକଙ୍କ ଯୋଗଦେବା ହାର କମ୍ ଥିଲା। ଏହି ବର୍ଷ ୧୧୯ ଜଣ ଯୁବକ ଆତଙ୍କବାଦୀ ସଂଗଠନରେ ସାମିଲ୍ ହୋଇଥିଲେ। ତେବେ ଚଳିତ ୨୦୨୦ ବର୍ଷର ମେ ୩ ସୁଦ୍ଧା ୩୫ ଜଣ ଯୁବକ ଆତଙ୍କବାଦୀ ସଂଗଠନରେ ଯୋଗଦେଇଥିବା କୁହାଯାଉଛି। ସେହିପରି ୨୦୧୮ରେ ୨୧୫ ଏବଂ ୨୦୧୯ରେ ୧୫୨ ଆତଙ୍କବାଦୀ ସୁରକ୍ଷାକର୍ମୀଙ୍କ ଏନ୍କାଉଣ୍ଟରରେ ନିହତ ହୋଇଥିଲେ। ଚଳିତ ବର୍ଷ ମେ ୩ ସୁଦ୍ଧା ୬୪ ଆତଙ୍କବାଦୀଙ୍କ ମୃତ୍ୟୁ ଘଟିଛି। ସେଥିମଧ୍ୟରୁ ୨୨ ଜଣ ହିଜବୁଲ୍ ମୁଜାହିଦ୍ଦିନ୍ ସଂଗଠନର ଥିବାବେଳେ ୮ ଜଣ ଲଶ୍କର-ଇ-ତୋଏବା, ୮ ଜୈଶ୍-ଇ-ମହମ୍ମଦ୍ ଆତଙ୍କବାଦୀ ସଂଗଠନର ବୋଲି ଚିହ୍ନଟ କରାଯାଇଛି। ସେହିପରି ୩ ଜଣ ଅସାଂର-ଗଜବତ୍- ଇ- ହିନ୍ଦ୍ ଏବଂ ୩ ଜଣ ଇସଲାମିକ୍ ଷ୍ଟେଟ୍ ସଂଗଠନର ବୋଲି କୁହାଯାଉଛି। ଅପରପକ୍ଷରେ ୨୦ ଜଣ ଆତଙ୍କବାଦୀଙ୍କୁ ଚିହ୍ନଟ କରାଯାଇପାରି ନାହିଁ। ଚଳିତ ବର୍ଷ ଦକ୍ଷିଣ କଶ୍ମୀରରେ ସର୍ବାଧିକ ୪୪ଜଣ ଆତଙ୍କବାଦୀଙ୍କ ସୁରକ୍ଷାକର୍ମୀଙ୍କ ଏନ୍କାଉଣ୍ଟରରେ ମୃତ୍ୟୁ ଘଟିଥିବା କୁହାଯାଉଛି।
