ଢେଙ୍କାନାଳ ଅଫିସ, ୫।୧ – ଢେଙ୍କାନାଳ ମିନି ଷ୍ଟାଡିୟମଠାରେ ଆସନ୍ତା ୨୨ ତାରିଖରେ ଜିଲାସ୍ତରୀୟ ନିଯୁକ୍ତି ମେଳା ଆୟୋଜିତ ହେବ। ଏହି ଉପଲକ୍ଷେ ଶନିବାର ପୂର୍ବାହ୍ନ ୧୧ଟାରେ ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଜିଲାପାଳ ଭୂମେଶ ଚନ୍ଦ୍ର ବେହେରା ଅଧ୍ୟକ୍ଷତା କରି ଜିଲାର ସମସ୍ତ ଶିଳ୍ପାନୁଷ୍ଠାନ ମେଳାରେ ଭାଗନେବାକୁ ନିବେଦନ କରିଥିଲେ। ଏଥିସହ ନିଯୁକ୍ତି ମେଳାରେ ବ୍ଲକରୁ ସର୍ବନିମ୍ନ ୪୦୦ ପ୍ରାର୍ଥୀ ଅଂଶଗ୍ରହଣ କରିବା ଏବଂ ବ୍ୟାପକ ପ୍ରଚାର ପ୍ରସାର କରିବା ଉପରେ ଫୋକସ୍ କରିବାକୁ ସେ ବିଡିଓଙ୍କୁ ପରାମର୍ଶ ଦେଇଛନ୍ତି।
ନିଯୁକ୍ତି ମେଳାରେ ରାଜ୍ୟ ତଥା ରାଜ୍ୟ ବାହାରୁ ବହୁ ପ୍ରତିଷ୍ଠିତ କମ୍ପାନୀ ଯୋଗଦେବେ। ୫ମରୁ ସ୍ନାତକ ଶ୍ରେଣୀ, ଆଇଟିଆଇ, ଡିପ୍ଲୋମା ପଢ଼ିଥିବା ପିଲାଙ୍କୁ ଯୋଗ୍ୟତା ଭିତ୍ତିରେ ବିଭିନ୍ନ ପଦବୀ ପାଇଁ ଚୟନ କରାଯିବ। ଅଙ୍ଗନଓ୍ବାଡି କର୍ମୀ, ଆଶାକର୍ମୀ, ପଞ୍ଚାୟତ ପ୍ରତିନିଧି, କଲେଜ କର୍ତ୍ତୃପକ୍ଷ, ଶିକ୍ଷାନୁଷ୍ଠାନ ସହଯୋଗରେ ନିଯୁକ୍ତି ମେଳାର ପ୍ରଚାର କରାଯିବ। ଜିଲା କ୍ରୀଡ଼ା ଅଧିକାରୀଙ୍କ ସହଯୋଗରେ ବିଜୁ ଯୁବ ବାହିନୀ କର୍ମକର୍ତ୍ତାମାନେ ପ୍ରଚାରରେ ନିୟୋଜିତ ହେବେ।
ବୈଠକରେ ସରକାରୀ ଆଇଟିଆଇ, ପଲିଟେକ୍ନିକ୍, ଜନଶିକ୍ଷଣ ସଂସ୍ଥା, ଓରମାସ୍, ଆରଆଇସି ଜିଏମ୍, ଜିଲା ସୂଚନା ଓ ଲୋକସମ୍ପର୍କ ବିଭାଗ, କ୍ରୀଡ଼ା ବିଭାଗ, ଟାଟା ଷ୍ଟିଲ ବିଏସ୍ଏଲ୍, ଏମ୍ଜିଏମ୍ ମିନେରାଲ, ରୁଙ୍ଗ୍ଟା ମାଇନ୍ସ, ଶକ୍ତି ସୁଗାର୍ସ, ଉତ୍କଳ ଆଜବେଷ୍ଟସ, ମାଙ୍ଗିଲାଲ ରୁଙ୍ଗ୍ଟାର ଅଧିକାରୀମାନେ ଉପସ୍ଥିତ ଥିଲେ। ଜିଲା ନିୟୋଜନ ଅଧିକାରୀ ଆଶିଷ କୁମାର ବସନ୍ତିଆ ବୈଠକ ପରିଚାଳନା କରିଥିବାବେଳେ ସରକାରୀ ଆଇଟିଆଇ ଟ୍ରେନିଂ ଅଫିସର ଅରୁଣ କୁମାର ମହାରଣା ଧନ୍ୟବାଦ ପ୍ରଦାନ କରିଥିଲେ।