ନୂଆଦିଲ୍ଲୀ,୩୦-୧୨: ୨୦୨୬ ସୁଦ୍ଧା ଭାରତ ଜର୍ମାନୀକୁ ଟପି ବିଶ୍ୱର ୪ର୍ଥ ଅର୍ଥ ବ୍ୟବସ୍ଥା ହୋଇପାରେ। ସେହିଭଳି ୨୦୩୪ ସୁଦ୍ଧା ଏହା ଜାପାନକୁ ଟପି ଭାରତ ବିଶ୍ୱର ୩ ବୃହତ୍ତ ଅର୍ଥ ବ୍ୟବସ୍ଥା ହେବାର ସମ୍ଭାବନା ରହିଥିବା ଇଂଲଣ୍ଡ ଭିତ୍ତିକ ସେଣ୍ଟର ଫର ଇକୋନୋମିକ ଆଣ୍ଡ ବିଜନେସ ରିସର୍ଚ୍ଚ (ସିଇବିଆର୍) ରିପୋର୍ଟରେ ପ୍ରକାଶ ପାଇଛି। ୨୦୧୪ରେ ଭାରତ ୫ ଟ୍ରିଲିୟନ ଡଲାର ଅର୍ଥ ବ୍ୟବସ୍ଥାରେ ରୂପାନ୍ତରିତ ହେବ ବୋଲି ସରକାର ଲକ୍ଷ୍ୟ ଧାର୍ଯ୍ୟ କରିଛନ୍ତି। ମାତ୍ର ଏହି ଲକ୍ଷ୍ୟକୁ ହାସଲ କରିବାକୁ ଭାରତକୁ ୨୦୨୬ ଯାଏ ଅପେକ୍ଷା କରିବାକୁ ପଡିବ ବୋଲି ସିଇବିଆର ରିପୋର୍ଟରେ କୁହାଯାଇଛି। ୨୦୧୯ରେ ଭାରତ ଫ୍ରାନ୍ସ ଏବଂ ୟୁକେକୁ ଟପିବା ସହ ବିଶ୍ୱର ୫ମ ବୃହତ୍ତ ଅର୍ଥ ବ୍ୟବସ୍ଥା ହେବାକୁ ସକ୍ଷମ ହୋଇଥିଲା। ୨୦୨୬ରେ ଜର୍ମାନୀ ଏବଂ ୨୦୩୪ରେ ଜାପାନକୁ ଭାରତ ଟପିବ ବୋଲି ସିଇଆର୍ବି ଏହାର ଓ୍ବାର୍ଲଡ ଇକୋନୋମିକ ଲିଗ୍ ଟେବଲ-୨୦୨୦ ରିପୋର୍ଟରେ ପ୍ରକାଶ କରିଛି। ବିଶ୍ୱର ୩ୟ ବୃହତ୍ତ ଅର୍ଥ ବ୍ୟବସ୍ଥା ହେବା ଲାଗି ଆଗାମୀ ୧୫ ବର୍ଷରେ ଜାପାନ, ଜର୍ମାନୀ ଏବଂ ଭାରତ ମଧ୍ୟରେ କଡା ପ୍ରତିଯୋଗିତା ହେବା ନେଇ ରିପୋର୍ଟରେ କୁହାଯାଇଛି।
୫ ଟ୍ରିଲିୟନ ଡଲାର ଅର୍ଥନୀତି ଲକ୍ଷ୍ୟ ହାସଲ ଲାଗି ଭାରତ ସରକାର ଧାର୍ଯ୍ୟ କରିବାକୁ ସମୟକୁ ନେଇ ସିଇଆର୍ବି ଆଶାଙ୍କା ପ୍ରକଟ କରିଛି। ଏହି ଲକ୍ଷ୍ୟକୁ ନେଇ ନିକଟରେ ରିଜର୍ଭ ବ୍ୟାଙ୍କର ପୂର୍ବତନ ଗଭର୍ନର ସି.ରଙ୍ଗରାଜନ ମଧ୍ୟ ପ୍ରଶ୍ନ ଉଠାଇଥିଲେ। ଭାରତ ଯେଉଁ ହାରରେ ବର୍ତ୍ତମାନ ବିକାଶ କରୁଛି ୨୦୨୪-୨୫ ବେଳକୁ ୫ ଟ୍ରିଲିୟନ ଡଲାର ଅର୍ଥନୀତି ଲକ୍ଷ୍ୟ ହାସଲ ନେଇ ସନ୍ଦିହାନ ଥିବା ରଙ୍ଗରାଜନ ନିକଟରେ କହିଥିଲେ। ମନ୍ଥର ଅଭିବୃଦ୍ଧି ଭାରତର ଅର୍ଥନୈତିକ ସଂସ୍କାର ଉପରେ ପ୍ରଭାବ ପକାଇବ ବୋଲି କୁହାଯାଉଛି। ଭାରତ ଏବଂ ଇଣ୍ଡୋନେସିଆ ଭଳି ଦେଶ ଏବେ ଅଗ୍ରଗତି କରୁଥିବା ବେଳେ ବିଶ୍ୱର ପ୍ରମୁଖ ଅର୍ଥ ବ୍ୟବସ୍ଥା କୁହାଯାଉଥିବା ଆମେରିକା ଏବଂ ଚାଇନା ଭଳି ଦେଶଗୁଡିକ ସାମ୍ନାରେ କିଭଳି ନିଜକୁ ଉପସ୍ଥାପନ କରିବେ ତାହା ଦେଖିବାକୁ ହେବ ବୋଲି ସିଇବିଆର୍ର ବରିଷ୍ଠ ଅର୍ଥନୀତିଜ୍ଞ ପାବଲୋ ଶାହା କହିଛନ୍ତି। ଭାରତ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ମଧ୍ୟରେ ସାମିଲ ରହିଛି। ଚଳିତ ଆର୍ଥତ୍କ ବର୍ଷ ଦ୍ୱିତୀୟ ତ୍ରୈମାସରେ ଏହାର ବିକାଶ ହାର ୪.୫%କୁ ଖସି ଆସିଛି।