ନୂଆଦିଲ୍ଲୀ,୯ା୧୧: ଗତ ଲୋକ ସଭା ନିର୍ବାଚନରେ ଭାଜପାର ଅର୍ଥବଳ ଆଗରେ ଆମେ ସୀମିତ ସମ୍ବଳରେ ଲଢ଼ିପାରିଲୁ ନାହିଁ ବୋଲି କଂଗ୍ରେସ ଯେଉଁ ଅଭିଯୋଗ କରିଆସୁଥିଲା ତାହା ଏବେ ଭୁଲ୍ ପ୍ରମାଣିତ ହୋଇଛି। ସାଧାରଣ ନିର୍ବାଚନ ସମେତ ଆନ୍ଧ୍ରପ୍ରଦେଶ, ଅରୁଣାଚଳପ୍ରଦେଶ, ଓଡିଶା, ତେଲଙ୍ଗାନା ଓ ସିକିମ୍ ବିଧାନସଭା ନିର୍ବାଚନରେ କଂଗ୍ରେସ ୮୨୦ କୋଟି ଟଙ୍କା ବ୍ୟୟ କରିଥିବା ଜଣାପଡିଛି। ୨୦୧୪ ନିର୍ବାଚନ ବେଳେ କଂଗ୍ରେସ ୫୧୬ କୋଟି ଓ ଭାଜପା ୭୧୪ କୋଟି ଟଙ୍କା ବ୍ୟୟ କରିଥିଲା। ୨୦୧୯ ନିର୍ବାଚନ ଖର୍ଚ୍ଚ ସମ୍ପର୍କରେ ଭାଜପା ଏପର୍ଯ୍ୟନ୍ତ ହିସାବ ଦାଖଲ କରିନାହିଁ।
ଅକ୍ଟୋବର ୩୧ରେ କଂଗ୍ରେସ ତା’ର ନିର୍ବାଚନ ଖର୍ଚ୍ଚ ବିବରଣୀ ନିର୍ବାଚନ କମିଶନଙ୍କ ପାଖରେ ଦାଖଲ କରିଥିଲା। ଏଥିରେ ଦଳୀୟ ପ୍ରଚାରରେ ୬୨୬.୩ କୋଟି ଏବଂ ପ୍ରାର୍ଥୀମାନଙ୍କ ପାଇଁ ୧୯୩.୯ କୋଟି ବ୍ୟୟ ହୋଇଥିବା ଉଲ୍ଲେଖ ଅଛି। ନିର୍ବାଚନ ତାରିଖ ଘୋଷଣାଠାରୁ ସମ୍ପୂର୍ଣ୍ଣ ପ୍ରକ୍ରିୟା ଶେଷ ହେବା ପର୍ଯ୍ୟନ୍ତ କଂଗ୍ରେସକୁ ପାଖାପାଖି ୮୫୬ କୋଟି ଟଙ୍କା ଦଳୀୟ ଚାନ୍ଦା ଓ ଅନ୍ୟାନ୍ୟ ସୂତ୍ରରୁ ମିଳିଥିଲା ବୋଲି ଉକ୍ତ ବିବରଣୀରେ କୁହାଯାଇଛି।
ଅନ୍ୟ ଦଳଗୁଡ଼ିକ ମଧ୍ୟରେ ତୃଣମୂଳ କଂଗ୍ରେସ ଲୋକ ସଭା ନିର୍ବାଚନରେ ୮୩.୬ କୋଟି ବ୍ୟୟ କରିଥିବାବେଳେ ବିଏସ୍ପି ୫୫.୪ କୋଟି, ଏନ୍ସିପି ୭୨.୩ କୋଟି ଏବଂ ସିପିଏମ୍ ୭୩.୧ ଲକ୍ଷ ଟଙ୍କା ବ୍ୟୟ କରିଥିବା ସେମାନଙ୍କ ନିର୍ବାଚନୀ ବ୍ୟୟ ବିବରଣୀରୁ ଜଣାପଡିଛି।
ନିର୍ବାଚନ ଲଢ଼ିବାକୁ ଦଳ ପାଖରେ ଟଙ୍କା ନ ଥିଲା ବୋଲି ମେ ମାସରେ କଂଗ୍ରେସ ସୋସିଆଲ ମିଡିଆ ମୁଖ୍ୟ ଦିବ୍ୟ ସ୍ପନ୍ଦନ ଗଣମାଧ୍ୟମକୁ କହିଥିଲେ। ତେବେ ସାଧାରଣ ନିର୍ବାଚନ ବେଳେ ଦଳୀୟ ପ୍ରଚାର ପାଇଁ ୬୨୬.୩୬ କୋଟି ଖର୍ଚ୍ଚ କରାଯାଇଥିଲାବେଳେ ସେଥିରୁ ୫୭୩ କୋଟି ଚେକ୍ ମାଧ୍ୟମରେ ଓ ଅବଶିଷ୍ଟ ୧୪.୩୩ କୋଟି ନଗଦ ଆକାରରେ ପୈଠ ହୋଇଥିବା ଜଣାପଡିଛି। କଂଗ୍ରେସ ମୁଖ୍ୟ କାର୍ଯ୍ୟାଳୟ ବିଜ୍ଞାପନରେ ୩୫୬ କୋଟି ବ୍ୟୟ କରିଥିଲାବେଳେ ପୋଷ୍ଟର ଓ ଅନ୍ୟାନ୍ୟ ସାମଗ୍ରୀ ବାବଦରେ ୪୭ କୋଟି ଓ ତାରକା ପ୍ରଚାରକମାନଙ୍କ ଯାତାୟାତରେ ୮୬.୮୨ କୋଟି ଟଙ୍କା ବ୍ୟୟ ହୋଇଛି। ଏହି ଦଳ ଓଡ଼ିଶା ଓ ଛତିଶଗଡରେ ୪୦ କୋଟି ବ୍ୟୟ କରିଥିଲାବେଳେ ଉତ୍ତରପ୍ରଦେଶରେ ୩୬ କୋଟି, ମହାରାଷ୍ଟ୍ରରେ ୧୮ କୋଟି, ପଶ୍ଚିମବଙ୍ଗରେ ପାଖାପାଖି ୧୫ କୋଟି ଏବଂ କେରଳରେ ୧୩ କୋଟି ଟଙ୍କା ଖର୍ଚ୍ଚ କରିଛି।
