ଭୋପାଳ,୭।୭: ମଧ୍ୟପ୍ରଦେଶ ଦମୋହ ଜିଲାରେ ଗତ ୧୨୫ ବର୍ଷ ଧରି ଶାସ୍ତ୍ରୀୟ ସଙ୍ଗୀତ ସମାରୋହ ଅନୁଷ୍ଠିତ ହୋଇଆସୁଛି। ସ୍ଥାନୀୟ ବକାୟନ ଗାଁରେ ଏହି ଉତ୍ସବ ପ୍ରତିବର୍ଷ ଆୟୋଜିତ ହୋଇଥାଏ। ୨୦୦୪ ପର୍ଯ୍ୟନ୍ତ ଗତ ୧୧୦ ବର୍ଷ ଧରି ଗାଁର ମରାଠି ମାଫିଦାର ପରିବାର ଏହାର ଆୟୋଜନ କରୁଥିଲେ। ତେବେ ୨୦୦୫ଠାରୁ ଏହାକୁ ମଧ୍ୟପ୍ରଦେଶ ଆଲ୍ଲାଉଦ୍ଦିନ୍ ସଙ୍ଗୀତ ଏକାଡ଼େମୀ ପକ୍ଷରୁ ଆୟୋଜନ କରାଯାଉଛି। ଚଳିତ ବର୍ଷ ଜୁଲାଇ ୧୬-୧୭ ଦୁଇଦିନ ଧରି ଏଠାରେ ଶାସ୍ତ୍ରୀୟ ସଙ୍ଗୀତ ଉତ୍ସବ ପାଳିତ ହେବ। ପରମ୍ପରା ଅନୁସାରେ ଉତ୍ସବ ସମୟରେ ୪୮ ଘଣ୍ଟା ପର୍ଯ୍ୟନ୍ତ ଅନବରତ ସଙ୍ଗୀତ କାର୍ଯ୍ୟକ୍ରମ ଜାରି ରହିଥାଏ। ସୂଚନାଯୋଗ୍ୟ,ଏହି ଉତ୍ସବର ସଂସ୍ଥାପକଙ୍କ ତୃତୀୟ ପିଢ଼ିର ପରିବାର ସଦସ୍ୟ ବିଶ୍ୱନାଥ ମାଫିଦାର ୨୦୦୪ ପର୍ଯ୍ୟନ୍ତ ଏହି ସଙ୍ଗୀତ କାର୍ଯ୍ୟକ୍ରମର ଆୟୋଜନ କରିଥିଲେ।
