ନୂଆଦିଲ୍ଲୀ,୧୧।୧୧: ମହାରାଷ୍ଟ୍ରରେ ସରକାର ଗଠନକୁ ନେଇ ଶିବସେନା ଏବେ ପାଗ ଭିଡୁଥିବା ବେଳେ ସୋମବାର ସନ୍ଧ୍ୟା ସୁଦ୍ଧା ତାକୁ ବହୁମତ ସାବ୍ୟସ୍ତ କରିବାକୁ ସମୟ ଦିଆଯାଇଛି। ଏବେ କିନ୍ତୁ କଂଗ୍ରେସ ବିନା ଶିବସେନା ସରକାର ଗଠନ କରିବା ଅସମ୍ଭବ ଥିବାରୁ ସେ କଂଗ୍ରେସର ଜବାବକୁ ଚାତକ ପରି ଚାହିଁ ରହିଛି। ଏହାକୁ ନେଇ ଦିଲ୍ଲୀରେ ସୋନିଆ ଗାନ୍ଧୀଙ୍କ ଅଧ୍ୟକ୍ଷତାରେ ଏକ ବୈଠକ ବସିଥିବା ବେଳେ ସେଥିରୁ କୌଣସି ନିର୍ଯ୍ୟାସ ବାହରି ପାରି ନ ଥିବା କୁହାଯାଉଛି। ଏବେ ଏହାକୁ ନେଇ ସନ୍ଧ୍ୟା ୪ଟାରେ ସୋନିଆଙ୍କ ଘରେ ୧୦ ଜନପଥରେ ଏକ ବୈଠକ ବସିବ ବୋଲି ସୂଚନା ଦେଇଛନ୍ତି କଂଗ୍ରେସ ନେତା ମଲ୍ଲିକାର୍ଜୁନ ଖରଗେ। ସେ କହିଛନ୍ତି ସନ୍ଧ୍ୟା ୪ଟାରେ ଅନୁଷ୍ଠିତ ବୈଠକରେ ଯାଗ ଦେବାପାଇଁ ମହାରାଷ୍ଟ୍ରର କଂଗ୍ରେସ ନେତାଙ୍କୁ ଡକାଯାଇଛି। ଏହାପରେ କଂଗ୍ରେସ ଯାହା ସ୍ଥିର କରିବ ତାହା ଚୁଡାନ୍ତ ନିଷ୍ପତ୍ତି ବୋଲି ସେ କହିଛନ୍ତି। ଯଦି ସୋନିଆ ଶିବସେନା ସହ ବେଣ୍ଟ କରିବାକୁ ରାଜି ହୋଇଗଲେ ତେବେ ଶିବସେନା ସନ୍ଧ୍ୟା ସୁଦ୍ଧା ବହୁମତ ସାବ୍ୟସ୍ତ କରିପାରିବ ବୋଲି ଅନୁମାନ କରାଯାଉଛି। ଅନ୍ୟପଟେ ଆଲୋଚନା ହେଉଛି କି ଏନ୍ସିପି ଶିବସେନା ସହ ମେଣ୍ଟ କରିବାକୁ ସମ୍ପୂର୍ଣ୍ଣ ପ୍ରସ୍ତୁତ ରହିଥିବା ବେଳେ ସବୁ ଦାୟିତ୍ୱ କିନ୍ତୁ କଂଗ୍ରେସ ଉପରେ ଛାଡି ଦେଇଛି। ଅନ୍ୟପଟେ ରାଜସ୍ଥାନରେ ବିଧାୟକଙ୍କ ଗହଣରେ ଥିବା ମହାରାଷ୍ଟ୍ରର ପୂର୍ବତନ ୩ ମୁଖ୍ୟମନ୍ତ୍ରୀ ଦିଲ୍ଲୀ ଗସ୍ତ କରିଛନ୍ତି। ଏଥିରୁ ଆହୁରି ମଧ୍ୟ ଅନୁମାନ ଲଗାଯାଉଛି କି ଶିବସେନା ହୁଏତ ସୋମବାର ସନ୍ଧ୍ୟା ସୁଦ୍ଧା ରାଜ୍ୟପାଳଙ୍କୁ ଭେଟି ସରକାର ଗଠନ ପାଇଁ ପ୍ରସ୍ତାବ ଦେଇପାରେ।
