ଭୁବନେଶ୍ୱର, ୨୯।୯(ବ୍ୟୁରୋ): ୧୦୮ ଏବଂ ୧୦୨ ମାଗଣା ଆମ୍ବୁଲାନ୍ସ ପରିଚାଳନା ବ୍ୟବସ୍ଥା ନିଜର ମହତ୍ କାର୍ଯ୍ୟ ପାଇଁ ଅନେକ ସମୟରେ ପ୍ରଶଂସାର ପାତ୍ର ହୋଇଛି। କିନ୍ତୁ ଏହି ସେବା ପରିଚାଳନାରେ ବର୍ତ୍ତମାନ ମୁଖ୍ୟ ବାଧକ ସାଜିଛି ଫେକ୍ କଲ୍। ଜରୁରିକାଳୀନ ସେବା ପାଇଁ ଉଦ୍ଦିଷ୍ଟ ଆମ୍ବୁଲାନ୍ସ ଫୋନ୍ ନମ୍ବର ଏବେ କେତେକଙ୍କ ପାଇଁ ଟାଇମପାସ୍ ଏବଂ ଥଟ୍ଟାମଜାର ମାଧ୍ୟମ ପାଲଟିଛି। ଦିନକୁ ଦିନ ୧୦୮ ଆମ୍ବୁଲାନ୍ସ କଣ୍ଟ୍ରୋଲ ରୁମକୁ ଆସୁଥିବା ଫେକ୍ କଲ୍ ସଂଖ୍ୟା ବଢ଼ିବାରେ ଲାଗିଛି। କେତେଜଣ ଅସାଧୁ ବ୍ୟକ୍ତିଙ୍କ ଯୋଗୁ ପ୍ରକୃତ ହିତାଧିକାରୀ ଅସୁବିଧାର ସମ୍ମୁଖୀନ ହେଉଛନ୍ତି। ପୂର୍ବରୁ ଜଣେ ଅସାଧୁ ବ୍ୟକ୍ତି ୩ ହଜାରରୁ ଅଧିକ ଥର ଫୋନ୍ କରିଥିବା ମଧ୍ୟ ନଜିର ରହିଛି। ଅନାବଶ୍ୟକ କଲ୍ରେ ଲାଇନ୍ ବ୍ୟସ୍ତ ରହିବା ଦ୍ୱାରା ଅନେକ ଜରୁରୀ କଲ୍ ଗ୍ରହଣ ହୋଇପାରୁ ନାହିଁ।
ଲୋକଙ୍କୁ ମାଗଣା ଆମ୍ବୁଲାନ୍ସ ସେବା ଯୋଗାଇ ଦେବାକୁ ୨୦୧୩ରେ କେନ୍ଦ୍ର ସରକାରଙ୍କ ସହାୟତାରେ ରାଜ୍ୟରେ ୧୦୮ ଆମ୍ବୁଲାନ୍ସ ସେବା ଆରମ୍ଭ ହୋଇଥିଲା। ଜିକିତ୍ସା ହେଲଥ୍ କେୟାର ଲିଃ ନାମକ ଏକ ଘରୋଇ କମ୍ପାନୀ ଏହି ସେବା ପ୍ରଦାନ କରୁଛି। ଏହାର ମୁଖ୍ୟ କାର୍ଯ୍ୟାଳୟ ଭୁବନେଶ୍ୱରର ଇଡ଼କୋ ଟାୱାରରେ ଅବସ୍ଥିତ। ରାଜ୍ୟର ଯେକୌଣସି ଜିଲାରୁ ୧୦୮ କିମ୍ବା ୧୦୨ ପାଇଁ କଲ୍ ଆସିଲେ, ତାହା ଭୁବନେଶ୍ୱରର ନିୟନ୍ତ୍ରଣ କକ୍ଷକୁ ପ୍ରଥମେ ଆସିଥାଏ ଏବଂ ସେହିଠାରୁ ହିଁ ରୋଗୀଙ୍କ ନିକଟକୁ ଆମ୍ବୁଲାନ୍ସ ପଠାଇବାର ବ୍ୟବସ୍ଥା କରାଯାଇଥାଏ। ଏହି ଦୁଇଟିଯାକ ଦେୟମୁକ୍ତ ନମ୍ବରରେ ଫେକ୍ କଲ୍ ସଂଖ୍ୟା ବଢ଼ିଚାଲିଥିବାରୁ ସେବା ଅନେକାଂଶରେ ପ୍ରଭାବିତ ହେଉଛି। ଏନେଇ ୧୦୮ କଲ୍ ସେଣ୍ଟରର ମ୍ୟାନେଜର କହିଛନ୍ତି ଯେ, ‘ଆମେ ଦୈନନ୍ଦିନ ୧୦,୦୦୦ କଲ୍ ଗ୍ରହଣ କରୁଥିବାବେଳେ ସେଥିରୁ ୭୦୦ଟି ମିଥ୍ୟା କଲ୍ ରହୁଛି। ଏଭଳି କଲ୍ ସାଧାରଣତଃ ସକାଳ ୭ ରୁ ଅପରାହ୍ନ ୩ଟା ମଧ୍ୟରେ ଆସିଥାଏ। ବିଶେଷକରି ଯେଉଁ ସମୟରେ ମହିଳା କର୍ମଚାରୀମାନେ ଫୋନ୍ ଧରନ୍ତି, ସେହି ସମୟରେ କେତେକ ଅସାମାଜିକ ବ୍ୟକ୍ତି ସେମାନଙ୍କୁ ଫୋନ କରି ଅଶାଳୀନ ଭାଷାରେ କଥାବାର୍ତ୍ତା କରିଥାଆନ୍ତି, ଯାହାକି ଅତ୍ୟନ୍ତ ନିନ୍ଦନୀୟ। ଏପରି ମିଥ୍ୟା କଲ୍ ଯୋଗୁ ଅନେକ କ୍ଷେତ୍ରରେ ଘଟଣାସ୍ଥଳରୁ ଖାଲି ହାତରେ ଫେରୁଛି ଆମ୍ବୁଲାନ୍ସ। ଏପରି କି ରାସ୍ତାରେ ବୁଲା ପଶୁଙ୍କ ଦେହ ଖରାପ ଅଛି ବୋଲି ମଧ୍ୟ ନିୟନ୍ତ୍ରଣ କକ୍ଷକୁ ଫୋନ୍ ଆସୁଛି। ଏ ସମ୍ପର୍କରେ ୧୦୮ ନିୟନ୍ତ୍ରଣ କକ୍ଷର ଜଣେ କର୍ମଚାରୀ କହିଛନ୍ତି ଯେ, ମିଥ୍ୟା କଲ୍ ଆସୁଥିବା ନମ୍ବରରୁ ଏକାଧିକ ଥର ଫୋନ୍ ଆସିଲେ, ତାକୁ ସିଷ୍ଟମରେ ଫେକ୍ କଲର୍ ତାଲିକାରେ ପକାଇ ଦେଉଛୁ ଏବଂ ସମୟ ସମୟରେ ଏପରି ଜରୁରିକାଳୀନ ସେବାକୁ ବ୍ୟସ୍ତ ନ ରଖିବାକୁ ପରାମର୍ଶ ମଧ୍ୟ ଦେଉଛୁ।
