ୟୁପି ସ୍କୁଲ ଉଚ୍ଚ ବିଦ୍ୟାଳୟକୁ ଉନ୍ନୀତ ହେବାର ୪ବର୍ଷ ବିତିଲା: ଶିକ୍ଷକ ନିଯୁକ୍ତି ହେଉନି, ଶିକ୍ଷାଦାନ ବାଧାପ୍ରାପ୍ତ
8:01 amJuly 19, 2019 / 21

ଶେରଗଡ,୧୯ା୭(ଡି.ଏନ.ଏ.)- ଶେରଗଡ ବ୍ଲକରେ ଗତ ୨୦୧୪ରେ ୧୪ଟି ଉଚ୍ଚପ୍ରାଥମିକ ବିଦ୍ୟାଳୟକୁ ଶିକ୍ଷାବିଭାଗ ପକ୍ଷରୁ ଉଚ୍ଚ ବିଦ୍ୟାଳୟକୁ ଉନ୍ନୀତ କରାଯାଇଥିଲା। ଉଦ୍ଦେଶ୍ୟ ଥିଲା ଛାତ୍ରୀଛାତ୍ରମାନେ ଗୋଟିଏ ବିଦ୍ୟାଳୟରେ ମାଟ୍ରିକ ପର୍ଯ୍ୟନ୍ତ ପଢିବେ। ମାତ୍ର ଉକ୍ତ ବିଦ୍ୟାଳୟକୁ ଆନୁଷଙ୍ଗିକ ସୁବିଧା ସୁଯୋଗ ଓ ଶିକ୍ଷକ ଯୋଗାଇ ଦିଆଗଲା ନାହିଁ। ଫଳରେ ଶିକ୍ଷାଦାନ ବାଧାପ୍ରାପ୍ତ ହେଉଛି ଓ ରେଜଲ୍ଟ ମଧ୍ୟ ଖରାପ ହେଉଛି। ଏଭଳି ଅଭିଯୋଗ ଆଣିଛନ୍ତି ଉକ୍ତ ୧୪ ପ୍ରକଳ୍ପ ଉଚ୍ଚ ବିଦ୍ୟାଳୟର ଅଭିଭାବକ ଓ ଗ୍ରାମବାସୀ। ଯେ, ସରକାରଙ୍କ ନିର୍ଦ୍ଦେଶକ୍ରମେ ୨୦୧୪ରେ ବ୍ଲକର ଲାଞ୍ଜିଆପଲ୍ଲୀ, ଧବଳପୁର, କୃଷ୍ଣଛାଇ, ଗୋଠଗଁା, ଠୁରୁବୁରାଇ, ବରମୁଣ୍ଡଳୀ, କାଞ୍ଜିଆମ୍ମା, ଡେଙ୍ଗାପଦର, କୁମାରପାଣି, ପି.ଖିରିଡା, ବି.ବ୍ରହ୍ମପୁର, ବ୍ରାହ୍ମଣଛାଇ, ନରେନ୍ଦ୍ରପୁର ଓ ରାମଚନ୍ଦ୍ରପୁର ଉଚ୍ଚପ୍ରାଥମିକ ବିଦ୍ୟାଳୟକୁ ପ୍ରକଳ୍ପ ଉଚ୍ଚ ବିଦ୍ୟାଳୟଭାବେ ଉନ୍ନୀତ କରାଯାଇ ପାଠପଢା ଆରମ୍ଭ କରାଗଲା। ମାତ୍ର ଏନେଇ ଶିକ୍ଷକ ନିଯୁକ୍ତି ହେଲାନାହିଁ। ଫଳରେ ପ୍ରାଥମିକ ଶିକ୍ଷକ ଉଚ୍ଚ ଶ୍ରେଣୀର ପିଲାମାନଙ୍କୁ ପଢାଇଥିଲେ। ଶିକ୍ଷକ ନିଯୁକ୍ତି ପାଇଁ ଅଭିଭାବକ ଓ ପରିଚାଳନା କମିଟି ବାରମ୍ବାର ବିଇଓଙ୍କଠାରୁ ଆରମ୍ଭ କରି ଜିଲା ଶିକ୍ଷା ବିଭାଗ ନିକଟରେ ଅଭିଯୋଗ କଲେ, ହେଲେ କିଛି ସୁଫଳ ମିଳିଲା ନାହିଁ। ଫଳରେ ୪ ବର୍ଷ ଧରି ଏହିସବୁ ବିଦ୍ୟାଳୟରେ ମାଟ୍ରିକ ରେଜଲ୍ଟ ଖରାପ ହେଉଛି। ଫଳରେ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ତୁରନ୍ତ ଶିକ୍ଷକ ନିଯୁକ୍ତି କରାନଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଅଭିଭାବକ ଓ ସ୍କୁଲ ସଭାପତିମାନେ ଚେତାବନୀ ଦେଇଛନ୍ତି। ଏନେଇ ଜିଲା ଶିକ୍ଷା ଅଧିକାରୀ ଡ. ସନାତନ ପଣ୍ଡାଙ୍କୁ ଯୋଗଯୋଗ କରିବାରୁ ସେ କହିଛନ୍ତି, ଶିକ୍ଷକ ନିଯୁକ୍ତି ପ୍ରକ୍ରିୟା ସରକାରଙ୍କ ପକ୍ଷରୁ ଆରମ୍ଭ ହୋଇଛି, ଅତିଶୀଘ୍ର ନିଯୁକ୍ତି ହେବ। ତଥାପି କୌଣସି ବିଦ୍ୟାଳୟକୁ ଦରକାର ପଡିଲେ ଗତବର୍ଷ ଅବସର ନେଇଥିବା ଉଚ୍ଚ ବିଦ୍ୟାଳୟର ଶିକ୍ଷକମାନଙ୍କୁ ବର୍ଷେ ଦୁଇ ବର୍ଷ ପାଇଁ ଅତିଥି ଶିକ୍ଷକ (ଗେଷ୍ଟ ଟିଚର) ଭାବେ ନିଯୁକ୍ତି ଦେଇହେବ। ଉକ୍ତ ବ୍ଲକରେ ଏପରି ଶିକ୍ଷକ ଥିଲେ ଆବେଦନ କରିପାରିବେ, ତୁରନ୍ତ ତାଙ୍କୁ ନିଯୁକ୍ତି ଦେବୁ ବୋଲି କହିଛନ୍ତି।