ନୂଆଦିଲ୍ଲୀ,୨୫।୫: କରୋନା ମହାମାରୀରୁ ଦେଶବାସୀଙ୍କୁ ସୁରକ୍ଷା ପ୍ରଦାନ କରିବା ଲକ୍ଷ୍ୟରେ ସାରା ଦେଶରେ ଲକ୍ଡାଉନ-୪ ଲାଗୁ କରାଯାଇଛି। ଏହି ଲକ୍ଡାଉନ ଅବଧି ମଧ୍ୟରେ ସରକାର ବହୁ କୋହଳ ନୀତି ଅବଲମ୍ବନ କରିଛନ୍ତି। ଫଳରେ ଦେଶର ଆର୍ଥିକ ବ୍ୟବସ୍ଥାରେ ସୁଧାର ଆସିବ ସେଥିପାଇଁ ବିଭିନ୍ନ କାର୍ଯ୍ୟ ସରକାରଙ୍କ ଗାଇଡ୍ଲାଇନ ଅନୁସାରେ କାର୍ଯ୍ୟକାରୀ କରିବା ପାଇଁ କୁହାଯାଇଛି। ସରକାରଙ୍କ ଏହି ନିର୍ଦ୍ଦେଶାବଳୀ ଅନୁସାରେ ଦେଶର ୨ପ୍ରମୁଖ କାର ନିର୍ମାଣକାରୀ କମ୍ପାନୀ ହ୍ୟୁଣ୍ଡାଇ ଓ ମାରୁତି ସୁଜୁକି ସେମାନଙ୍କର କାରଖାନା ଗତ ସପ୍ତାହରୁ ଚଳାଇବା ଆରମ୍ଭ କରିଥିଲେ। ମାରୁତି ସୁଜୁକି ଇଣ୍ଡିଆ ଲିମିଟେଡ୍ ତା’ର ହରିୟାଣା(ମାନେସର)କାରଖାନାର ଉତ୍ପାଦନ କାର୍ଯ୍ୟ ଆରମ୍ଭ କରିଥିଲା। ସରକାରଙ୍କ ସମସ୍ତ ଗାଇଡ୍ଲାଇନ ଅନୁସାରେ କାରଖାନା କାର୍ଯ୍ୟ କରୁଥିଲା, କିନ୍ତୁ ମେ ୨୨ରେ ୨ଜଣ କରୋନାରେ ଆକ୍ରାନ୍ତ ଥିବା କମ୍ପାନୀ ଜାଣିବାକୁ ପାଇଲା। ଉକ୍ତ ୨ କର୍ମଚାରୀଙ୍କୁ କମ୍ପାନୀ ପକ୍ଷରୁ ସମସ୍ତ ପ୍ରକାର ସୁବିଧା ପ୍ରଦାନ ସହ କାରଖାନାର ଅନ୍ୟ କାହାର କରୋନା ସଂକ୍ରମଣର ଲକ୍ଷଣ ରହିଛି କିମ୍ବା ଉକ୍ତ ୨ ଆକ୍ରାନ୍ତ କାହା କାହା ସହ ମିଳାମିଶା କରିଛନ୍ତ, ସେସବୁ ଉପରେ ଅଧିକ ଗୁରୁତ୍ୱ ଦେବା ସହ ସ୍ଥାନୀୟ ପ୍ରଶାସନକୁ ମଧ୍ୟ ଆବଶ୍ୟକ ସହଯୋଗ କରୁଥିବା ବିଷୟରେ କମ୍ପାନୀ ପକ୍ଷରୁ କୁହାଯାଇଛି। ସେହିଭଳି ହ୍ୟୁଣ୍ଡାଇ ମୋଟର ଇଣ୍ଡିଆ ଲିମିଟେଡ୍ ମଧ୍ୟ ତା’ର ତାମିଲନାଡୁ (ଚେନ୍ନାଇ) କାରଖାନା ଚାଲୁ କରିଥିଲା। ହ୍ୟୁଣ୍ଡାଇରେ ମଧ୍ୟ ୩ଜଣ କର୍ମଚାରୀ କରୋନାରେ ଆକ୍ରାନ୍ତ ହୋଇଥିବା କମ୍ପାନୀ ମୁଖପାତ୍ର ସୂଚନା ଦେଇଛନ୍ତି। କମ୍ପାନୀ ସମ୍ପୂର୍ଣ୍ଣ ଭାବରେ ସରକାରୀ କଟକଣା ଓ ନିୟମାବଳୀକୁ ଅନୁସରଣ କରି କାରଖାନାର ପ୍ରଡକସନ କାର୍ଯ୍ୟ ଆରମ୍ଭ କରିଥିଲା। କିନ୍ତୁ କିପରି ଏବଂ କେଉଁ କାରଣରୁ କମ୍ପାନୀର ଉକ୍ତ ୩ଜଣ କର୍ମଚାରୀ ଏହି ସଂକ୍ରମଣରେ ଆକ୍ରାନ୍ତ ହେଲେ ସେ ବିଷୟରେ କମ୍ପାନୀ ଗୁରୁତ୍ୱର ସହ ଏହି ଘଟଣାକୁ ନେଇଛି। କାରଖାନାର ଆକ୍ରାନ୍ତ ୩ଜଣ ରୋଗୀଙ୍କୁ କମ୍ପାନୀ ପକ୍ଷରୁ ଆବଶ୍ୟକ ସହାୟତା ପ୍ରଦାନ ସହ କାରଖାନାର ଅନ୍ୟ କର୍ମଚାରୀଙ୍କ ବିଷୟରେ ଆବଶ୍ୟକ ତଥ୍ୟ ସଂଗ୍ରହ କରାଯାଉଛି। ଗତ କିଛିଦିନ ତଳେ ଚାଇନିଜ ଫୋନ ଓପ ର ଗ୍ରେଟର ନୋଏଡା କାରଖାନାରେ ମଧ୍ୟ କେତେଜଣ କର୍ମଚାରୀ କରୋନାରେ ଆକ୍ରାନ୍ତ ହୋଇଥିଲେ। ଫଳରେ କମ୍ପାନୀ ତା’ର ଉତ୍ପାଦନ କାର୍ଯ୍ୟ ବନ୍ଦ କରିଦେଇଛି।
