ମୁମ୍ବାଇ: ଫିଲ୍ମ ‘ମେଁ ହୁଁ ନା’, ‘ଲଗେ ରହୋ ମୁନ୍ନାଭାଇ’, ‘ବୀର ଜାରା’ ଓ ‘ଦୋସ୍ତାନା’ ସମେତ ବହୁ ହିଟ୍ ଫିଲ୍ମରେ ନିଜର ଦମ୍ଦାର ଅଭିନୟ ଯୋଗୁ ଏକ ଭିନ୍ନ ପରିଚୟ ସୃଷ୍ଟି କରିପାରିଛନ୍ତି ଅଭିନେତା ବୋମନ ଇରାନି। ବର୍ତ୍ତମାନ ସମୟରେ ଘରେ ଘରେ ସେ ଡାକ୍ତର ଅସ୍ଥାନା ଓ ବୀରୁ ସହସ୍ତ୍ରବୁଦ୍ଧ ତଥା ଭାଇରସ୍ ନାଁରେ ବେଶ୍ ଲୋକପ୍ରିୟ ହୋଇପାରିଛନ୍ତି। ୧୯୫୯ ଡିସେମ୍ବର ୨ ମୁମ୍ବାଇରେ ଜନ୍ମଗ୍ରହଣ କରିଥିବା ବୋମନ ସୋମବାର ୬୦ ବର୍ଷ ବୟସରେ ପଦାର୍ପଣ କରିଛନ୍ତି। ଏହି ଅବସରରେ ବଲିଉଡ୍ ସେଲିବ୍ରିଟି ଓ ପ୍ରଶଂସକଙ୍କ ଶୁଭେଚ୍ଛାର ସୂଅ ଛୁଟିବାରେ ଲାଗିଛି। ତେବେ ଫିଲ୍ମରେ ଆସିବା ପୂର୍ବରୁ ବୋମନ କ’ଣ କରୁଥିଲେ ଜାଣିଛନ୍ତି କି। ଜନ୍ମଦିନ ଅବସରରେ ତାଙ୍କ ବିଷୟରେ ଆସନ୍ତୁ ଜାଣିବା କିଛି ଜଣା ଅଜଣା କଥା।
ଛୋଟବେଳୁ ବୋମନ ଡିସ୍ଲେକ୍ସିଆ ନାମକ ଏକ ରୋଗରେ ଆକ୍ରାନ୍ତ ଥିଲେ। ଏହି ରୋଗ ଯୋଗୁ ତାଙ୍କୁ ଶବ୍ଦ ଚିହ୍ନିବାରେ କଷ୍ଟ ହେଉଥିଲା। ଆଉ ଏଥିପାଇଁ ସେ ଚିକିତ୍ସା ମଧ୍ୟ କରାଇଥିଲେ। କଲେଜ ସରିବା ପରେ ଏବଂ ଫିଲ୍ମରେ ଆସିବା ପୂର୍ବରୁ ସେ ଏକ ହୋଟେଲରେ ଓ୍ବେଟର ଭାବେ କାମ କରୁଥିଲେ। କାରଣ ସେତେବେଳେ ତାଙ୍କ ଘରର ଆର୍ଥିକ ସ୍ଥିତି ସ୍ବଚ୍ଛଳ ନ ଥିଲା। ଏହାପରେ ବାପାଙ୍କ ଅନ୍ତେ ବୋମନ ତାଙ୍କ ବେକେରୀ ସପ୍କୁ ଚଳାଇଥିଲେ। ହେଲେ ଏଥିରେ ଘର ଚଳାଇବା କଷ୍ଟ ହୋଇଥିବାରୁ ପରେ ସେ ଫଟୋଗ୍ରାଫି କରିଥିଲେ। କିଛି ଦିନ ପରେ ସେ ଅଭିନୟ ପାଇଁ ଟ୍ରେନିଂ ନେବା ସହ ଥିଏଟରରେ କାମ କରିବା ଆରମ୍ଭ କରିଥିଲେ। ସେ ପ୍ରାୟ ୪୦ଟି ନାଟକରେ କାମ କରିସାରିଛନ୍ତି। ସେଥିମଧ୍ୟରୁ ‘ଆଇ ଆମ୍ ନଟ୍ ବାଜିରାଓ’ ନାମକ ଏକ ନାଟକ ତାଙ୍କର ବେଶ୍ ପପୁଲାର ହୋଇଥିଲା।
