ଶୀତଦିନେ ପରିବେଶ ଥଣ୍ଡା ରହିଥାଏ। ବେଳେବେଳେ କେତେକ ସ୍ଥାନରେ ତାପମାତ୍ରା ଶୂନ ଡିଗ୍ରୀ ତଳକୁ ଖସିଯାଏ। ଏହି ଋତୁରେ ବିଶେଷଭାବରେ ହୃଦ୍ରୋଗୀ ଅଧିକ ସତର୍କ ରହିବା ଆବଶ୍ୟକ। କାରଣ ପ୍ରବଳ ଶୀତ ଯୋଗୁ ଶରୀରରେ ଥିବା ଶିରାପ୍ରସିରାଗୁଡ଼ିକ ସଙ୍କୁଚିତ ହୋଇଯାଏ। ଏହାଦ୍ୱାରା ରକ୍ତ ପ୍ରବାହ ବାଧାପ୍ରାପ୍ତ ହୋଇଥାଏ। ତେଣୁ ଶୀତଦିନେ ହୃଦ୍ରୋଗୀ ଏ ନେଇ ଧ୍ୟାନଦେବା ଜରୁରୀ। ଏହି ସମୟରେ ସେମାନେ ଏପରି ପୋଷାକ ପିନ୍ଧନ୍ତୁ ଯେମିତି ଶରୀର ଉଷ୍ମ ରହିବ। ବାହାରକୁ ଗଲେ ସ୍ବେଟର, ଜ୍ୟାକେଟ ପିନ୍ଧିବା ସହ ମୁଣ୍ଡରେ ଟୋପି ପିନ୍ଧନ୍ତୁ। ତା’ସହ ଏହି ଋତୁରେ ସେମାନେ ଖାଦ୍ୟପେୟ ପ୍ରତି ସତର୍କ ରୁହନ୍ତୁ। ଶୀତଋତୁରେ ଅଧିକ ଫ୍ୟାଟ୍ ଏବଂ ଲବଣଯୁକ୍ତ ଖାଦ୍ୟ ଖାଆନ୍ତୁ ନାହିଁ। ସବୁଠାରୁ ଖାସ୍ କଥା ହେଲା, ନିଶାଦ୍ରବ୍ୟ ସେବନଠାରୁ ଦୂରେଇରହନ୍ତୁ। ସକାଳୁ ହାଲ୍କା ସୂର୍ଯ୍ୟକିରଣରେ କିଛି ସମୟ ବସିଲେ ତାହା ଶରୀର ପାଇଁ ଉପକାରୀ ସାବ୍ୟସ୍ତ ହୋଇଥାଏ। ଏହାସହ ପ୍ରତିଦିନ ମର୍ନିଂଓ୍ବାକ୍ କରିବାକୁ ଭୁଲନ୍ତୁ ନାହିିଁ।
ଶୀତଦିନେ ମଧ୍ୟ ଆମ ଶରୀରରେ ଜଳୀୟ ଅଂଶ ସନ୍ତୁଳିତ ରହିବା ନିହାତି ଜରୁରୀ। ତେଣୁ ଏହି ଦିନରେ ପ୍ରଚୁର ପାଣି ପିିଇବା ସହ ତଟକା ଫଳ ଜୁସ୍ ପିଅନ୍ତୁ।
ଶୀତଦିନେ ବ୍ରେକ୍ଫାଷ୍ଟରେ କମଳା ଜୁସ୍ ସାମିଲ କରନ୍ତୁ
ଖାଦ୍ୟ ତାଲିକାରେ ଖଟାଜାତୀୟ ଖାଦ୍ୟ ରଖିପାରନ୍ତି। ଏପରି କି ମଧ୍ୟାହ୍ନ ଭୋଜନ ସମୟରେ ଖଟା ଜାତୀୟ ଖାଦ୍ୟ ଖାଇବା ସହ ଜୁସ୍ ପିଇପାରନ୍ତି।
ରସୁଣରେ ଥିବା ‘ଏଲିନ୍’ ନାମକ ଫ୍ଲେବରିଂ ତତ୍ତ୍ୱ ଶୀତଦିନେ ଆମ ଶରୀର ପାଇଁ ବେଶ୍ ଉପକାରୀ। ଏହା ଥଣ୍ଡାଜନିତ ସମସ୍ୟା ଦୂରକରିଥାଏ। ଏହାବ୍ୟତୀତ ଏଥିରେ ଥିବା ଆଣ୍ଟି ଅକ୍ସିଡାଣ୍ଟ ଶରୀର ପାଇଁ ବେଶ୍ ଲାଭପ୍ରଦ।
ଶୀତଦିନେ ଅଦାମିଶ୍ରିତ ଚା’ ପିଇଲେ ଥଣ୍ଡାରୁ ଆରାମ ଲାଗିଥାଏ। ଅଦାମିଶ୍ରିତ ପାଣି ମଧ୍ୟ ଶରୀର ପାଇଁ ବେଶ୍ ଉପକାରୀ।
